رەسەيدىڭ رجەۆ قالاسىندا قازاقستاندا جاساقتالعان 100-ءشى جانە 101-ءشى اتقىشتار بريگاداسىنا ارنالعان مەموريالدىق كەشەن مەملەكەت باسشىسىنىڭ تاپسىرماسى بويىنشا كۇردەلى جوندەۋدەن سوڭ قايتا اشىلدى. جوندەۋ جۇمىستارى قازاقستاننىڭ رەسەيدەگى ەلشىلىگىنىڭ ۇيىتقى بولۋىمەن جانە اقتوبە وبلىسىنىڭ قارجىلاي قولداۋىمەن جۇرگىزىلدى.

رجەۆ قالاسىنداعى 100-ءشى جانە 101-ءشى جەكەلەگەن اتقىشتار بريگاداسىنا ارنالعان مەموريالدى تاقتانىڭ جالپى ۇزىندىعى 27 مەتردى قۇرايدى. ونىڭ ورتا تۇسىنا قازاق جەرىنەن اكەلىنگەن توپىراق قويىلعان. ال، ءسال ارىرەك جۇرەتىن بولساق، قابىرعادا قازاقستاننىڭ كارتاسى بەينەلەنىپ، ول جەردە وسى اتقىشتار بريگاداسى جاساقتالعان اقتوبە جانە الماتى قالالارى مەن ەلوردامىز استانا قالاسى كورسەتىلگەن.   بۇل مەموريال العاش رەت 2010  جىلى سالىنعان. ال، قازىر تولىقتاي جاڭارىپ، قايتادان اشىلدى. جوندەۋ جۇمىستارىن قولعا العان اقتوبە وبلىسىنىڭ كاسىپكەرلەرى كەشەندى باستان-اياق جاڭعىرتتى.

يمانعالي تاسماعامبەتوۆ، قر-نىڭ رف-داعى توتەنشە جانە وكىلەتتى ەلشىسى:

– بۇگىن بارشامىز ادامزات تاريحىنداعى ەڭ قانقۇيلى سوعىستاعى ۇلى جەڭىس كۇنى قارساڭىندا قاسيەتتى رجەۆ جەرىندە ەرەكشە شارا كەزىندە باس قوسىپ وتىرمىز. ءسوز جوق، بارشامىزدىڭ ارمانىمىز بەلگىلىسى بار، بەلگىسىزى بار، بارلىق بوزداقتارىمىزدىڭ وسى جولدا اڭساپ وتكەن بەيبىت ءومىر مەن بەرەكەلى تىنىشتىق. ەل ءۇشىن تۋىپ، جەر ءۇشىن مەرت بولعان اتالارىمىز بەن اپالارىمىزدىڭ رۋحى ۇرپاقتارىن ارقاشان جەلەپ-جەبەپ ءجۇرسىن.

سالتاناتتى شاراعا قازاق ديپلوماتتارى مەن دياسپورا وكىلدەرى، جەرگىلىكتى ارداگەرلەر مەن جاستار جانە اقتوبە وبلىسىنان ارنايى كەلگەن ۇلكەن دەلەگاتسيا وكىلدەرى قاتىستى.

بەردىبەك ساپارباەۆ، اقتوبە وبلىسىنىڭ اكىمى:

– مۇنىڭ قازىرگى ۇرپاقتارعا عانا ەمەس، كەلەشەك ۇرپاققا دا ۇلكەن ماڭىزى بولادى.

يگور رۋدەنيا، تۆەر وبلىسىنىڭ گۋبەرناتورى:

– ءبىز ءۇشىن بۇل شارانىڭ ماڭىزى وتە زور. سوندىقتان، قازاقستاننىڭ رەسەيدەگى ەلشىسىنە، اقتوبە وبلىسىنىڭ اكىمىنە زور العىس ايتامىن. بۇل ەسكەرتكىش قيىن-قىستاۋ كۇندە بىرگە بولعان ۇلتتار اراسىنداعى دوستىقتىڭ سيمۆولى. سونىڭ ارقاسىندا قازىر ءبىز بەيبىت ءومىر كەشىپ جاتىرمىز. قازىر قازاقستان مەن رەسەي ەكونوميكاسى قارقىندى دامىپ جاتقان تۇراقتى مەملەكەتتەر.

مەموريالدى كەشەن اۋماعىندا، رجەۆ مايدانىندا قازا تاپقان 10 مىڭ ساربازدىڭ اتتارى تاسقا قاشاپ جازىلعان. اقتوبەلىك اسلان بالقاسىموۆ بۇگىن ولاردىڭ اراسىنان ءوز اتاسىنىڭ ەسىمىن كورىپ ەرەكشە قۋاندى.

رجەۆ شايقاسىنىڭ ماسكەۋدى قورعاۋدا شەشۋشى ءرول اتقارعانى بەلگىلى. ال، وسى ايگىلى «مارس» وپەراتسياسى كەزىندە قازاق ساربازدارى ەرەكشە ەرلىك كورسەتىپ، جاۋدى بەتىن قايتارۋعا سۇبەلى ۇلەس قوستى. مىنا تۇرعان ەسكەرتكىش كەشەنى كەشەگى سول ەرلىككە، بۇگىنگى ەلدىككە ارنالعان تاعزىم.

نۇرتاس سولتانۇلى

دەرەككوز: kaztrk.kz

Abai.kz اقپاراتتىق پورتالىندا جاريالانعان ماقالاعا پىكىر ايتىپ، ويىڭىزدى بىلدىرگىڭىز كەلسە، مىنا پاراقشاعا جازىپ قالدىرىڭىز!

Abai.kz