حالىقارالىق ەسىرتكى تاسىمالىنا رەسەيلىك ديپلوماتتاردىڭ قاتىسى بار قىلمىستىق ءىس جونىندە 22 اقپاندا بەلگىلى بولدى. تەرگەۋ 2016 جىلدىڭ جەلتوقسانىندا باستالعان. سول كەزدە رەسەيدىڭ ارگەنتيناداعى ەلشىسى ۆيكتور كورونەللي ەلشىلىكتەگى مەكتەپ اۋماعىنان پوشتا ارقىلى كەلدى دەگەن بەلگى بار كۇدىكتى 12 سومكە جاتىر دەپ پوليتسياعا حابارلاعان.

بۇل ءىس جونىندە كەيىن ارگەنتينانىڭ قاۋىپسىزدىك ءمينيسترى پاتريسيا بۋللريچ ءباسپاسوز ءماسليحاتىندا تولىعىراق ايتقان. كورونەللي ارگەنتينالىق اگەنتتەرگە سومكەدەگى زاتتى تەكسەرۋ ءۇشىن، مەكتەپتىڭ ارتقى ەسىگىنىڭ كىلتىن بەرگەن. ودان 389 كەلى كوكاين تابىلعان. ونىڭ قۇنى رەسەيدە 50 ميلليون ەۋرو تۇرۋى مۇمكىن.

سومكەلەردىڭ ىشىندەگى ەسىرتكىنى ءبىر ساعاتتىڭ ىشىندە ۇنعا ايىرباستاپ، ولارعا GPS-قابىلداعىش ورناتىپ، ونىڭ كىمگە تيەسىلى ەكەنىن انىقتاماق بولعان. كەيىن 2017 جىلدىڭ جەلتوقسان ايىندا ۇن سالىنعان سومكەلەر رەسەيگە ديپلوماتيالىق پوشتا ارقىلى جەتكەن.

سول ايدا رەسەيدىڭ قاۋىپسىزدىك كەڭەسىنىڭ حاتشىسى نيكولاي پاترۋشەۆ پرەزيدەنت ماۋريسيو ماكريدىڭ يناۋگۋراتسياسىنا قاتىسۋ ءۇشىن، رەسمي ارگەنتيناعا بارعان. Telegraph باسىلىمىنىڭ جازۋىنشا، پاترۋشەۆتا قۇپيا ميسسيا بولعان – ول "ەسىرتكى" بار سومكەلەردى رەسەيگە جەتكىزۋ كەرەك بولعان.Telegraph دەرەككوزىنىڭ كىم ەكەنىن جازبايدى. بۇل اقپاراتتى ازىرگە رەسمي راستامادى.

وسى ىسكە بايلانىستى التى ادام ۇستالعان. ونىڭ ىشىندە ەلشىلىكتىڭ بۇرىنعى قىزمەتكەرى، MORAL (Mecenas Ortodoxos Rusos En America Latin, لاتىن امەريكاسىنداعى ورىس پراۆوسلاۆيالىق مەتسەناتتار) دا بار.

رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا وتكەن جۇما كۇنى، 23 اقپاندا كوكاين نەمەسە ۇن ديپلوماتيالىق پوشتا ارقىلى جىبەرىلمەدى دەپ مالىمدەدى. ول كوكايندى ديپلوماتيالىق تولقۇجاتى جوق "تەحنيكالىق قۇرامنىڭ قىزمەتكەرى" جىبەرمەك بولعان دەيدى.

Abai.kz