ءمادينا سادۋاقاسوۆا: «باقىتتى ايەلمىن دەپ ايتا المايمىن...»
كەشەگى قىز... ەمەسپىن
- ءمادينا، مىناۋ قىتىمىر ءومىر ادامدى ارقاشان كۇرەسكە جەتەلەپ وتىرادى عوي. ەندەشە، ماحاببات مۇيىسىنەن سەن تۋرالى جاڭالىق ەستىر كۇن قاشان؟
- جاۋابىمدى ءبىر كورىنىس ارقىلى ايتايىن... بىردە «الماتى - مەنىڭ العاشقى ماحابباتىم» دەگەن كونتسەرتتىك باعدارلاما «تاقيالى پەرىشتە» فيلمىنىڭ جەلىسىنە ۇقساتىلىپ قويىلدى. سوندا ءارتىستىك وبرازعا ەنگەن ناعيما ەسقاليەۆا «ۇلى» مارات وسپانوۆقا قىز ىزدەپ، ءان سالىپ تۇرعان مەنەن: «ءمادينا، ءسىزدىڭ تۇرمىسقا شىققىڭىز كەلە مە؟!» - دەپ سۇرايدى. «ارينە، كەلەدى!» - دەيمىن مەن. «ەندەشە، مەنىڭ ۇلىم بار عوي...» - دەيدى ناعيما. «كەشىرىڭىزشى، مەنىڭ وعان ەشقانداي ۋاقىتىم جوق»، - دەپ، جۇگىرىپ كەتىپ قالامىن. كوردىڭىز بە، مەنىڭ قازىرگى جاعدايىم ءدال وسى كورىنىسكە ساي كەلەدى...
- بىراق ۋاقىتىم جوق دەپ جۇرگەن كەزدە، جاستىق شاق دەگەن قۇرعىر زىمىراپ وتە شىقپاي ما...
- ارينە، تابيعات زاڭىنا دەر كەزىندە ىلەسىپ، جارتىڭدى تاۋىپ، بالالى-شاعالى بولعاندى كىم ويلامايدى؟ مەن دە ويلايمىن. ويتكەنى مەن كەشەگى 20-25 جاسار قىز ەمەسپىن... بۇعان دەيىنگى كۇيەۋىم تابيعاتىما، جانىما جاقىن بولعاننان كەيىن ومىرلىك سەرىگىم دەپ سەنگەن ەدىم. بىراق ادام ويلاعانىمەن، اللا شەشەدى دەگەن راس ەكەن. ءوز كەلىسىمىمىزبەن ەكى جاققا كەتتىك. ەندىگى جەردە وتكەنىمدى ۇمىتىپ، جاڭا ءومىردى باستادىم. ويتكەنى 2010 جىلى بۇل تاقىرىپ مەن ءۇشىن مۇلدە جابىلدى.
كەشەگى قىز... ەمەسپىن
- ءمادينا، مىناۋ قىتىمىر ءومىر ادامدى ارقاشان كۇرەسكە جەتەلەپ وتىرادى عوي. ەندەشە، ماحاببات مۇيىسىنەن سەن تۋرالى جاڭالىق ەستىر كۇن قاشان؟
- جاۋابىمدى ءبىر كورىنىس ارقىلى ايتايىن... بىردە «الماتى - مەنىڭ العاشقى ماحابباتىم» دەگەن كونتسەرتتىك باعدارلاما «تاقيالى پەرىشتە» فيلمىنىڭ جەلىسىنە ۇقساتىلىپ قويىلدى. سوندا ءارتىستىك وبرازعا ەنگەن ناعيما ەسقاليەۆا «ۇلى» مارات وسپانوۆقا قىز ىزدەپ، ءان سالىپ تۇرعان مەنەن: «ءمادينا، ءسىزدىڭ تۇرمىسقا شىققىڭىز كەلە مە؟!» - دەپ سۇرايدى. «ارينە، كەلەدى!» - دەيمىن مەن. «ەندەشە، مەنىڭ ۇلىم بار عوي...» - دەيدى ناعيما. «كەشىرىڭىزشى، مەنىڭ وعان ەشقانداي ۋاقىتىم جوق»، - دەپ، جۇگىرىپ كەتىپ قالامىن. كوردىڭىز بە، مەنىڭ قازىرگى جاعدايىم ءدال وسى كورىنىسكە ساي كەلەدى...
