سەيسەنبى, 13 قاراشا 2018
ءسۇيىنشى! 972 2 پىكىر 12 ماۋسىم, 2018 ساعات 17:27

اعىلشىن باسپا ءۇيى اكادەميك ورازالى سابدەننىڭ كىتابىن باسىپ شىعاردى

ەۋرازيا قۇرلىعىنان شىققان عىلىمي-تانىمدىق ەڭبەكتەردى جاريالاۋعا ماماندانعان "Hertfordshire Press" اعىلشىن باسپا ءۇيى اكادەميك ورازالى سابدەننىڭ "اباي، قازاقستاننىڭ بولاشاعى جانە الەمدىك وركەنيەت" اتتى فيلوسوفيالىق كىتابىن باسىپ شىعاردى.

ول الەمدىك قاۋىمداستىقتىڭ قىزىعۋشىلىعىن تۋعىزىپ، قازىر كەڭىنەن تالقىلانۋدا. الەم قاۋىمداستىعىنا ۇسىنىلعان بۇل كىتاپ قازاقتىڭ ۇلى اقىنى ابايدىڭ پوەتيكالىق جانە قارا سوزدەرى ارقىلى بۇگىنگى كۇننىڭ ماسەلەسىن كوتەرۋدە ۋاقىت پەن كەڭىستىكتى ەڭسەرەتىن ەپيكالىق جۇمىس بوپ تابىلادى.

بولاشاقتى بولجاۋ ءار كەزدە وڭاي بولماعان، مىنە وسىنداي اۋىر جۇگى بار عىلىمي ەڭبەك تەك قازاقستان مەن ورتالىق ازيا ەلدەرى عانا ەمەس، سونىمەن قاتار بارلىق الەمگە ءتان بىرقاتار ماسەلەنىڭ باسىن شالادى. "تەحنولوگيالىق" بولاشاققا كوز جۇما ىلەسىپ، جۇيتكىپ بارا جاتقان مىنا ءبىز نەنى تىسقارى قالدىرىپ جاتىرمىز؟ باستى نازار اۋدارتاتىن دا تۇس وسى وندا.

ورازالى سابدەننىڭ شەتەلدىك باسىلىم باسىپ شىعارعان بۇل ەكىنشى كىتابى، نەگىزى. الدىندا، ياعني 2016 جىلى لوندوندا وتكەن “Open Eurasian Literature Festival&Book Forum” اتتى V ادەبي فەستيۆالى كەزىندە ابدىمالىك اشىروۆپەن بىرگە جازعان “The Conceptual Strategy for Humankind’s Survival in the XXI Century and Food Security” كىتابىنىڭ تۇساۋى كەسىلگەن ەدى. بۇل تەك ورازالى سابدەننىڭ عانا ەمەس، جالپى قازاقستان ەكونوميكاسى عىلىمىنىڭ قول جەتكىزگەن ۇلكەن جەتىستىگى دەپ باعالانعان ەدى سول كەزدە.

سونداي-اق ول اعىلشىننىڭ عىلىمي قاۋىمداستىعى تاراپىنان ۇلكەن قولداۋعا يە بولعان قازاقستان ەكونوميكاسىنىڭ تاريحى تۋرالى العاشقى ەڭبەك. قازاق عالىمىنىڭ ەڭبەگىنە نوبەل سىيلىعىنىڭ تەڭ يەگەرى، ۆاشينگتون اكادەمياسىنىڭ اكادەميگى س.تيماشەۆتىڭ ءوزى وڭ پىكىر جازىپ قالدىرعان. ۇلىبريتانياداعى باسپانىڭ مالىمەتىنشە، بۇگىندەرى بۇل كىتاپ اۆستراليا، جاڭا زەلانديا، كانادا، شۆەتسيا، نيدەرلاندى، دانيا، ۇلىبريتانيا جانە اقش سىندى ەلدەردە ساتىلىمعا شىعارىلعان. ودان بولەك الەمدەگى ەڭ مىقتى دەگەن 200 ۋنيۆەرسيەتەتتىڭ كىتاپحاناسىنا جونەلتىلگەن.

ال بۇگىندەرى جارىق كورگەن “اباي، قازاقستاننىڭ بولاشاعى جانە الەمدىك وركەنيەت” ەڭبەگى الدىنداعى كىتاپتا كوتەرىلگەن ادامزاتتىڭ ومىرشەڭدىگىن ۇزارتۋ ماسەلەسىن ارى قاراي تالقىلايدى. ءسويتىپ ونى ەكونوميكالىق، ساياسي، ەكولوگيالىق تۇرعىداعى پالساپالىق كوزقاراستاعى شەشىمدەر ارقىلى سيپاتتاپ، جۇرت نازارىنا بىرنەشە ۇسىنىستىڭ تالقىسىن ۇسىنادى. ونىمەن بىرەۋ كەلىسەر، بىرەۋ كەلىسپەس، دەگەنمەن عىلىمي ورتانىڭ پايىمى جالپى جۇرتشىلىققا وسىلاي جەتۋدە.

اعىلشىن باسپاسى اكادەميك ورازالى سابدەندى ورتالىق ازيادان شىققان مىقتى عالىم، قازاقستان عالىمدارى وداعىنىڭ پرەزيدەنتى، اكادەميك، قر پارلامەنتىندە ءتورت رەت دەپۋتات بولعان، ول الەمدىك عىلىمي ويدىڭ ەپيتسەنترىندە جارق ەتكەن عالامدىق ماسشتابتاعى وزگەگە ۇقسامايتىن جەمىستى يدەيالارىمەن تانىلعان ورتالىق ازيانىڭ تۇكپىرىنەن شىققان عالىم دەپ تانىستىرادى.

ايتا كەتەلىك، بيىل 16 جىلدىعىن اتاپ وتپەك “Hertfordshire Press“ اعىلشىن باسپا ءۇيى ەۋرازيا قۇرلىعىنداعى عىلىمي ەڭبەكتەردى ىرىكتەپ، جاريالاپ، الەمگە وسى ءوڭىردىڭ ءومىرى مەن حالقىن، جاي-كۇيى مەن تۇرمىس-تىرشىلىگىن ناسيحاتتايدى. 16 جىل ىشىندە بۇل باسپا 65 اۆتوردىڭ 130-دان استام كىتابىن باسىپ شىعارعان.

Abai.kz

2 پىكىر