AI-ءدىڭ قازاقستانداعى زەرتتەۋشىسى حەزا ماكگيللدىڭ ايتۋىنشا، قۇقىق قورعاۋشىلاردى 2017 جىلى قازاقستاندا تاۋەلسىز كاسىپوداقتاردىڭ، ازاماتتىق بەلسەندىلەر مەن «بيلىكتى سىناعان» جۋرناليستەردىڭ قۋعىندالۋى كوبىرەك الاڭداتقان.

حەزا ماكگيلل قازاقستان بيلىگى بىلتىر تاۋەلسىز كاسىپوداقتاردى جاۋىپ، ولاردىڭ قىزمەتىن شەكتەيتىن ەرەجەلەر ەنگىزگەنىن، كاسىپوداق مۇشەلەرىنە قارسى «زاڭسىز ميتينگىگە ايداپ سالۋ جانە قارجى جىمقىرۋ» ءىسىن قوزعاعانىن ايتادى. ول بۇعان مىسال رەتىندە كاسىپوداق باسشىلارى لاريسا حاركوۆا، نۇربەك قۇشاقباەۆ جانە ءامين ەلەۋسىنوۆتىڭ سوتتالعانىن كەلتىرەدى.

AI بۇعان قوسا ءوزى ار-ۇجدان تۇتقىنى دەپ تانىعان ازاماتتىق بەلسەندىلەر ماكس بوقاەۆ پەن تالعات اياننىڭ ءوز وي-پىكىرلەرىن ەركىن بىلدىرگەنى ءۇشىن سوتتالعانىن ايتادى.

قۇقىق قورعاۋشىلار 2017 جىلى «بيلىكتى سىناعان تاۋەلسىز جۋرناليستەرگە شابۋىل جاساۋ جانە ساياسي استارى بار ءىس قوزعاپ، قۋدالاۋ» وقيعالارى بولعانىن ايتادى. ۇيىم مىسال رەتىندە تاۋەلسىز «ساياسي قالام. تريبۋنا» گازەتىنىڭ رەداكتورى جانبولات مامايدىڭ سوتپەن قۋدالانعانىن جانە «جۋرناليستەر قاۋىپ-قاتەردە» قورىنىڭ توراعاسى رامازان ەسىرگەپوۆكە الدەكىمدەردىڭ پىشاق سالعانىن كەلتىرەدى.

ورتالىق ازيا ەلدەرىنىڭ بيلىكتەرى تەرروريزممەن كۇرەستى ودان ارى كۇشەيتىپ، «قاۋىپسىزدىكتى قامتاماسىز ەتۋ ءۇشىن» ازاماتتاردىڭ قۇقىعىن شەكتەپ وتىر دەلىنگەن ۇيىم ەسەبىندە.

Abai.kz