- بىراق ۋاقىتىم جوق دەپ جۇرگەن كەزدە، جاستىق شاق دەگەن قۇرعىر زىمىراپ وتە شىقپاي ما...
- ارينە، تابيعات زاڭىنا دەر كەزىندە ىلەسىپ، جارتىڭدى تاۋىپ، بالالى-شاعالى بولعاندى كىم ويلامايدى؟ مەن دە ويلايمىن. ويتكەنى مەن كەشەگى 20-25 جاسار قىز ەمەسپىن... بۇعان دەيىنگى كۇيەۋىم تابيعاتىما، جانىما جاقىن بولعاننان كەيىن ومىرلىك سەرىگىم دەپ سەنگەن ەدىم. بىراق ادام ويلاعانىمەن، اللا شەشەدى دەگەن راس ەكەن. ءوز كەلىسىمىمىزبەن ەكى جاققا كەتتىك. ەندىگى جەردە وتكەنىمدى ۇمىتىپ، جاڭا ءومىردى باستادىم. ويتكەنى 2010 جىلى بۇل تاقىرىپ مەن ءۇشىن مۇلدە جابىلدى.
- ءبىر سۇحباتىڭىزدا: «مەن باقىتتى ءانشىمىن، بىراق باقىتتى اداممىن دەي المايمىن»، - دەگەن ەكەنسىز. بۇل پىكىرىڭىزدىڭ سىرى نەدە؟
- كەيبىرەۋلەر «ادام باقىتى» مەن «ايەل باقىتى» دەگەندى ءبىر قالىپقا سالىپ قارايدى. نەگىزىندە، ەكەۋى ەكى بولەك تۇسىنىك بولسا كەرەك. ول جەردە مەن: «باقىتتى ءانشىمىن، باقىتتى اداممىن»، - دەگەن ەدىم. سەبەبى، ءوز قازاقستانىمدا ءومىر ءسۇرىپ جاتىرمىن. اتا-انام، باۋىرلارىم امان-ەسەن، ءوز تىرلىكتەرىن ىستەۋدە. اينالام تولعان - تانىمال ادامدار. ولارمەن تىلدەسكەننىڭ ءوزى ءبىر باقىت بولسا، بۇدان قالاي سەرپىلمەيسىڭ؟! سونداي-اق قۇداي ماعان كورىكتى كەيىپتى دە، ادەمى ءۇندى دە بەرە سالعان! دەمەك، ەر ادامدار قارامايدى ەمەس - قارايدى، ءسوز ايتپايدى ەمەس - ايتادى. جاسىراتىن نەسى بار، مەن قازىر ايەل رەتىندە جالعىزبىن. ءوز جارتىمدى كەزدەستىرە الماي جۇرگەندىكتەن، باقىتتى ايەلمىن دەپ ايتا المايمىن.
- ەندەشە، قازاقتا نار تۇلعالى ازاماتتار كوپ قوي، جارتىڭىزدى قانداي كەيىپتە كورگىڭىز كەلەدى؟
- بۇرىن مەن سۇيگەنىم مىناداي بولسا دەپ، وزىمشە ولشەم جاسايتىنمىن. ال ءومىر كورگەن سوڭ، مۇنىڭ بارلىعىنىڭ تۇككە تۇرمايتىنىن تۇسىنەدى ەكەنسىڭ. مەنىڭ جارتىمدا اكەمە ۇقساس قاسيەتتەر بولسا دەيمىن. سەبەبى، اكەم وتە شىنايى، ەڭبەكقور، تازا جان. وتباسىنا، تىرلىگىنە جان-جۇرەگىمەن بەرىلگەن. ءالى كۇنگە اكە-شەشەم ءبىر-ءبىرىن جاقسى كورەدى. سوندا ءبىز ولارعا قاراپ، «ەسكىرمەگەن ماحاببات» دەپ كۇلەمىز.
