سەنبى, 18 تامىز 2018
رۋحاني جاڭعىرۋ 3192 35 پىكىر 4 مامىر, 2018 ساعات 10:41

اسكەري شەرۋ. «مەن - قازاقپىن، بويىمداعى قان قازاق»

بيىل 7-مامىرعا ارنالعان وتان قورعاۋشىلار كۇنى قارساڭىنداعى اسكەري شەرۋ جىلداعىداي استانادا ەمەس، جامبىل وبلىسىنداعى «وتار» 40-اسكەري بازاسىندا وتەدى، دەپ حابارلايد «abctv.kz»

قازاقستان قارۋلى كۇشتەرىنىڭ جاۋىنگەرلىك شەرۋى استانادا ەمەس، جامبىل وبلىسىنداعى «وتار» 40-اسكەري بازاسىنىڭ اۋماعىندا وتەدى. قارۋلى كۇشتەردىڭ قۇرامالارى مەن اسكەري بولىمدەر قازىر بازا اۋماعىندا دايىندىق جۇمىستارىن جۇرگىزىپ جاتىر.

ەستەرىڭىزگە سالا كەتەيىك، ياعني 2013 جىلى ءدال وسى اسكەري بازادا وتان قورعاۋشىلار كۇنىنە ارنالعان جاۋىنگەرلىك شەرۋ ۇيىمداستىرىلدى. وعان 7 مىڭعا جۋىق جاۋىنگەر مەن 500-دەن استام اسكەري تەحنيكا جۇمىلدىرىلعان ەدى. شەرۋدە 86 اسكەري ۇشاق پەن تىكۇشاق، سونىمەن قاتار 400 بروندى تەحنيكا ۇرىس كەزىندەگى قيمىل-ارەكەتتەرىن كورسەتكەن. ال اسكەري ۇشقىشتار س-295 اسكەري ۇشاعىن تۇڭعىش رەت توپىراقتى الاڭعا قوندىردى.

ال بيىلعى جاۋىنگەرلىك شەرۋگە 3 مىڭنان استام سارباز، 300-دەن استام اسكەري تەحنيكا، 30-عا جۋىق اۆياتسيا تەحنيكاسى قاتىسادى. ارميالىق بولىمشەلەر اسكەري تەحنيكانىڭ زاماناۋي ۇلگىلەرىن ءىس جۇزىندە قولدانۋ تاسىلدەرىن كورسەتەدى.

بۇل قر قورعانىس مينيسترلىگىنىڭ ءباسپاسوز قىزمەتى تاراتقان رەسمي اقپارات.

ەندى وسىنىڭ الدىندا وتكىزىلگەن اسكەري پارادتارعا شولۋ جاسايىق:

2005 جىلى جەڭىستىڭ 60-جىلدىعىنىڭ قۇرمەتىنە اسكەري شەرۋ وتكىزىلدى. وعان 3 مىڭ اسكەري قىزمەتكەر، 130 اسكەري تەحنيكا جۇمىلدىرىلدى. بۇل شاراعا 934 مىڭ دوللار جۇمسالدى.

2009 جىلى وتكىزىلگەن ءۇشىنشى شەرۋ قازاقستان كونستيتۋتسياسىنىڭ 14 جىلدىعىنا ارنالدى. مۇندا قالىڭ كوپشىلىك 120 اسكەري تەحنيكانىڭ مۇمكىندىگى مەن قابىلەتىنە كۋا بولدى. اسكەري شەرۋگە مەملەكەت باسشىسى، جوعارعى باس قولباسشىسى نۇرسۇلتان نازارباەۆ قاتىستى. ال شەرۋگە قورعانىس ۆيتسە-ءمينيسترى، گەنەرال-مايور نۇرلان جولامانوۆ باسشىلىق ەتتى.

