جەكسەنبى, 9 مامىر 2021
قۇيىلسىن كوشىڭ 3576 3 پىكىر 10 ءساۋىر, 2018 ساعات 10:11

ارعى بەتتەگى اعايىننىڭ ءحالى تىم مۇشكىل

وتكەن جىلى «الماتى اقشامى» گازەتىنە:«تاريحي وتانىنا ورالعان قانداستا­رىمىزعا ورالمان مارتەبەسى بارلىق ايماقتا بەرىلەدى. ورالمان مارتەبەسىن مەملەكەتتىك قىزمەت كورسەتۋ ستاندارتىنا سايكەس تولىق قۇجاتتار توپتاماسىن وتكىزگەننەن كەيىن 5 جۇمىس كۇن ىشىندە الا الادى. ءبىر جىلعا بەرىلەتىن ورالمان مارتەبەسىن العان ازامات تۇراقتى تۇرۋعا رۇقسات العاننان كەيىن قازاقستان ازاماتتىعىنا قۇجات تاپسىرىپ، جەڭىلدەتىلگەن تارتىپپەن 3 ايدىڭ ىشىندە قازاقستان رەسپۋبليكاسىنىڭ ازاماتتىعىن الادى. ەگەر ورالمان مارتەبەسىن العان ازامات ءبىر جىل ىشىندە ازاماتتىق الماسا، «حا­لىقتىڭ كوشى-قونى تۋرالى» زاڭىنا سايكەس، ورالمان مارتەبەسىنىڭ مەرزىمى توقتاتىلادى دا، ول ەتنيكالىق قازاق ساناتىنا قوسىلىپ، جەڭىلدەتىلگەن تارتىپپەن ازاماتتىق الا المايدى»،-دەگەن ماقالا جاريالانعان بولاتىن. سونى كورىپ قۋانىپ، الاقايلاپ بوركىمىزدى اسپانعا اتىپ، اعايىننان ءسۇيىنشى سۇراعان بولاتىنبىز.

الايدا، كوتەرىلگەن كوڭىلىمىز ويدا-جوقتا سۋ سەپكەندەي باسىلىپ، ەسىمىزدەن تاندىق. نەگە دەيسىز بە، ازاماتتىق ءۇش اي ىشىندە بەرىلسە، الىستان كەلگەن اعايىن ءۇشىن ۇلكەن مارتەبە ەمەس پە. بىراق سوزگە بار دا، ىسكە جوق، كوش-قونعا جاۋاپتى قۇزىرلى ورگان قىزمەتكەرلەرى جاۋاپسىزدىق تانىتىپ، ءتۇرلى سىلتاۋلار تاۋىپ اعايىنداردى تابانىنان توزدىرىپ جاتقانى جاسىرىن ەمەس. اتاجۇرتىنا القىنىپ جەتكەن اق بۇلاقتارعا بوگەت بولىپ، كوتەرەمگە كولدەنەڭ بولۋدى قاشان دوعارادى، ول جاعى بەيمالىم.

ارعى بەتتەگى اعايىننىڭ ءحالى تىم مۇشكىل. قورعانسىزدىڭ كۇيىن كەشىپ، اجداھانىڭ اۋىزىنا جۇتىلىپ بارا جاتقان قارا ورمان قازاقتىڭ قاسىرەتى تىم اۋىر.

ازاماتتىق الۋ ءۇشىن بارلىق قۇجاتتى ەرەجەگە ساي  تاپسىرىپ، ەندى سول ازاماتتىق كۋالىگىن كۇتۋدەن زاۋرەنى سارعايىپ، سەگىز اي بويى سەرگەلدەڭ كۇي كەشىپ جۇرگەن باۋىرلاردىڭ سانى از ەمەس. مۇڭ تورلاعان جانارلارىنا قاراپ جانىڭ اۋىرادى. وسىندايدا «ازاتتىعىمىز بەن قازاقتىعىمىز قايدا؟»،-دەگەن ساۋالدىڭ ساۋىسقانى شىقىلىقتايتىنىن قايتەسىڭ. ءۇش اي ەمەس، التى، جەتى، سەگىز اي كۇتىپ جۇرگەندە، قولىنداعى قۇجاتتارىنىڭ جارامدىلىق مەرزىمىنىڭ وتۋىنە بايلانىستى ىستەپ جاتقان جۇمىسىنان بىراق كۇندە قۋىلسا، جالداپ تۇرعان پاتەرىنەن شىعارىلىپ، شالعاي اۋىلداردان قالاعا بارىپ-قايتۋعا جول بيلەتىن الۋعا قاراجاتى مەن قۇجاتى جوق ساندالىپ سارساڭ بولىپ ءجۇرۋى وڭاي ما. سۋعا  كەتكەن اقسوڭكە سالىندىداي باعدارسىز كۇي كەشىپ، جانارلارى جاستان قۇرعاماي قۇجاتسىز «كوسموستا» جۇرگەن قانداستارىمىزعا وسىندايدا قامقورلىق تانىتاتىن كىم بار مىنا جالعان دا؟!

حاكىم ابايدىڭ "سەگىز اياق" ولەڭىندەگى:

... ءبىرىڭدى، قازاق، ءبىرىڭ دوس

كورمەسەڭ، ءىستىڭ ءبارى بوس.

مالىڭدى جاۋعا،

باسىڭدى داۋعا

قور قىلما، قورعا، تاتۋلاس.

وتىرىك، ۇرلىق،

ۇكىمەت زورلىق

قۇرىسىن، كوزىڭ

ۇياتىڭ، ارىڭ ويانسىن،

بۇل ءسوزىمدى ويلانسىن»،-دەپ، كەلەتىن وسى ءبىر عيزاتىلى ءھام كىرشىكسىز جولدار ەرىكسىز ويعا ورالادى. ازاماتتىق الا الماي، ەكى قولىنا ءبىر ەڭبەك تابا الماي قينالىپ جۇرگەن قانداستارىمىزدىڭ جانايقايىن قۇزىرەتتى شەكپەندىلەر تىڭداسا ەكەن. سان عاسىر ارمان بولعان اتاجۇرتىنا تالىپ جەتىپ تابان تىرەگەن باۋىرلارىمىزدىڭ كوز جاسى بەيبىت زاماندا توگىلمەسە ەكەن.

ءسارۋار ساعىنىشباەۆ

Abai.kz

3 پىكىر