بۇگىن مەملەكەت باسشىسى جاريالاعان «جۇمىسشى ماماندىقتار جىلى» اياسىندا الماتى وبلىسىندا ەڭبەك ادامدارى مەن جاس ماماندارعا ارنالعان «ENBEK FEST» رەسپۋبليكالىق جاستار سلەتى ءوتتى.

اۋقىمدى شاراعا ەلىمىزدىڭ 7 وڭىرىنەن كەلگەن جۇمىسشى جاستار قاتىستى. سلەتتىڭ باستى ماقساتى – ەڭبەك ادامىنىڭ مارتەبەسىن ارتتىرۋ، جاس مامانداردىڭ كاسىبي دامۋىنا مۇمكىندىك بەرۋ جانە ءوندىرىس سالاسىنداعى جاڭا يدەيالار مەن تاجىريبەلەردى ورتاعا سالۋ.

فورۋم اياسىندا «Jas Talks» پانەلدىك سەسسياسى ۇيىمداستىرىلدى. وندا ارنايى شاقىرىلعان سپيكەرلەر — «داۋلەت بەكەت» جشس باسشىسى سىدىق داۋلەتوۆ، «شين لاين» قايىرىمدىلىق قورىنىڭ پرەزيدەنتى دامير ديگاي، الماتى وبلىستىق ءماسليحاتىنىڭ دەپۋتاتى سەرگەي گوريانوي جانە «Alatau Hub» جەتەكشىسى بەكسۇلتان نۇراقىن جاستارمەن ءوز تاجىريبەلەرىن ءبولىسىپ، ەڭبەك جولىنداعى جەتىستىكتەرى تۋرالى ايتتى.

سلەت قاتىسۋشىلارى ءۇشىن مازمۇندى باعدارلاما ازىرلەنگەن. جاستار ىلە اۋدانىنداعى «داۋلەت بەكەت» جشس تۇيە شارۋاشىلىعىنا جانە «شين لاين» جشس كاسىپورنىنا بارىپ، ءوندىرىس پروتسەسىمەن تانىستى. سونىمەن قاتار، كەگەن اۋدانىنا قاراستى «قارا» شاتقالى مەن ايگىلى «كولساي» كولدەرىنە ەكسكۋرسيا ۇيىمداستىرىلادى.

فەستيۆال اياسىندا كوشباسشىلىق قابىلەتتى ارتتىرۋعا باعىتتالعان دارىستەر، زياتكەرلىك ويىندار مەن مادەني باعدارلامالار وتكىزىلەدى. ال 22 قازان كۇنى كەگەن اۋدانىنداعى «قارا» شاتقالىندا وتەتىن سالتاناتتى جابىلۋ راسىمىندە بەلسەندىلىك تانىتقان جۇمىسشى جاستار ماراپاتتالادى.

«بۇگىن ءوتىپ جاتقان رەسپۋبليكالىق جاستار سلەتى – ەڭبەك ادامدارىنىڭ مارتەبەسىن كوتەرىپ، جاس مامانداردى قولداۋعا باعىتتالعان ماڭىزدى الاڭ دەپ ەسەپتەيمىن. مۇنداي كەزدەسۋلەر ارقىلى جاستار ءوندىرىس سالاسىنداعى ناقتى مۇمكىندىكتەرمەن تانىسىپ، ءوز باعىتتارىن انىقتاي الادى. “ENBEK FEST” – ءوز ءىسىن سۇيەتىن جاستاردىڭ تاجىريبە الماسۋىنا، جاڭا يدەيالار مەن سەرىكتەستىكتەردىڭ قالىپتاسۋىنا مۇمكىندىك بەرەتىن تاماشا باستاما. ەڭبەك ادامدارىنىڭ ەڭبەگىن دارىپتەيتىن مۇنداي شارالار جاستارعا ۇلكەن موتيۆاتسيا بەرەدى»، – دەدى «فيرما بەنت» جشس كوپىرلى كران ءماشينيستى ديلفۋزا باقىتجانوۆا.

سلەتتىڭ اشىلۋ سالتاناتىندا الماتى وبلىسى اكىمىنىڭ ورىنباسارى عاني مايلىباەۆ قاتىسۋشىلارعا جىلى لەبىزىن ءبىلدىرىپ، جاستاردىڭ ەل دامۋىنا قوسار ۇلەسىن اتاپ ءوتتى:
«بارلىقتارىڭىزدى وسى فورۋمدا كورگەنىمە قۋانىشتىمىن، قۇرمەتتى قاتىسۋشىلار! تاريح پەن تابيعات توعىسقان قاسيەتتى ءوڭىر – الماتى وبلىسىنا قوش كەلدىڭىزدەر. بۇل سلەت – كاسىبي دامۋدىڭ جاڭا مۇمكىندىكتەرىن اشاتىن ماڭىزدى الاڭ. قۇرمەتتى جاستار، سىزدەر ەلىمىزدىڭ تىرەگى، ەكونوميكامىزدىڭ قوزعاۋشى كۇشى، ەل ەرتەڭىنىڭ يەسىسىزدەر. قازاقستاننىڭ جاڭا ءداۋىرى سىزدەردىڭ قولدارىڭىزبەن قالىپتاسادى».

«ENBEK FEST» رەسپۋبليكالىق جاستار سلەتى – ەڭبەك ادامىنىڭ مارتەبەسىن كوتەرىپ، جاس مامانداردى قولداۋعا باعىتتالعان جىل سايىنعى ءداستۇرلى شارالاردىڭ ءبىرى رەتىندە ەڭبەك مادەنيەتىن دارىپتەۋگە سەرپىن بەردى.

Abai.kz