«Esquire» جۋرنالىنا سۇحبات بەرگەن ەركىن تاتىشەۆ اعاسىنىڭ قازاسى جايلى، ادىلدىك پەن شىندىق ىزدەگەن 14 جىل جايلى ايتىپ بەرىپتى. ءتىپتى، «تاتىشەۆتەرگە جوعارعى جاق نۇسقاۋ بەرىپ وتىر» دەگەن الىپ-قاشپا اڭگىمەگە دە جاۋاپ بەرگەن ەكەن.

«ايتەۋىر، بىزدىكىلەرگە جوعارى جاق ايتىپ، جول سىلتەپ بەرۋى كەرەك سياقتى كورىنەدى دە تۇرادى. ال بۇل جەردە قىلمىس بارى انىق. ۇيىمداسقان تۇردە كىسى ءولىمى جاسالدى. ونىڭ قۇرامىندا ءىرى مانساپتى ادامدار بولدى. ول ادامداردىڭ جەمقورلىق، ۇرلىق سەكىلدى باسقا دا قىلمىستارى ءوز باستارىنان جەتىپ ارتىلاتىنى تاعى راس»، - دەپتى ەركىن تاتىشەۆ.

ەركىننىڭ ايتۋىنشا، 2017 جىلى مۇراتحان توقماديدىڭ كۇندەلىگى تابىلعان ەكەن. توقمادي سول جەردە ەرجان تاتىشەۆتىڭ سەنىمىنە قالاي كىرۋى كەرەكتىگى مەن الداعى جوسپارلارى جايلى جازعان.

«تەرگەۋشىلەردىڭ وزدەرى اڭ-تاڭ بولدى. ءيا، قاتىرىپ ەشتەڭە جازباعان. توقمادي تۇرگەنوۆ ەمەس قوي ەندى. دەگەنمەن، ناقتى ۋاقىتى، اڭعا شىعۋى، بانكتەن نەسيە الۋى ت.س.س. جوسپارلارى جازىلعان»، - دەيدى مارقۇمنىڭ ءىنىسى.

ەركىننىڭ ايتۋىنشا، بۇلتارتپاس دالەلدەر كەلتىرىلگەن سوڭ، مۇراتحان توقماديگە كىناسىن مويىنداۋعا تۋرا كەلگەن. ءتىپتى، شىنايى تەرگەۋ، تەكسەرىس ەرجان تاتىشەۆتىڭ قازاسىنان 6 جىلدان كەيىن عانا قولعا الىنىپتى.

«2008 جىلى ماعىن وفيتسەرلەر كەلىپ: «ەركىن، ءبىز بۇل ءىستى تەرگەمەكپىز. بىلەمىز، بۇنىڭ ارتىندا كوميتەتتىڭ ادامدارى تۇرۋى مۇمكىن» دەدى. مەن سول كەزدىڭ وزىندە-اق، ءىستىڭ ارتىندا دۇتباەۆتىڭ تۇرعانىن سەزدىم. ول جەكە باستىڭ شارۋاسى ەمەس، وعان ەرجاندى ءولتىرۋ تۋرالى تاپسىرىس تۇسكەن. ول ءتىپتى 2002 جىلى ەرجاندى ولتىرۋگە بەكىنگەن. ول كەزدە ءابلازوۆ تۇرمەدە وتىرعان. بۇل وعان اليبي بولاتىن ەدى»، - دەيدى.

وعان قوسا، ەركىن تاتىشەۆ ءابلازوۆ، دۇتباەۆ جانە جاكىشەۆ ۇشتىگى جايلى دا ايتىپ بەرىپتى.

«دۇتباەۆ پەن جاكىشەۆ جاقسى دوس بولعان. سوسىن جاكىشەۆ دۇتباەۆ پەن ءابلازوۆتىڭ قارىم-قاتىناس ورناتۋىنا سەبەپشى بولدى. ول كەزدە مۇحتار قازاتومپرومدا قىزمەتتە ەدى. ءوزىنىڭ مانسابىن دا پايدالانعان»، - دەيدى تاتىشەۆ.

تاتىشەۆتىڭ تۋعاندارى نە ءۇشىن وسى كۇنگە دەيىن ۇندەگەن جوق؟ ەركىن باس پروكۋراتۋرا مەن ۇقك باسشىلىعىنا ازىردانىپ، ءىستى اشۋىن تالاپ ەتكەنى جايلى ايتتى.