- جۋىقتا عالىمدار ەرلى-زايىپتىلار جۇبىن تاڭدايتىن ەرلەر ەمەس، ايەلدەر ەكەنىن دالەلدەپتى...
- ادام پسيحولوگياسىن تۇپكىلىكتى ءبىلۋ مۇمكىن ەمەس. ول ەشقاشان دالەلدەنبەيدى. ارينە، ءوز باسىم، سۇيمەگەن اداممەن تەك وتباسىن قۇرۋ ءۇشىن بىرگە بولا المايمىن. ياعني مەن وعان، ول ماعان عاشىق بولعان كەزدە عانا قوسىلامىن. ال ماحابباتتا ءسۇيۋ - ءبىر بولەك، ارى قاراي ءومىر سۇرە الۋ - باسقا جاعداي.
جۇلدىز - ماعان سۋىق
- جاڭا جىل باستالدى، جاڭا جوسپارلار قانداي؟
- ءبىر قىزىعى، مەنىڭ جوسپارلارىم اياق استىنان قۇرىلىپ جاتادى. دەگەنمەن ەڭ ءبىرىنشى كەزەكتە ازيادانىڭ اشىلۋىنا كوممەنتاتور رەتىندە قاتىسۋىم مۇمكىن. ال كونتسەرتتىك باعدارلامادا ءانىن پاۆەل لي، ءسوزىن اسقار دۇيسەنبى جازعان «قازاق جاستارىنىڭ ءانۇرانى» ءانىن ورىندايمىن.
- جاڭا جىل قارساڭىندا «سەرپەر» جاستار سىيلىعىنىڭ يەگەرى اتانىپسىز، قۇتتى بولسىن!
- راقمەت! بۇل جەتىستىك 2010 جىلداعى اتقارعان جۇمىستارىمنىڭ باعاسى ىسپەتتەس. ويتكەنى ونەر جولىندا جۇرگەنىمە 15 جىلداي ۋاقىت بولىپتى. بۇل بىرەۋگە از، بىرەۋگە كوپ. بىلتىر استانادا «اياۋلى ارمان» دەگەن اتپەن العاشقى كونتسەرتىمدى وتكىزدىم. «ەكى جۇلدىزعا» قاتىسىپ، ءتاجىريبە الدىم. سپورتشىلار قانداي بولادى دەۋشى ەم، ونى جوبا بارىسىندا باقىت سارسەكباەۆ ارقىلى ءبىلدىم. ول وتە تاماشا ازامات ەكەن. شانحايدا وتكەن بۇكىلالەمدىك كورمەدە ونەر كورسەتتىم. ال قاراعاندى قالاسىندا قاراقات ءابىلدينا ەكەۋمىز «ال، قۇربىم» اتتى كونتسەرت بەردىك. وسىنداي ەستە قالارلىق ساتتەر كوپ بولدى.
- ءسىزدىڭ كەيبىر گازەت-جۋرنالدارعا وكپەڭىز بار ەكەن...
- قازىر تەك باسىلىمدار عانا ەمەس، تەلەارنالار دا انشىلەردەن ءبىر ىلىك ىزدەيتىن سياقتى. ءبىزدى حالىقپەن بايلانىستىرىپ وتىراتىن جۋرناليستەر ەمەس پە؟ ولاردىڭ كەيدە بولعان نارسەنى بۇرمالاپ جاريالايتىندارى ۇنامايدى...
- ماسەلەن...
