سارسەنبى, 14 قاراشا 2018
1150 0 پىكىر 13 ماۋسىم, 2018 ساعات 11:45

بىشكەكتە قازاقستاندىق بەلسەندىنى قولداۋ پيكەتى ءوتتى

قىرعىزستان استاناسىندا بۇگىن جەرگىلىكتى ازاماتتىق بەلسەندى جالعىز ءوزى پيكەت وتكىزىپ، استانانىڭ تالابىمەن بىشكەكتە ۇستالعان قازاقستاندىق وپپوزيتسيالىق بەلسەندى ءارى بلوگەر مۇراتبەك تۇڭعىشباەۆقا قولداۋ ءبىلدىردى.

12 ماۋسىمدا بەلسەندى وندۋرۋش توكتوناسىروۆ قىرعىزستان جوعارعى سوتى عيماراتىنىڭ الدىنا قىرعىز تىلىندە جازىلعان پلاكات ۇستاپ شىقتى. وندا: «م. تۇڭعىشباەۆ ەشقاشان ەكستراديتسيالانبايدى. جول بەرمەيمىز!» دەلىنگەن.

توكتوناسىروۆ قىرعىزستان بيلىگىن تۇڭعىشباەۆتى قازاقستانعا بەرمەۋگە، وپپوزيتسيالىق بەلسەندىگە ساياسي باسپانا ۇسىنۋعا شاقىردى.

بۇعان دەيىن قىرعىزستان ومبۋدسمەنى كۋبات وتورباەۆ قىرعىزستان باس پروكۋراتۋراسىن تۇڭعىشباەۆتى قازاقستانعا بەرمەۋگە شاقىرعان.

تۇڭعىشباەۆتى 10 مامىردا بىشكەكتە تۇرىپ جاتقان جەرىندە قىرعىزستاننىڭ ارنايى قىزمەتى ۇستادى. ول تۇراتىن پاتەردە ءتىنتۋ جۇرگىزىلگەن. 21 مامىردا قىرعىزستاننىