دۇيسەنبى, 20 تامىز 2018
523 0 پىكىر 14 مامىر, 2018 ساعات 08:42

باق: ەكس-بانكير جومارت ەرتاەۆ رەسەيدەن ساياسي باسپانا سۇراعان

وتكەن اپتادا ماسكەۋدە ۇستالعان قازاقستاندىق بۇرىنعى بانكير جومارت ەرتاەۆ 40 تاۋلىككە ۇيقاماققا الىندى. مۇنداي شەشىمدى جۇما كۇنى ماسكەۋدىڭ اۋداندىق سوتى شىعارعان دەپ حابارلايدى اقپارات اگەنتتىكتەرى.

پروكۋراتۋرا سوتتان جومارت ەرتاەۆتى ماۋسىمنىڭ 16-ىنا دەيىن تەرگەۋ اباقتىسىندا قاماۋدا ۇستاۋدى جانە كەيىن ونى قازاقستانعا ەكستراديتسيالاۋدى سۇراعان. پروكۋراتۋرا ەرتاەۆتى تەرگەۋ اباقتىسىنا قاماۋدى سۇراۋىنىڭ سەبەبىن "ول شەتەلگە قاشىپ كەتۋى نەمەسە تەرگەۋگە قىسىم جاساۋى مۇمكىن" دەپ تۇسىندىرگەن.

بۇعان دەيىن قازاقستان ەكس-بانكير ءارى كابەلدىك تەلەكومپانيانىڭ توپ-مەنەدجەرى بولىپ ىستەگەن جومارت ەرتاەۆقا حالىقارالىق ىزدەۋ جاريالاعان.

رەسەيلىك "كوممەرسانت" ىسكەرلىك باسىلىمى جومارت ەرتاەۆتىڭ ماسكەۋدەگى سوتتا رەسەيدەن ساياسي باسپانا سۇراعانى جانە ازاماتتىق الۋعا قۇجاتتارىن وتكىزىپ قويعانى جايلى مالىمدەگەنىن جازادى. باسىلىمنىڭ حابارلاۋىنشا، ەرتاەۆ وزىنە "قازاق ۇلتشىل-پاتريوتتارى قوقان-لوققى جاسايتىنى" جانە ءوزىن قۋدالاۋدىڭ "ساياسي استارى بارى" تۋرالى ايتقان.

رەسەي كۇش قۇرىلىمدارى ماسكەۋدە جۇرگىزگەن وپەراتسيا بارىسىندا ەرتاەۆتى ۇستاعاننان كەيىن قازاقستان ىشكى ىستەر مينيسترلىگى جومارت ەرتاەۆتىڭ قازاقستاندىق RBK Bank ديرەكتورلار كەڭەسى توراعاسىنىڭ كەڭەسشىسى بولىپ ىستەگەن كەزدە جاساندى كومپانياعا بانكتەن قارىزعا 80 ميلليون دوللاردان اسا اقشا بەرگىزگەن جانە قارىزدى قايتارماۋ ماقساتىمەن ءتۇرلى ءىس-ارەكەتتەر جاساعان دەگەن كۇدىككە ىلىككەنى تۋرالى حابارلاعان. "كوممەرسانت" باسىلىمىنىڭ اقپاراتى بويىنشا، سوتتا ەرتاەۆ پەن قورعاۋشىلارى الگى ايىپتاۋلاردى جوققا شىعارىپ، بانك نەسيەسى "الما تۆ" كابەلدىك تەلەارنانىڭ وپەراتورى "الماتەل" كومپانياسىنىڭ اكتسيالار پاكەتىن ساتىپ الۋعا پايدالانىلدى دەپ مالىمدەگەن.

2015 جىلى قازاقستان باس پروكۋراتۋراسى ەرتاەۆتىڭ "سەنىپ تاپسىرىلعان وزگەنىڭ مۇلكىن ۇرلاعان" دەگەن كۇدىككە ىلىنگەنى جانە ونىڭ قايدا جۇرگەنى بەلگىسىز ەكەنى جايلى مالىمدەگەن. ەرتاەۆ بولسا، اشىق كوزدەردەگى اقپارات بويىنشا، سوڭعى ءۇش جىلدا ماسكەۋدە تۇرعان.

بۇعان دەيىن جومارت ەرتاەۆ قازاقستاندا بانك زاڭىن بۇزعان دەگەن ايىپپەن قىلمىستىق جاۋاپقا تارتىلعان. 2009 جىلى قازاقستان قارجى پوليتسياسى اليانس بانكتىڭ اكتسيونەرلەرى مەن مەنەدجەرلەرىنە ءبىر ميلليارد دوللاردان كوپ اقشانى ۇرلاعان دەگەن ايىپ تاققان. سول كەزدە ۇستالىپ، تۇتقىندالعان جومارت ەرتاەۆ توعىز اي قاماۋدا وتىرعان. كەيىن وعان تاعىلعان ايىپ "بۋحگالتەرلىك جانە قارجى ەسەبى تۋرالى زاڭدى بۇزۋ" جانە "بانك قارجىسىن زاڭسىز پايدالانۋ" دەگەن باپتارعا اۋىستىرىلعان. سوت ەرتاەۆقا ايىپپۇل سالىپ، بوستاندىققا شىعارعاننان كەيىن ول قازاقستانداعى ەكىنشى دەڭگەيلى باسقا بانكتەردە جۇمىس ىستەگەن. ال 2014 جىلدىڭ سوڭىندا جومارت ەرتاەۆ "الما تۆ" كومپانياسى باسشىلىعىنا تاعايىندالعان بولاتىن.

Abai.kz

0 پىكىر