- ايگۇل يمانباەۆانىڭ تۋعان كۇن كەشى بولدى. سوندا وتىرعاندا، ايتەۋىر ءبىر ءسوزىمدى ءىلىپ الىپ: «ماديناعا ايگۇلدىڭ تۋعان كۇنى ۇناعان جوق»، - دەپ جازىپ جىبەرىپتى. ال بۇل جاعداي ايگۇل ەكەۋمىزدىڭ ارامىزدا تۇسىنىسپەۋشىلىك تۋدىردى. سونداي-اق، ءوتكەندە ءبىر جۋرنال «مەن ءمادينا ءسادۋاقاسوۆامەن ويانام» دەگىزىپ، ايقىندى جالاڭاش كۇيىندە شىعارىپ قويىپتى. مۇنداي جوقتان بار جاساعان سەنساتسيانىڭ كەرەگى نە؟
- «جۇلدىز اۋرۋىن» 18 جاسىڭىزدا باسىڭىزدان وتكەرىپسىز، «ايىعۋ» قيىن بولعان جوق پا؟
- 1999 جىلى اۋىلدا جۇرگەندە توپتى جارىپ، رەسپۋبليكالىق «جاس قانات» بايقاۋىندا باس جۇلدەنى جەڭىپ الدىم. ەلگە ورالعانىمدا، جەرگىلىكتى تەلەارنالار كۇندىز-ءتۇنى مەنى كورسەتتى. اكىمدىك قىزمەتكەرلەرى كۇتىپ الىپ، العىستارىن ايتىپ، سىيلىقتارىن بەرىپ اى. سول جىلى قىزىلوردا وبلىسىنىڭ «جىل ادامى» اتاعىن الدىم. مۇنداي جاعدايدا 18 جاستاعى قىزدىڭ باسى اينالماعاندا قايتسىن. قايدا بارسام - ەل تانيدى، ال تانىماعاندارعا رەنجيتىنمىن. «جۇلدىز اۋرۋى» دەگەن وسى ەكەن. بار جەتىستىك ءبىر ساتتە ءۇيىلىپ-توگىلگەندە، كىمدە-كىم وسى كەزەڭدى باستان كەشەدى دەپ ويلايمىن. مەنىڭشە، سول ءساتتەردەن ەشكىمدى رەنجىتىپ الماي، ءوزىڭدى-ءوزىڭ «جۇلدىز» سەزىنىپ ءوتىپ كەتۋ كەرەك. ال جاستىق شاقتاعى «جۇلدىز اۋرۋى» جالعاسا بەرسە، ادامنىڭ پسيحولوگيالىق اۋىتقۋعا ۇشىراۋى مۇمكىن.
- ال قازىر ءوزىڭىزدى «جۇلدىزبىن» دەپ تولىق ايتا الاسىز با؟
- ءوزىمدى «جۇلدىز» دەپ اتالاتىندارعا جاتقىزعىم كەلمەيدى. ياعني جۇرت الدىندا مەنى «جۇلدىز» دەگەننەن گورى، «تانىمال ءانشى» دەپ اتالعاندى ۇناتامىن. ويتكەنى جۇلدىز كوكتە، بىراق ونىڭ جانى جوق. سۋىقتىق جانسىز نارسەگە ءتان. ال مەنىڭ جانىم، جۇرەگىم بار. ادامدارعا جىلى نۇر، شۋاق سىيلاعىم كەلەدى. ەندى «جۇلدىزداي جارقىراۋعا» كەلسەك، مەن ۇنەمى جارقىراپ تۇرامىن دەپ ايتا المايمىن. ساحنادان تىس ۋاقىتتا بەتىمە ەش بوياۋ جاقپاي، قاراپايىم جۇرگەندى ۇناتامىن. جۇمىس كيىمىمدى كيىپ، كولىگىمدى تازالايمىن. ال كوپشىلىك ورتالارعا، ساحناعا «ءمادينا سادۋاقاسوۆا» بولىپ جارقىراپ شىعامىن!
- «بالانىڭ جاقسى بولۋى - ناعاشىدان» دەيدى. ءسىز مۇقاعاليدىڭ قاراساز جۇرتىنا جيەن ەكەنسىز...
