الەمدىك بوكس جانكۇيەرلەرى گەننادي گولوۆكيننىڭ ۇلتتىق ناقىشتاعى شاپاپىنا تامسانا قارايتىنى قۋانتادى، - دەدى مادەنيەت جانە سپورت ءمينيسترى ارىستانبەك مۇحامەديۇلى. 

بۇگىن ورتالىق كوممۋنيكاتسيالار قىزمەتىندە قر مادەنيەت جانە سپورت ءمينيسترى ارىستانبەك مۇحامەديۇلىنىڭ قاتىسۋىمەن ءباسپاسوز ءماسليحاتى وتكەن بولاتىن.

«بارلىق الەم چەمپيوناتتارىندا، وليمپيادا ويىندارىندا سپورتشىلاردىڭ ەپيكيروۆكاسىنا باسا ماڭىز بەرىلەدى. مەن ءوزىمىزدىڭ ديزاينەرلەرگە، سپورتتىق كيىمدەردى تىگەتىن كومپانيالارىمىزعا زور العىسىمدى بىلدىرگىم كەلەدى. قازاقستان قۇراماسى شىققان كەزدە جانكۇيەرلەردىڭ زور قۇرمەتىنە يە بولاتىندىعىن كورەمىز. سونداي-اق وزگە ەلدەردىڭ سپورتشىلارى دا قازاقستاندا كيىمنىڭ ديزاينى جاقسى دامىعانىن العا تارتىپ، ماقتاۋىن جەتكىزىپ جاتادى»، - دەيدى ارىستانبەك مۇحامەديۇلى.

سونىمەن بىرگە، مينيستر قازاقى ناقىشتاعى كيىمگە ادال گەننادي گولوۆكينگە العىسىن ءبىلدىردى.

«مەن اتى اڭىزعا اينالعان گەننادي گولوۆكينگە راحمەت ايتقىم كەلەدى. ول رينگكە مىندەتتى تۇردە ۇلتتىق ناقىشتاعى شاپانمەن شىعادى. ايقاس اياقتالعاننان كەيىن مىندەتتى تۇردە قايتادان شاپانىن كيىپ قايتادى. ءبىزدىڭ ۇلتتىق كيىمدى كورگەن كەزدە كەۋدەمىزدى ماقتانىش سەزىمى كەرنەيدى! مۇنى كورۋ ناعىز باقىت دەر ەدىم»، - دەيدى مينيستر.

سونداي-اق، ول قازاقستانعا كەلگەن گولليۆۋد اكتەرى نيكولاس كەيدجگە تارتۋ ەتىلگەن شاپانعا قاتىستى ءازىلدىڭ تاراپ كەتۋىنە پىكىر ءبىلدىردى.

«ءبىزدىڭ ۇلتتىق كيىمدى كۇلكى قىلعان قيىس كوزقاراستارعا قاراماستان، گەننادي گولوۆكين مەن ءبىزدىڭ وزگە دە پاتريوت سپورتشىلارىمىز ونىڭ تانىمالدىلىققا يە ەكەنىن دالەلدەپ كەلەدى. ءبىز ۇلتتىق سپورت تۇرلەرى وكىلدەرىنىڭ ەكيپيروۆكاسىنا نازار اۋدارامىز. بۇل رەتتە بەكبولات تىلەۋحانعا زور العىسىمىزدى ايتۋىمىز كەرەك. ول تەك مىقتى ءانشى ءارى ماجىلىسمەن عانا ەمەس، بۇگىنگى تاڭدا ونىڭ قاتىسۋىمەن ۇلتتىق ەكيپيروۆكا ازىرلەندى. ەكيپيروۆكا سپورتشىلارعا اسا ىڭعايلى. كوكپاردان وتكەن جىلى بولعان الەم چەمپيوناتى كورسەتكەندەي، ۇلتتىق قۇرامامىز ءوزىنىڭ مانەرلى كيىمىمەن وزگەلەردەن گورى ايبىندىراق كورىندى»، - دەدى مينيستر.

Abai.kz