ءۇشارال قالاسىندا الاكول اۋدانى ىسكەر ايەلدەرىنىڭ ءبىرىنشى فورۋمى ءوتتى. شارا الماتى وبلىسى كاسىپكەرلەر پالاتاسى وڭىرلىك كەڭەسىنىڭ ءتورايىمى، وبلىستىق ىسكەر ايەلدەر كەڭەسىنىڭ جەتەكشىسى ريمما سالىقوۆانىڭ، الماتى وبلىسى كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باسشىسى الماگۇل وڭعارباەۆانىڭ، الاكول اۋدانى اكىمىنىڭ ورىنباسارى الماس احانوۆتىڭ، كاسىپكەرلەر پالاتاسىنىڭ الاكول اۋداندىق فيليالىنىڭ باسشىسى مۇحتار اديكوۆتىڭ، اقسۋ جانە سارقان اۋداندارىنداعى ىسكەر ايەلدەر كەڭەسى جەتەكشىلەرىنىڭ، سونداي-اق الاكول اۋدانىنىڭ كاسىپكەر ايەلدەرىنىڭ قاتىسۋىمەن ءوتتى.

الماتى وبلىسى كاسىپكەرلەر پالاتاسى وڭىرلىك كەڭەسىنىڭ ءتورايىمى، وبلىستىق ىسكەر ايەلدەر كەڭەسىنىڭ جەتەكشىسى ريمما سالىقوۆا اتاپ وتكەندەي، الاكولدىك بيزنەس حانىمدارىنىڭ كەڭەسى اۋدان ايەلدەرىنىڭ ەكونوميكالىق جانە الەۋمەتتىك باستامالارىن قولداۋداعى باستى قوزعاۋشى كۇشكە اينالۋى كەرەك.

«ىسكەر ايەلدەر كەڭەسى قۇرامىن كەڭەيتىپ، قاتارىنا بيزنەس وكىلدەرىن عانا ەمەس،  مەملەكەتتىك مەكەمەلەر مەن قوعامدىق ۇيىمداردىڭ ايەل باسشىلارىن دا قوستى. اسىرەسە، كەڭەس ايەلدەردىڭ باستامالارى مەن سۇراقتارىن شەشۋگە قولداۋ كورسەتىپ وتىرۋى ءتيىس»، - دەدى ريمما سالىقوۆا.

الاكول اۋدانىنىڭ ىسكەر ايەلدەر كەڭەسىنىڭ ءتورايىمى بارشاگۇل ساياتوۆا كەڭەستىڭ جاڭارعان قۇرامىن، جۇمىس جوسپارى مەن الداعى مىندەتتەرىمەن تانىستىردى. اۋداندىق ىسكەر ايەلدەر كەڭەسى جانىنان كاسىپكەرلىك سالالارىنداعى ماسەلەلەردى ءجىتى قاراستىرىپ وتىراتىن سالالىق كوميتەتتەر قۇرىلاتىن بولادى.

«بۇگىندە اۋداننىڭ 1431 ايەل كاسىپكەرى اۋىل شارۋاشىلىعى، دەنساۋلىق ساقتاۋ، ءبىلىم بەرۋ، تۋريزم، قوناق ءۇي بيزنەسى، ساۋدا ءىسى سىندى كاسىپكەرلىكتىڭ بارلىق سالاسىندا جۇمىس ىستەيدى. وسىلايشا، كاسىپكەرلىك سۋبەكتىلەرىنىڭ 60%-ءىن ايەل ازاماتتار باسقارىپ وتىر. ءبىزدىڭ الدىمىزدا جەگىلىكتى اتقارۋشى بيلىكپەن ءوزارا قارىم-قاتىناس دەڭگەيىن كۇشەيتۋ، جاس كاسىپكەرلەرگە قولداۋ ءبىلدىرۋ مىندەتتەرى تۇر»، - دەدى بارشاگۇل ساياتوۆا.

ءوڭىردىڭ الەۋمەتتىك-ەكونوميكالىق دامۋىنداعى اۋقىمدى ۇلەسىن اۋدان اكىمىنىڭ ورىنباسارى الماس احانوۆ ەرەكشە اتاپ ءوتتى.

«تاعى ءبىر توقتالاتىن جايت. بۇگىنگى نارىق جاعدايىندا 20-عا جۋىق ايەل شارۋا قوجالىقتارىن باسقارۋدا. باسقارىپ قانا قويماي، جاقسى كورسەتكىشتەرگە قول جەتكىزۋدە. ايەل كاسىپكەرلەردىڭ الەۋمەتتتىك جاۋاپكەرشىلىگى وتە جوعارى، ولار بەلسەندى تۇردە قايىرىمدلىقپەن اينالىسىپ كەلەدى»، - دەدى اۋدان اكىمىنىڭ ورىنباسارى.

اۋدان ىشىندە زور قايىرىمدىلىق قىزمەتى ءۇشىن «اليا» جك ديرەكتورى گۇلزادا سەمبينوۆا، جەكە كاسىپكەرلىكتى دامىتۋعا قوسقان ۇلەسى ءۇشىن «مۋكۋباەۆا» جك جەتەكشىسى قيزات مۇقىباەۆا مەن «اقساعىم» بالاباقشاسىنىڭ ديرەكتورى ايگەرىم قاناتحان العىس حاتتارمەن ماراپاتتالدى.

تالقىلاۋ بارىسىندا ايەل كاسىپكەرلىگىنىڭ دامۋ پروبلەمالارى، ايەل-كاسىپكەرلەردىڭ ەكونوميكالىق باستامالارىن قولداۋ مەن قارجىلىق ساۋاتتىلىعىن ارتتىرۋ بويىنشا سۇراقتار كوتەرىلدى.  شارا اياسىندا اۋدان بيزنەس حانىمدارىنىڭ جەتىستىكتەرىنە ارنالعان «تابىسكەر ايەل كەلبەتى» كورمەسى ۇيىمداستىرىلىپ، قاتىسۋشىلارعا كاسىپكەر قيزات مۇقىباەۆانىڭ تابىس وقيعاسى ايتىلدى.

سونىمەن بىرگە، فورۋمعا «دامۋ» قورىنىڭ وڭىرلىك فيليالى ديرەكتورىنىڭ ورىنباسارى رۋسلان ساماكەەۆ پەن قوردىڭ باس مەنەدجەرى جاندوس نۇرعازينوۆ، «الاكول» نەسيە سەرىكتەستىگىنىڭ وكىلى ءسابيت داريۆحان مەن پسيحولوگ تولقىن مۇقاشەۆا قاتىسىپ، ءسوز سويلەدى.

فورۋم قورىتىندىسى بويىنشا ىسكەر ايەلدەر كەڭەسى الاكول كولىندەگى ءتۋريزمدى دامىتۋ ماسەلەلەرىنە ارنالعان دوڭگەلەك ۇستەلدى ۇيىمداستىرۋدى جوسپارلاپ وتىر.

Abai.kz