سارسەنبى, 14 قاراشا 2018
1102 4 پىكىر 13 ماۋسىم, 2018 ساعات 11:41

HRW ترامپ پەن كيم كەزدەسۋى جونىندە: سولتۇستىك كورەياداعى ادام قۇقىقتارى ەلەۋسىز قالدى"

Human Rights Watch حالىقارالىق قۇقىق قورعاۋ ۇيىمى سينگاپۋر ءسامميتىنىڭ قورىتىندىسى جونىندە دونالد ترامپ پەن كيم چەن ىن قول قويعان قۇجاتتا سولتۇستىك كورەياداعى ادام قۇقىقتارى جونىندە ەشتەڭە ايتىلماعان دەپ مالىمدەدى.

"سينگاپۋر سامميتىندەگى كيم چەن ىن مەن ترامپ قول قويعان دەكلاراتسيادا ادام قۇقىقتارىنا بايلانىستى مۇلدەم ءۇنسىز قالعان ", – دەپ جازادى HRW ديرەكتورىنىڭ ازيا جونىندەگى ورىنباسارى فيل روبەرتسون.

"سولتۇستىك كورەياداعى ادام قۇقىقتارى سامميت سىرتىندا قالعانى اشۋلاندىرادى. كەيىن كحدر مەن مەملەكەتتىك حاتشى پومپەي اراسىندا ادام قۇقىعى قالاي تالقىلانباق؟ اقش سولتۇستىك كورەياعا ادامزاتقا قارسى قىلمىس جاساي بەرۋگە ەرىك بەردى مە؟", – دەيدى روبەرتسون.

12 ماۋسىمدا اقش جانە كحدر باسشىلارى سامميت قورىتىندىسى بويىنشا قۇجاتقا قول قويدى. قۇجاتتا پرەزيدەنت ترامپ پەن كيم چەن ىننىڭ "اقش پەن سولتۇستىك كورەيا اراسىندا جاڭا قارىم-قاتىناس ورناتۋ جانە كورەي تۇبەگىندە شىنايى ءارى ۇزاق مەرزىمدى بەيبىتشىلىك ورناتۋ ماسەلەلەرى بويىنشا جان-جاقتى، تەرەڭ ءارى شىنايى پىكىر الماسقانى" ايتىلادى.

"پرەزيدەنت ترامپ سولتۇستىك كورەيانىڭ قاۋىپسىزدىگىنە كەپىلدىك بەرۋگە مىندەتتەمە الدى، توراعا كيم چەن ىن كورەي تۇبەگىن يادرولىق قارۋدان تولىق ارىلتۋ ۇستانىمىنان تايمايتىنىن راستادى" دەلىنگەن قۇجاتتا.

امەريكا داۋىسى ءتىلشىسىنىڭ سولتۇستىك كورەياداعى ادام قۇقىقتارى ماسەلەلەرى جونىندە سۇراعىنا جاۋاپ بەرگەن ترامپ "بىزگە بۇگىن، كەشە، ەكى اپتا بۇرىن نە بولعانىنا ءمان بەرۋ كەرەك – مىنە سول كەزدە ەڭ ماڭىزدىسى باستالعان" دەپ جاۋاپ بەردى. بىراق كەيىن Fox News تەلەكانالىنا سولتۇستىك كورەياداعى ادام قۇقىقتارى ماسەلەلەرىندە وڭ وزگەرىستەر بولادى دەپ ۇمىتتەنەتىنىن جەتكىزگەن.

4 پىكىر