جەكسەنبى, 24 ماۋسىم 2018
ماڭگىلىك ەل 1941 12 پىكىر 7 ناۋرىز, 2018 ساعات 09:49

الماتى وبلىسىنىڭ اكتيۆى ەلباسىنىڭ ۇندەۋىن تالقىلادى

تالدىقورعان پوليتەحنيكالىق كوللەدجىنىڭ ديرەكتورى ەرقات مۇقاجانوۆ گرانتتار سانىن ۇلعايتۋ مەن جاتاقحانامەن قامتۋ ماسەلەسىنە قاتىستى پىكىرىن ءبىلدىردى. اتالمىش كوللەدجدىڭ كۇندىزگى بولىمىندە 1622 ستۋدەنت وقىسا، سونىڭ 960-ى شالعاي اۋىلداردان كەلگەن بىلىمگەرلەر. ال ءبىلىم وشاعىنىڭ جاتاقحاناسى 200 ورىندىق. بۇدان بولەك وڭىردەگى بىرقاتار كوللەدجدەردە دە جاتاقحانا قاجەتتىگى تۋىنداپ وتىر. وسى ماسەلەگە وراي وبلىس اكىمى ا. باتالوۆ ەلباسى ن. نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى ۇندەۋىنە وراي وتكىزگەن اكتيۆ جيىنىندا ءتيىستى سالا باسشىلارىنا وڭىردەگى ءبىلىم وشاقتارىنىڭ جاتاقحاناعا دەگەن قاجەتتىلىگى تۋرالى مالىمەتتەردى تولىقتىرىپ، ناقتىلاپ، عيمارات قۇرىلىستارىن زاماناۋي ۇلگىدە جوبالاۋ قاجەتتىگىن ەسكەرتتى.

اكتيۆ جيىنىندا الماتى وبلىسىنىڭ اكىمى اماندىق باتالوۆ بەس باستاماعا جەكە-جەكە توقتالىپ، وسى باعىتتار بويىنشا وبلىستا اتقارىلۋى ءتيىس مىندەتتەر جايلى ايتىپ بەردى.

بايانداماشىنىڭ ايتۋىنشا، پرەزيدەنتتىڭ باسپانانى قولجەتىمدى ەتۋگە باعىتتالعان «7-20-25» باعدارلاماسى وڭىردەگى تۇرعىن ءۇي قۇرىلىسىنا جاڭا قارقىن بەرمەك. بيىلعى جىلى وبلىستا پايدالانۋعا بەرىلەتىن تۇرعىن ۇيلەر كولەمىن 1 ملن. شارشى مەترگە جەتكىزۋ كوزدەلۋدە. بۇل ورايدا ەكىنشى دەڭگەيلى بانكتەر نەسيەلىك تۇرعىن ءۇي قۇرىلىسىنا بەلسەندى تۇردە تارتىلۋى ءتيىس. ال ەكىنشى باستامادا ايتىلعان جالاقىسى تومەن ازاماتتار ءۇشىن سالىق مولشەرىن ازايتۋ جالدامالى جۇمىسكەرلەردىڭ، ونىڭ ىشىندە الەۋمەتتىك، قىزمەت كورسەتۋ سالاسىندا ەڭبەك ەتەتىن جانە تەحنيكالىق پەرسونالدىڭ جالاقىسىنىڭ وسۋىنە ىقپال ەتەتىن بولادى. ال مەملەكەتتىك گرانتتاردىڭ سانىن ارتتىرۋ جانە بىلىمگەرلەردى جاتاقحانامەن قامتۋ تۋرالى باستاما بويىنشا دا الدا اتقارىلار جۇمىس اۋقىمدى. ماسەلەن، بيىلعى جىلى وبلىستا 16588 مەكتەپ ءبىتىرۋشى بولسا، ەندى پرەزيدەنتتىڭ باستاماسىمەن ەلىمىزدىڭ جوو-لارىنا گرانتقا تۇسەتىندەر سانى بۇرىنعىدان دا ارتا تۇسەتىن بولادى. وعان قوسا وبلىس اكىمىنىڭ گرانتىمەن جەرگىلىكتى بيۋدجەت ەسەبىنەن 438 ادام وقىپ جاتىر. بيىلعى جىلى تاعى 100 گرانت بەرۋ كوزدەلىپ وتىر. ال جاتاقحانا قاجەتتىلىگى وبلىس ورتالىعىنداعى ءى. جانسۇگىروۆ اتىنداعى جمۋ مەن وڭىردەگى بىرقاتار كوللەدجەردە بايقالىپ وتىر.