- انامنىڭ ەسىمى - كۇلتاي. بالاباقشادا تاربيەشى بولىپ قىزمەت اتقارادى. اقىننىڭ بارلىق ولەڭىن جاتقا بىلەدى. تاربيەلەنۋشىلەرى بايقاۋلاردىڭ جۇلدەسىنە يە بولىپ وتىرادى. ال ناعاشىلارىمنىڭ سول وڭىردەن ەكەنىن ماقتانىشپەن ايتقانىممەن، قاراسازعا ءالى بارعان ەمەسپىن. ول جەردەن شاقىرتۋ كۇتپەيمىن، ءوزىم بارۋىم كەرەك. جاسىراتىنى جوق، ول جاقتا كونتسەرت قويۋعا سەسكەنىپ تە ءجۇرمىن. كەشىمدى كىشىگىرىم زالدا ەمەس، تابيعات اياسىندا وتكىزگىم كەلەدى. دەگەنمەن رەپەرتۋارىمدا ماقاتاەۆتىڭ ءبىر-اق ءانى بار ەكەن، ۇلكەن جيناق جاساپ الما-يىنشا، ول ولكەگە بارا المايمىن.
- اجارىڭىزدى اشىپ، حالىققا تانىتقان «ماحاببات جالىنى» ءانى ەكەنىندە داۋ جوق. بىراق سول انىڭىزگە تۇسىرىلگەن بەينەبايان وزىڭىزگە ۇناي ما؟
- ادامنىڭ كوڭىلى ەش نارسەگە تولمايدى ەكەن. بالكىم، جاراتىلىس سولاي شىعار. بەينەبايانعا ۇڭىلسەم، سول كەزدەگى دەڭگەيىمدى كورەم. دەگەنمەن كەشەگى ءماديناعا قاراپ، ىستىق ساعىنىش تەربەيدى جانىمدى. ال بۇگىنگى تاڭدا مەن - مادەنيەتتى، كوركەم، ءبىلىمدى، بىلىكتى ورتادا جۇرگەن باسقا ءمادينامىن. شەگىمنەن شىقپاي، ىلعي جيناقتالىپ جۇرەمىن. ويتكەنى تىڭدارماندارعا، ءتىپتى كەكىل قويىپ ەلىكتەيتىن كىشكەنتاي قىزدارعا ۇنەمى ءوز دەڭگەيىمدە كورىنۋىم كەرەك.
اۋىلعا جانىم اشيدى
- ال بىزدەگى شوۋ-بيزنەسكە كوڭىلىڭىز تولا ما؟
- مەنىڭشە، ەسترادالىق شوۋ-بيزنەستىڭ مادەنيەتى وتە جوعارى. ال مادەنيەتتىڭ نەگىزى سىيلاستىقتا جاتىر. ءار ءانشىنىڭ ءوز ورنى، ءوز اتى بار. ياعني «ۇلكەندى - ۇلكەن، كىشىنى - كىشى» دەپ قادىرلەي الاتىنىمىزعا سەنىمىم مول. تەك قانا مەملەكەت تاراپىنان ۇلكەن كونتسەرت ۇيىمداستىرىلمايتىنىنا ناليمىز.
- ونەر يەلەرى ءۇشىن مەملەكەت تاراپىنان جاسالاتىن قامقورلىقتىڭ سالماعى قانداي؟
- ەشقانداي كومەكتى كورىپ جاتقان جوقپىز. ءار ءانشى ءوز بەتىمەن ءجۇر: «سەن قايدا ءجۇرسىڭ»، «ءۇي-جايىڭ، جاعدايىڭ قالاي»، «قايدا تۇرىپ جاتىرسىڭ» دەپ، ەشكىم دە سۇرامايدى. ايتەۋىر ءبىر قۋاناتىنىمىز - ونەر ادامدارىنا كەڭشىلىك بەرىلگەن. نە ىستەگىمىز كەلەدى، سونى جاسايمىز. كەيدە ويلايمىن: بالكىم، قاجەتىمىزدى ءوزىمىز سۇرامايمىز. «جىلاماعان بالاعا...» دەگەن بار عوي. مەن ازداپ جۋاستاۋ قىزبىن. ەگەر باتىلدىق تانىتىپ: «ماعان ءبىر بولمە بەرىڭىزشى» نەمەسە «كونتسەرت وتكىزگىم كەلەدى»، - دەسەم، ەشكىم ماعان قارسى بولمايتىنىنا، كومەكتەسەتىنىنە سەنەمىن.
