جۇما, 29 ناۋرىز 2024
اكىم مەن حالىق 3286 0 پىكىر 6 ماۋسىم, 2018 ساعات 14:02

يندۋستريالاندىرۋ كارتاسى ءھام ناۋقانشىلدىق اۋرۋى

وبلىسىمىزدا يندۋستريالاندىرۋ كارتاسىندا كورسەتىلگەن ماقساتقا سايكەس ونەركاسىپ ورىندارىن كوبىرەك اشىپ، ەكونوميكانى وركەندەتۋگە دەگەن قۇلشىنىس ايقىن  بايقالادى. قۇپتارلىق باستاما، ارينە. الايدا مۇنداي ىرگەلى دە ءىرى جۇمىستى تەرەڭ جوسپارلاپ، مۇقيات ساراپتاپ، مۇلتىكسىز اتقارۋدىڭ ورنىنا كەي-كەيدە ورىنسىز اسىعىستىققا ۇرىنىپ، ونىڭ اياعى شەشىلمەيتىن تۇيىنگە تاپ بولىپ قالاتىنى دا جاسىرىن ەمەس. مۇنىڭ ءبارى سول باياعى جوعارى جاققا جاقسى اتتى بولامىن با، ءسويتىپ وزگەلەردەن بۇرىن كوزگە ءتۇسىپ قالامىن با دەگەن ناۋقانشىلدىق اۋرۋى.

فاكتىلەرگە جۇگىنە كەتەلىك. بيىل قوستاناي وڭىرىندە كەزىندە ايداي الەمگە جاريالاپ، جۇرتتىڭ بارىنە ۋادە بەرىپ قويعان ەكى بىردەي ءىرى كاسىپورىننىڭ جاعدايى مۇلدەم مۇشكىل بولىپ تۇر. ولاردىڭ ىسكە-قوسىلۋ-قوسىلماۋى نەعايبىل كۇيدە. سەبەبى تىم قۇپيا دا ەمەس، قاراپايىم عانا. قارجىدان قالتا قاعىلعان. كەزىندە بۇل نەگە ەسكەرىلمەگەن، كاسىپورىنعا قانشا اقشا جۇمسالاتىنى نەگە شوتقا سالىنباعان دەگەن ساۋالدارعا جاۋاپ ىزدەپ باس اۋىرتپاڭىز. بىزدە ونداي-ونداي ۇساق-تۇيەككە ەشكىم دە كوڭىل بولمەيدى.

مىنەكەي، وسىلايشا دۇرىس جوسپارلاي الماۋدىڭ سالدارىنان وبلىسىمىزداعى رۋدنىي قالاسىنداعى تسەمەنت زاۋىتىنىڭ اشىلۋى بەلگىسىز مەرزىمگە كەيىنگە قالدىرىلدى. بۇل جاعداي بۇرىن دا قايتالانعان. تاعدىرى بەلگىسىز كۇيدە. ءدال وسىنداي تاز كەپەشتى ارقالىق قالاسىنداعى نەفريت وڭدەۋ زاۋىتى دا كيىپ وتىر. بۇل ەكەۋى دە كەزىندە وبلىسىمىزداعى يندۋستريالاندىرۋ كارتاسىنىڭ ويداعىداي جۇزگەگە اسىرىلىپ جاتقانىن بايتاق ەلىمىزگە ماقتان ەتىپ كورسەتەتىن كاسىپورىندار ەدى. ەندى مىنە جاعدايى الگىندەي. ءبارىنىڭ ايتاتىن سىلتاۋى — قارجى تاپشىلىعى. ماسەلەن رۋدنىيداعى تسەمەنت زاۋىتىنىڭ قوجايىندارى تاعى دا قوسىمشا 1,3 ميلليارد تەڭگە ءبولۋدى وتىنەدى. ال ارقالىقتا قۇرىلتايشىلار مەن قالا اكىمدىگىنىڭ جاۋاپسىزدىعى سالدارىنان اتالمىش كاسىپورىندى ىسكە قوسۋ 2019 جىلعا دەيىن سوزىلاتىن ءتۇرى بار.