«بۇل جەردە ماسەلە ءابلازوۆ ەمەس، دۇتباەۆ جايلى. ول ءابلازوۆتى قالقان قارۋى تۇتتى. وعان قانشا رەت كومەكتەستى. كۇيەۋبالالارىن جىبەردى. شىنىندا ۇقك بۇرىنعى باسشىسىنا ءىس قوزعاۋ ءۇشىن ادامعا باتىلدىق كەرەك. 2016 جىلى باسشىلىققا كارىم ءماسىموۆ كەلگەننەن كەيىن ءىستىڭ اۋانى وزگەرە باستادى. ءماسىموۆ ساياسي ەرىك-جىگەرى بار ادام. مەن قايتا شاعىمداندىم. «ءبىز كورەيىك. ءىستى قارايمىز» دەپ جاۋاپ بەردى ءماسىموۆ. ءارى قاراي، ۋاقىت پەن رەسۋرستىڭ، تەحنيكانىڭ، دالەلدەردى تابۋدىڭ جولى عانا قالعان. قۇدايعا شۇكىر، تاپتى. ال نە ءۇشىن ءولدىردى دەگەنگە كەلسەك، جاۋابى قاراپايىم. ول بارلىعىنان ايىرىلعان»، - دەيدى ەركىن.

ايتپاقشى، قايتىس بولعان ەرجان تاتىشەۆكە تۇرمەگە تۇسەر الدىندا ءابلازوۆ بتا بانكتى اۋدارىپ بەرىپ، كەيىن قايتارىپ بەرۋىن سۇراعان. وعان كونبەگەن ەرجاندى تاپسىرىپ بەرىپ ولتىرتكەن دەگەن بولجام ايتىلعان ەدى. ەركىن بۇل جايلى دا ءوز پىكىرىن ايتىپتى.

«بۇل مۇحتاردىڭ ءوزى تاراتىپ جۇرگەن قاۋەسەت. ول ساياسي سۇقيت. ول كەز كەلگەن فاكتىنى الىپ، وزىنە ىڭعايلاستىرىپ الادى. وتىرىك ايتۋدىڭ شەبەرى. ەرجان جايلى نە دەمەدى وسى كۇنگە دەيىن»، - دەيدى.

باۋىرىنىڭ قازاسى بولعان كۇن تۋرالى ەركىن بىلاي دەيدى:

«ەرجاندى مورالدى تۇردە كۇيدىرۋ تۋرالى  تاپسىرما بولدى. ادام شارشاعان كەزدە دەمالعىسى كەلەدى عوي. ال مەنىڭ باۋىرىم اڭشىلىقتى جاقسى كورەتىن. ال ول جاقتا قاقپان دايىن تۇرعان. ءتىپتى، مۇراتحانعا 2 ميلليون تولەگەن. اقشا قالتادا. ەندى ءىستى تىندىرۋ عانا قالعان»، - دەيدى ەركىن تاتىشەۆ.

«بۇل وقيعا جەلتوقساندا بولدى. ال قىركۇيەكتە مەنىڭ ۇستىمنەن جاسىرىن ءىس قوزعاپتى، دۇتباەۆ. ءسويتىپ، ەرجاندى ولتىرگەن سوڭ، مەنى بۇعاتتاماق بولعان عوي. مەن مۇنى ءتۇسىندىم. قازىر بىردەڭە دەسەم، ءبىتتى، كۇيىپ كەتەتىن ءتۇرىم بار. سوندىقتان، ۋاقىت كەلگەنىن كۇتىپ جاتتىم. بۇل جۇيەلى تۇردە، ەگجەي-تەگجەيلى ەسەپتەلگەن جۇمىس. بۇل تۋرالى مەن دە، مەنىڭ مارقۇم باۋىرىم دا بىلگەن جوقپىز. وسىنىڭ بارلىعىنىڭ ارتىندا دۇتباەۆ تۇردى. سوندىقتان، ءبىز ەرتەرەك تەرگەۋدى تالاپ ەتە المادىق. بۇل مۇمكىن ەمەس ەدى. ءبىز ادىلدىك ورناۋىن 14 جىل كۇتتىك»، - دەپ تۇيىندەيدى ەركىن تاتىشەۆ.

Abai.kz