- قوعامنىڭ ءبىر مۇشەسى رەتىندە قانداي جاعدايعا بەيجاي قاراي المايسىز؟
- اۋىل ماسەلەسىنە! ول ماڭايداعىلارعا كوڭىل ءالى دۇرىس بولىنبەيدى. ونى گاسترولدىك ساپار بارىستارىندا كورىپ، ءبىلىپ ءجۇرمىز. جۇمىس ىستەيمىن دەگەنگە قالادا ورىن بار، ال اۋىلدا... ەگەر قولىمدا بيلىك بولسا اۋىل تۇرمىسىن گۇلدەندىرۋگە، مەملەكەتتىك قىزمەتتەگى ادامداردىڭ ايلىعىن كوتەرۋگە كۇش سالار ەدىم.
- «اتىمدى قازاق دەسە، ماقتانامىن» دەيتىندەي، ۇلت رۋحى كوتەرىلدى مە؟ ءتىل ماسەلەسى شەشىمىن تاپتى دەي الاسىز با؟
- اعالارىم: «كەزىندە قوعامدىق كولىكتەرگە كىرگەندە قازاقشا سويلەۋگە ۇيالۋشى ەدىك، ەندى قازاقتار ورىسشا سويلەسسە، الا كوزبەن قارايتىن شاققا جەتتىك»، - دەپ وتىرادى.
بۇگىنگى كۇندى كەڭەس ۇكىمەتىمەن سالىستىرۋ مۇمكىن ەمەس. قازاق ءتىلىن ۇيرەنۋگە دەگەن قىزىعۋشىلىق ورىستاردا دا پايدا بولا باستادى. ولاردان ايىرماشىلىق بولۋى ءۇشىن، انا ءتىلىمىزدى جاي عانا ەمەس، تاريحىمىزعا، دىلىمىزگە، دىنىمىزگە ءمان بەرىپ، قۇنارلى سويلەۋىمىز كەرەك. بىزدە: «مەن قازاقپىن! قازاقستان دەگەن مەملەكەتتە قازاق دەگەن ءتىلىم بار! جەتى اتامدى بىلەم!» - دەگەن ماقتانىش بار. بۇل - رۋحتىڭ ويانۋى!
- ساحنا سىرتىنداعى كورەرمەنگە ءانشىنىڭ ىشكى دۇنيەسى بەيمالىم. بىراق ءانشى اقبوتا كەرىمبەكوۆا: «ءورىستىلدى انشىلەر مەن قازاقتىلدى انشىلەر ءبولىنىپ العان. ولار ءبىزدى «مامبەت» دەپ اتايدى»، - دەيدى. شىنىمەن، سولاي ما؟
- مۇنداي جاعدايلار بولدى. جەيتىن نانى دا، تىڭدارمانى دا ءبىر - حالىق ەركەسىمىز. ونەرىمىزدى ءبىر ساحنادا كورسەتە تۇرىپ، «بولىنۋشىلىك» دەگەندى تۇسىنبەيمىن. قازاقتىلدى انشىلەرگە «مەنسىنبەۋشىلىك» بار دەگەنگە دە ەش نەگىز جوق. بۇل پىكىردى انشىلەر وزدەرى شىعارىپ العان. ءورىستىلدىلەر قازاقشا ءان ايتۋعا قىزىعادى، تالپىنادى. ءوزارا سىيلاستىق، ءتىل تابىسۋ بولعان جەردە قايشىلىق تۋىنداۋى مۇمكىن ەمەس. ماسەلەن، مەنىڭ رەپەرتۋارىمدا ورىسشا «دالەكو» دەگەن ءبىر عانا ءان بار ەكەن، «مامبەت» دەسە، مەن-اق بولايىن وندا...