2011 جىلعى ءتورتىنشى شەرۋ ەل تاۋەلسىزدىگىنىڭ 20 جىلدىعىن اسپەتتەدى. «قازاق ەلى» مونۋمەنتى الدىندا وتكەن شەرۋدى العاش رەت ەل پرەزيدەنتى-قر قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ ءوزى قابىلدادى. بۇل شەرۋ اسكەري قىزمەتكەرلەردىڭ تۇڭعىش رەت جاڭا اسكەري كيىم ۇلگىسىن كيىپ شىعۋىمەن، بۇرىن-سوڭدى كورسەتىلمەگەن جاڭا اسكەري تەحنيكانىڭ پاش ەتىلۋىمەن جانە شەرۋگە مەرگەندەر جاساعىنىڭ، قۇرلىق اسكەرلەرى تاۋلى-اتقىشتار بريگادا­سى­نىڭ سونىمەن قاتار ايەل اسكەري قىزمەتشىلەردىڭ قاتىسۋىمەن ەستە قالدى.

2013 جىلى جامبىل وبلىسىنداعى «وتار» 40-شى اسكەري بازاسىندا وتكەن جاۋىنگەرلىك شەرۋ بەسىنشى شەرۋ بولىپ تىركەلدى. ول وسىعان دەيىنگى جانە كەيىنگى شەرۋلەردەن ەرەكشە بولدى. سەبەبى بۇعان دەيىنگى جانە كەيىنگى شەرۋلەردىڭ  بارلىعى مەرەكەلىك داتالارعا ورايلاستىرىلسا، بۇل شەرۋ جاۋىنگەرلەردىڭ وزدەرىنە ارنالدى.

2014 جىلعى التىنشى اسكەري شەرۋ دە «قازاق ەلى» مونۋمەنتىنىڭ الدىندا ءوتتى. شەرۋدىڭ سالتاناتتى مارشىنىڭ جاياۋ لەگىنە 2 مىڭعا جۋىق اسكەري قىزمەتشى، 2500 اسكەري، 70 اۆياتسيالىق تەحنيكا قاتىستى.

2015 جىلى ۇيىمداستىرىلعان جەتىنشى شەرۋ جەڭىستىڭ 70 جىلدىعىنا ارنالدى. ول بۇعان دەيىنگى شەرۋلەردەن اۋقىمدىلىعىمەن جانە مازمۇنىمەن دارالاندى. شەرۋ تاريحي جانە زاماناۋي بولىمدەردەن تۇردى. تاريحي بولىمگە 1941-1945 جىل­دار­داعى سوعىس تەحنيكاسىنىڭ 36 ءتۇرى قاتى­سسا، زاماناۋي بولىمدە قازاق­ستان ارمياسىنىڭ قولدانىستاعى قارۋ-جاراعى مەن اسكەري تەحنيكاسى كورسەتىلدى.

2017 جىلى قر قارۋلى كۇشتەرىنىڭ 25 جىلدىعىنا ارنالىپ وتكىزىلگەن سەگىزىنشى اسكەري شەرۋگە 5 مىڭعا جۋىق اسكەري قىزمەتشى، 300-گە جۋىق اسكەري تەحنيكا جانە اسكەري اۆياتسيانىڭ 80 ۇشاعى مەن تىكۇشاعى قاتىستى. بۇل ەل تاريحىنداعى ەڭ ءىرى شەرۋ بولدى.

بيىل وتەتىن 9-شەرۋ دە ەل نازارىندا. بۇعان الەۋمەتتىك جەلىلەر ارقىلى شەرۋگە دايىندىق كەزىندە ساربازدار شىرقاعان «مەن قازاقپىن» ءانىنىڭ جاپپاي تارالۋى جانە جەلى قولدانۋشىلارىنىڭ «بۇل شىن مانىسىندە جاۋىنگەرلەردىڭ جىگەرىن جانيتىن ءان» دەپ پىكىر ءبىلدىرۋى دالەل.

Abai.kz

35 پىكىر