سونىمەن قاتار ءوز سوزىندە وبلىس اكىمى ەلباسىنىڭ «شاعىن نەسيە بەرۋدى كوبەيتۋ» تۋرالى باستاماسىنا دا توقتالىپ ءوتتى. «2017 جىلى 4,3 ميلليارد تەڭگەنىڭ 840 شاعىن نەسيەسى بەرىلدى. قاراجاتتىڭ جەتپەۋىنەن  3148 ادام شاعىن نەسيە الا المادى. ەلباسىنىڭ باستاماسىندا قوسىمشا 20 ميلليارد تەڭگە ءبولۋ ماسەلەسى كوتەرىلدى. ءبىز ءوز كەزەگىندە، وسى قاراجاتتى پايدالانا وتىرىپ، شاعىن نەسيە الۋعا نيەت بىلدىرگەن كوپتەگەن تۇرعىنداردى قامتي الامىز»، - دەدى ا. باتالوۆ.

گازداندىرۋ جۇمىسىنا قاتىستى بەسىنشى باستامادا كەڭىنەن ايتىلعان. وسىعان وراي وبلىس اكىمى ا. باتالوۆ بۇگىنگى كۇنى 11 اۋداندا گازداندىرۋ جۇمىسى ءجۇرىپ جاتقانىن، وعان 8,5 ملرد. تەڭگە بولىنگەنىن اتاپ ءوتتى. تالدىقورعان قالاسىندا قالاىشىلىك گازداندىرۋ جۇيەسىنىڭ ءبىرىنشى كەزەگىنىڭ قۇرىلىس-مونتاج جۇمىستارى اياقتالعان. قازىر ەكىنشى، ءۇشىنشى كەزەكتىڭ قۇرىلىسى باستالدى. سونداي-اق قاپشاعاي قالاسىندا ابونەنتتەردى كوگىلدىر وتىن جۇيەسىنە قوسۋ جۇمىستارى ءجۇرىپ جاتىر. بۇگىندە تەكەلى قالاسىنا دەيىن گاز قۇبىرىن تارتۋ  جانە «باقاناس»، «سارىوزەك» جانە «ۇشتوبە» اگتس قۇرىلىستارى جۇرۋدە.

ءسوزىنىڭ سوڭىندا وبلىس اكىمى ا. باتالوۆ:

- وسى اتالعان بەس باستامانىڭ دا ماڭىزى زور. الەۋمەتتىك سالانى كوتەرۋ ءۇشىن، تۇرعىنداردىڭ ءال-اۋقاتىن ارتتىرۋ ءۇشىن ۇلكەن مۇمكىندىكتەرگە جول اشىپ بەرىپ وتىر. سوندىقتان مەن توقتالعان ماسەلەلەرگە قاتىستى ورىنباسارلارىم مەن ءتيىستى باسقارمالار باسشىلارىنا ءار باعىت بويىنشا ناقتى جوسپارلار ازىرلەۋدى، ونى جۇزەگە اسىرۋدا مەملەكەتتىك-جەكەمەنشىك سەرىكتەستىك مەحانيزمىن جانداندىرۋدى، ەلباسىمىز ۇسىنعان بەس باستامانى حالىققا ءتۇسىندىرىپ، ناسيحاتتاۋ جۇمىستارىن باستاۋدى تاپسىرامىن. 12 ناۋرىزعا دەيىن ءار باعىت بويىنشا ۇلتتىق بانك، قارجى ينستيتۋتتارى، «اتامەكەن» ۇلتتىق كاسىپكەرلەر پالاتاسى، جوعارى وقۋ ورىندارىمەن جانە باسقا دا مۇددەلى ورگاندارمەن كەلىسىلگەن جول كارتاسىن دايىنداپ، ونى  تەز ارادا ىسكە اسىرۋىمىز كەرەك، - دەدى ا. باتالوۆ.

مۇنان سوڭ ءسوز العان «تۇرعىنۇيجيناقبانكى» اق الماتى وبلىستىق فيليالىنىڭ ديرەكتورى ع. شالقىمباەۆ تۇرعىن ءۇيدىڭ قولجەتىمدىلىگى تۋرالى بانك شارتتارى جايلى بايانداسا، تالدىقورعانداعى مۇمكىندىگى شەكتەۋلى بالالارعا ارنالعان «بايتەرەك» وڭالتۋ ورتالىعىنىڭ دەفەكتولوگ مۇعالىمى ا. ءنۇسىپجانوۆا سالىق جەڭىلدىگىنە ىلىنەتىن ازامات رەتىندە وي قوستى.

سونىمەن قاتار تالدىقورعان پوليتەحنيكالىق كوللەدجىنىڭ ديرەكتورى ەرقات مۇقاجانوۆ، الماتى وبلىستىق «اتامەكەن» كاسىپكەرلەر ۇلتتىق پالاتاسىنىڭ ديرەكتورى ن. ابىلشايىقوۆ پەن «تالدىقورعان قالاسى گاز ءبولۋ جۇيەسىنىڭ قۇرىلىسى» جوباسىنىڭ جەتەكشىسى ا. پەتلين ءسوز سويلەپ، ويلارىن ورتاعا سالدى.

س.نامازشاموۆا

Abai.kz

12 پىكىر