«جىعىلعانعا — جۇدىرىق» دەگەندەي، تالاي جىلدان بەرى جىرى تاۋسىلمايتىن كومسومول قۇس فابريكاسى مەن قوستاناي قالاسىنداعى ماي زاۋىتىنىڭ دا جاعدايى پالەندەي ءماز ەمەس. قۇس فابريكاسىن ءويتىپ-ءبۇيتىپ امالداپ الىپ قالۋعا بولار، ال ماي زاۋىتىنان مۇلدەم ءۇمىت جوق. قۇلدىراۋعا ۇشىراعانى سونشالىق، ەندى تەك بانكروتقا كەتۋدەن باسقا امالى قالمادى. مۇنى ءتىپتى وبلىس اكىمى ارحيمەد مۇقانبەتوۆتىڭ ءوزى دە مويىنداۋعا ءماجبۇر بولدى.

- مەن بۇل زاۋىتتا بولىپ قايتتىم، - دەيدى ول امالسىز. - وراسان زور كولەمدە بولىنگەن قارجىنىڭ ءدال سول ماقساتقا جۇمسالعانىنا مەنىڭ ۇلكەن كۇمانىم بار. قۇرىلتايشى ەشتەڭەمەن دە اينالىسقىسى كەلمەيدى. سوت-قۇرىلىس ساراپتاماسىنىڭ جۇرگىزىلگەنى نەمەسە جۇرگىزىلمەگەنىن ەشكىم دە بىلمەيدى.

سوندا دەيمىز-اۋ، قۇرىلىستىڭ قالاي جۇرگىزىلىپ جاتقانىن قاداعالايتىن ورگاندار قايدا قاراعان؟ اكىمىمىز زاۋىتتىڭ قۇرىلتايشىسىنا شۇيلىككەنشە قاراماعىنداعىلاردىڭ نە  تىندىرىپ جۇرگەنىنە كوڭىل اۋدارعانى الدەقايدا ءتيىمدى ەمەس پە؟ ايتپەسە كاسىپورىنداردىڭ دەر كەزىندە ىسكە قوسىلماعانىنا تەك قانا قۇرىلتايشىلار كىنالى دە، وبلىس اكىمىدىگى سۋدان تازا، سۇتتەن اق بولىپ شىعا كەلە مە؟ بۇل قانداي قيسىنعا جاتادى؟

جالپى، جاقسى اتتى كورىنىپ قالۋعا دەگەن ەرەكشە قۇلشىنىستى ەشكىم دە توقتاتا المايدى ەكەن. وبلىس باسشىلىعى جاقىندا جوعارىداعى كەلتىرىلگەن پروبلەمانى شەشىپ الماستان، تاعى باياعى يندۋستريالاندىرۋ كارتاسىن اسا قىسقا مەرزىمدە جۇزەگە اسىرۋعا ەرەكشە بەلسەندىلىكپەن كىرىسىپ كەتتى. ول ءۇشىن اتالمىش كارتا مۇلدەم قايتا قارالدى. بۇل قۇجاتقا بيىلدىڭ وزىندە ىسكە قوسىلۋعا ءتيىستى 6 كاسىپورىن كىرگىزىلدى. جانە بۇلار اناۋ-مىناۋ ۇساق-تۇيەك ەمەس، جەدەل ساتى جابىقتارىن وندىرەتىن زاۋىت، كونديتەر فابريكاسىنىڭ ءبىر لينياسى، قۇراما جەم شىعاراتىن كاسىپورىن، سونداي-اق بيدايدى تەرەڭدەتىپ وڭدەۋ جونىندەگى بيوتەحنولوگيالىق ءوندىرىس سەكىلدى الىپتار. بۇلاردىڭ بىرقاتارى وسى جىلعى شىلدە ايىندا ەلباسىنىڭ تىكەلەي قاتىسۋىمەن وتەتىن تەلەكوپىردە اشىلىپ قالار دەگەن اسقاق ماقسات تا قويىپ وتىر. ارينە، بۇلاردىڭ ءبارى ويداعىداي ىسكە قوسىلسا، وبلىسىمىزدىڭ ونەركىسىبى ءبىر سىلكىنىپ قالارى ءسوزسىز. الايدا جوعارىدا جاعدايلار ەسكە تۇسكەندە ۇمىتتەن گورى كۇدىك كوبىرەك ويعا ورالا بەرەدى.

جايبەرگەن بولاتوۆ، قوستاناي

Abai.kz

    

     

  

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3577