ەسىم تۋرالى...
وتكەن عاسىردىڭ 60-شى جىلدارىنان باستاپ داۋرەنى داۋىرلەپ، الەمگە اتاعى جايىلىپ، دۇركىرەگەن ءانشى بولىپتى. كرەملدىڭ ءوزى تامسانا تىڭداپ، كونتسەرتكە تاڭداپ قوسىپتى. باسىنا باق قونىپ، حالىقتىڭ الاقانىندا ءجۇرىپتى، تىڭداۋشىنىڭ قۇلاق قۇرىشىن قاندىرىپ، شەكسىز قوشەمەتىنە بولەنىپتى.
سۇلۋ داۋىس پەن ەرەكشە تالانتىنا ۇلكەن-كىشى، الىس-جاقىن تۇگەل ءتانتى ەكەن. قۇرىم حالىقتىڭ ىشىندە بايان اتتى بويجەتكەن دە بار زەيىنىمەن ءان تىڭداپ ءجۇرىپتى، بار سىرىن بالتاباي اعاسىمەن ءبولىسىپ. وسىدان شاڭىراقتا ءسابي تۋسا - اتىن ايتۋلى ءانشىنىڭ قۇرمەتىنە قويار ەدىم دەپ ىزگى ارمانىن ايالاي بەرىپتى.
ارادا ون جىلدان اسا ۋاقىت وتەدى. بويجەتكەن ءىنىلى بولىپتى. اۋىلدىڭ ۇلكەندەرى جيىلىپ، ءبىزدىڭ ۇيگە "باۋى بەرىك بولسىن" ايتىپ، ءتۇرلى ەسىم سايلاپ كەلگەن. سول كەزدە توپ الدىنا شىعىپ "قۇرمەتتى اپا-اتالار، بالاعا ء"مۇسىلىم" دەپ ات قويۋ - تالاي جىل كۇتكەن قۋانىش، سارعايعان ساعىنىش، ۇكىلەگەن ءۇمىتىم ەدى. رۇقسات ەتسەڭىزدەر، جولدى مەن الايىن؟" دەپتى. قىزدىڭ قالاۋى "بولسىن" دەپ شەشىپتى كوپشىلىك.
تىلەگى قابىل بولعان اپكەم مەنى جەتەلەپ مۋزىكا مەكتەبىنە اپارعان. مىقتى شەبەردەن تاڭداپ دومبىرا العىزعان. كوللەدج بەن كونسەرۆاتوريانىڭ تابالدىرىعىن اتتاتتى. سولاي جولىمىزدى مۋزىكا سالاسىنا بۇرعان. ماگوماەۆتاي بولماساق تا، ءانشىنىڭ اتى ۇلگى رەتىندە ۇنەمى ايتىلىپ، سانامىزدا جاڭعىرىپ تۇردى. اكەم ينتەرنەت دەگەن نىعمەتپەن دوس، مونيتورعا تەلمىرىپ ۇڭىلگەن كۇيى ءانشىنىڭ تالاي كونتسەرتى مەن ينتەرۆيۋىن قايىرا كورىپ، سوڭعى شىققان كىتابىن ءبىر دەممەن وقىپ، ەسكى كۋميرىمەن قايتا قاۋىشتى. العان اسەرىن دەرەۋ قارىنداسى بايانعا جەتكىزدى. سول جەردە ەكەۋىنىڭ دە جانارى جاساۋراپ، كوڭىلى بوساپ...
ءبىر كۇنى اكەم "شىراعىم، ءارى-بەرى جۇرگەندە جولىڭ تۇسسە، وسى ازاماتتىڭ باسىنا بارىپ دۇعا ەتشى" دەگەن. سول اماناتى بۇگىن ىسكە استى. ءازىربايجان حالقىنىڭ ايتۋلى ازاماتتارى جاتقان قالا ورتاسىنداعى كونە قورىمدا ايگىلى راشيد بەيبۋتوۆ، بيۋلبيۋل، گەيدار اليەۆ، اكەلى-بالالى مۋسليم ماگوماەۆتار جاتىر ەكەن. ەسىمى بەيتانىس قانشاما تۇلعالار...
ۇلتىن اسقاقتاتقان ۇل-قىزداردىڭ الدى ءاردايىم جارىق بولعاي.
ءمۇسىلىم امزە
Facebook-تەگى پاراقشاسىنان
