بەيسەنبى, 15 ءساۋىر 2021
نە دەيدى؟! 4958 13 پىكىر 26 اقپان, 2018 ساعات 11:44

بەرگەي رىسقاليەۆ ءتىرى ەكەن

كۇنى بۇگىنگە دەيىن اتىراۋدىڭ ەكس-اكىمى بەرگەي رىسقاليەۆكە قاتىستى ءتۇرلى قاۋەسەت ايتىلىپ كەلگەن ەدى. قىزمەتىنىن الشاقتاتىلعاننان كەيىن بەرگەي رىسقاليەۆتىڭ ءولى-ءتىرىسى بەلگىسىز بولعان. جۇرت ىشىندە اعايىندى رىسقاليەۆتەرگە قاستاندىق جاسالعانى تۋرالى الىپ-قاشپا اڭگىمەلەر دە ايتىلىپ ءجۇردى.

سويتسەك، ەكس-اكىم بەرگەي رىسقاليەۆ ءدىن-امان، ءتىرى بولىپ شىقتى. ونىڭ ءتىرى ەكەنىن ساياساتكەر سەرىكجان مامبەتالين ءوزىنىڭ الەۋمەتتىك جەلىدەگى جەكە پاراقشاسىندا حابارلادى. ساياساتكەر "فەيسبۋك" جەلىسىندەگى جەكە پاراقشاسىندا بەرگەيمەن تۇسكەن سۋرەتىن جاريالاپ، از-كەم پىكىر بىلدىرگەن.

"مەن 90-شى جىلداردىڭ باسىندا، شاعىن بيزنەسپەن اينالىسقان كەزدە، باتىستىڭ ءبىر جىگىتىمەن تانىستىم. ەسىمى بەرگەي بولاتىن. سودان بەرى ارقايسىمىز ءوز جولىن تاڭداپ جۇردىك، تەك جاقىندا لوندوندا كەزدەسىپ قالدىق",-دەيدى ساياساتكەر. ەل-جۇرت ەكىۇداي پىكىردە جۇرگەن ەكس-اكىمگە بريتانيا بيلىگى بوسقىن مارتەبەسىن بەرگەن ەكەن.

"كەشەدەن بەرى جەمقورلىققا قارسى ءىس-قيمىل اگەنتتىگى بەرگەي رىسقاليەۆتى تەرگەۋ ماسەلەسىمەن استاناعا شاقىرىپ جاتىر.  بەرگەي əكىم بولىپ تاعايىندالۋىنىڭ الدىندا سالىق دەكلاراتسياسىن جاريالاپ، باي بيزنەسمەن بولعانىن دالەلدەدى. ول يەمدەنگەن زاۋىتتار، مۇناي كەن ورىندارى جانە دۇكەن جەلىلەرىنىڭ قۇنى – 150 ميلليون اقش دوللارىنا جۋىق", - دەيدى مامبەتالين. وعان قوسا، اعايىندى رىسقاليەۆتەردىڭ ەكەۋىنىڭ دە ءدىن-امان ەكەنى جىتكىزىپ، استانا شاقىرتۋى بويىنشا قازاقستانعا كەلە المايتىنىن ايتىپتى.

“بەرگەي رىسقاليەۆ پەن ونىڭ ءىنىسى جايىندا ءتۇرلى اڭگىمە ايتىلادى. ولار ءدىن امان. اعايىندىلارعا ۇلىبريتانيا ۇكىمەتى ساياسي بوسقىن مارتەبەسىن بەرگەن. اعىلشىن زاڭى بويىنشا ولار استاناعا كەلىپ، سىبايلاس جەمقورلىققا قارسى اگەنتتىككە تۇسىنىكتەمە بەرە المايدى.",-دەيدى سەرىكجان مامبەتالين.

ساياساتكەر سەرىكجان مامبەتاليننىڭ جازباسى ارقىلى بەرگەي رىسقاليەۆ ينتەرنەتتە جۇرتپەن جۇزدەۋگە ءازىر ەكەنىن دە بىلدىك.

"مەنىڭشە، ول سكايپ ارقىلى جاۋاپ بەرە الادى. مۇنىسى بيلىككە دە، ەلگە دە دۇرىس بولادى دەپ ويلايمىن. ال ول كىنالى مە، جوق پا، ونى تاۋەلسىز سوت شەشۋى كەرەك. ونداي سوت قازاقستاندا بولعان ەمەس",-دەپ تۇيىندەيدى جازباسىن.

ءسويتىپ سەرىكجان مامبەتاليننىڭ جازباسىنان بىلگەنىمىز - جۇرت جوققا بالاپ جۇرگەن بەرگەي رىسقاليەۆ ءتىرى ەكەن. كوپشىلىك ولدىگە بالاپ جۇرگەن ادامداردىڭ ويدا-جوقتا تابىلا كەتۋى دە كۇدىك تۋعىزاتىنى راس-اق. كىم ءبىلسىن، ءبىز باقيلىق دەپ جۇرگەن كەيبىرەۋلەر دە ەرتەڭ ءتىرى تابىلىپ قالۋى مۇمكىن عوي...

 

 

Abai.kz

13 پىكىر