اقوردا اۋلاسىنداعى از-كەم اۋىس-ءتۇيىس جايلى اقپارات بولىسپەكپىز. ەندى رەت-رەتىمەن باياندايىق.

19 اقپان 2018 جىل. وكسانا لوسكۋتوۆا قر باس پروكۋراتۋراسىنىڭ رەسمي وكىلى بولىپ تاعايىندالدى.

وكسانا لوسكۋتوۆا 1980 جىلى 5 جەلتوقساندا اقتوبە وبلىسىندا دۇنيەگە كەلگەن. 2002 جىلى ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىن «قازاق ءتىلى جانە ادەبيەتى ءپانىنىڭ وقىتۋشىسى» ماماندىعى بويىنشا بىتىرگەن. بيىل «تۇران-استانا» ۋنيۆەرسيتەتىندە «جەرگىلىكتى جانە مەملەكەتتىك باسقارۋ» ماماندىعى بويىنشا ماگيستراتۋرانى بىتىرەدى. ەڭبەك جولىن 1999 جىلى «قازاقستان-اقتوبە» تەلەارناسىندا «ارمىسىڭ، اقتوبەم!» باعدارلاماسىنىڭ جۇرگىزۋشىسى، ءتىلشىسى قىزمەتىنەن باستاپتى.

وكسانا لوسكۋتوۆا قازىرگى قىزمەتىنە دەيىن ورتالىق كوممۋنيكاتسيالار قىزمەتى ديرەكتورىنىڭ ورىنباسارى - رەسمي وكىلى بولعان.

20 اقپان 2018 جىل. پرەزيدەنت نازارباەۆتىڭ جارلىعىمەن رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتورايىمى تاعايىندالدى. ول - ناتاليا گودۋنوۆا.

"ناتاليا نيكولاەۆنا گودۋنوۆا رەسپۋبليكالىق بيۋدجەتتىڭ  اتقارىلۋىن باقىلاۋ جونىندەگى ەسەپ كوميتەتىنىڭ تورايىمى بولىپ تاعايىندالسىن", -دەلىنگەن جارلىقتا.

سونداي-اق، مەملەكەت باسشىسىنىڭ جارلىعىمەن نۇرمۇحامبەت قاناپياۇلى ابدىبەكوۆ رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى قىزمەتىنەن بوساتىلدى.

ناتاليا نيكولاەۆنا گودۋنوۆا 1972 جىلى 24 مامىردا ورال قالاسىندا دۇنيەگە كەلگەن. 1993 جىلى باتىس قازاقستان اۋىلشارۋاشىلىق ينستيتۋتىن بىتىرگەن. رەسەي فەدەراتسياسى ۇكىمەتى جانىنداعى قارجى اكادەمياسىنىڭ تۇلەگى.

20 اقپان 2018 جىل. نۇرسۇلتان نازارباەۆ دارحان مىڭبايدى قىزمەتىنەن بوساتىپ، ورنىنا قحا توراعاسىنىڭ ورىنباسارى قىزمەتىنە لەونيد پروكوپەنكونى تاعايىندادى.

"مەملەكەت باسشىسىنىڭ وكىمىمەن لەونيد اندرەەۆيچ پروكوپەنكو قازاقستان حالقى اسسامبلەياسى توراعاسىنىڭ ورىنباسارى، قازاقستان رەسپۋبليكاسى پرەزيدەنتى اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى قىزمەتتەرىنە تاعايىندالدى", - دەلىنگەن حابارلامادا.

21 اقپان 2018 جىل. پرەمەر-ءمينيستردىڭ سايتى اقپار تاراتتى. قر ۇكىمەتىنىڭ قاۋلىسىمەن دميتري ۆاسيلەۆيچ گولوبۋردا قر قورعانىس جانە اەروعارىش ونەركاسىبى ۆيتسە-ءمينيسترى قىزمەتىنەن بوساتىلىپ، مينيستر بۇيرىعىمەن قر قاوم اقپاراتتىق قاۋىپسىزدىك كوميتەتىنىڭ توراعاسى بولىپ تاعايىندالدى.

دميتري گولوبۋردا 1973 جىلى الماتىدا دۇنيەگە كەلگەن. 1995 جىلى ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن «قۇقىقتانۋ» ماماندىعى بويىنشا تامامداعان.

2016 جىلدىڭ قاراشا ايىنان قازىرگى تاڭعا دەيىن قر قورعانىس جانە اەروعارىش ونەركاسىبى ۆيتسە-ءمينيسترى قىزمەتىن اتقارعان.

Abai.kz