- «تەلەجۇرگىزۋشىلىكتە ءمادينانىڭ بويىندا جاساندىلىق بايقالادى» دەگەن سىني پىكىرگە قانداي ءۋاج ايتاسىز؟
- بۇل - «تاڭعالماڭىز» باعدارلاماسىنا بايلانىستى ايتىلعان پىكىر. باسىندا ويناقى تۇردە، باسقا وبرازعا ەنۋدە ءبىرشاما قيىنشىلىقتار بولعانى راس. كاسىبي اكتەرلەردىڭ جانىندا جاساندىلىقتىڭ بايقالماي قالۋى مۇمكىن ەمەس. بىراق ازامات ساتىبالدى مەن جاناتبەك بايتەكوۆتىڭ ارقاسىندا بويىمداعى بۇل قاسيەتتى مۇلدە جويدىم. باعدارلامادا وسى ەكى ازاماتتىڭ تيگىزگەن كومەگى كوپ بولدى.
- ءانشى مەيرامبەك بەسباەۆ ەكەۋىڭىز دۋەت قۇرماقشى ەدىڭىزدەر...
- كەزدەسكەندە «دۋەتىمىز قاشان بولادى» دەپ كۇلىپ قويامىز. «مۇزارت» - قازاق ەلى ءۇشىن عاسىردا ءبىر بولاتىن توپ ەمەس پە؟ ال قازىر مەيرامبەكتىڭ دە، مەنىڭ دە ونەرىمىزدىڭ جانىپ تۇرعان شاعى. دۋەت، ارينە، بولادى. ازىرشە ۋاقىتىمىز سايكەس كەلمەي جاتىر.
- بولاشاقتا كىتاپ جازاتىن ويىڭىزدىڭ بار ەكەنىن بىلدىك. تاقىرىبى قانداي؟
- بۇل «تانىمال تۇلعالارمەن كەزدەسكەندە العان اسەرلەرىمدى كىتاپ ەتىپ جازسام» دەگەن قيالدان تۋعان وي عانا ەدى. ءتىپتى ۇيالىپ قالدىم عوي! ونەر يەلەرىنىڭ قيالعا بەرىلەتىن ساتتەرى كوپ ەمەس پە؟! مەن ماعجان جۇماباەۆتىڭ تۋىندىلارىن وتە جاقسى كورەمىن. ياعني سەزىمگە جاقىن، ليريكانى، رومانتيكانى سۇيەتىن نازىك جانمىن. سونداي-اق جاي عانا ءانشى ەمەس، كاسىبي پسيحولوگپىن. كەز كەلگەن ادامنىڭ جان-دۇنيەسى مەنى ەرەكشە قىزىقتىرادى. مەيلى، ول باستىق، مەيلى، ماسكۇنەم بولسىن... كوپتەن بەرى تەلەجۇرگىزۋشى رەتىندە كورىنىپ جۇرگەنىم بەلگىلى. جۇمىسىما كوپتەگەن سىن دا ايتىلدى. سونداعى تۇيگەنىم: ماعان ءبىلىم جەتىسپەيدى ەكەن. قازىر ءبىلىمىمدى تولىقتىرا ءتۇسۋ ءۇشىن ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە «راديو جانە تەلەجۋرناليست» ماماندىعى بويىنشا وقىپ جاتىرمىن. بۇيىرسا، وسى جىلى ديپلوم الامىن.
- گازەت وقىرماندارىنا نە ايتار ەدىڭىز...
- قازاقستاننىڭ ءاربىر ادامى جاقسى ءومىر سۇرۋگە لايىقتى. جاڭا جىلدا جاقسىلىقتارعا ءۇمىت ارتىپ، بيىكتەرگە ۇمتىلا بەرەيىك. وتىرىك-وسەككە ۇرىنبايتىن، شىندىقتىڭ مايىن تامىزاتىن باسپاسوز بەتتەرى جاقسى جاڭالىقتارعا تولا بەرسىن!
اڭگىمەلەسكەن -
ارداق يمانبەكقىزى،
«D»
«وبششەستۆەننايا پوزيتسيا»
(پروەكت «DAT» № 02 (85) 19 قاڭتار 2011 جىل.
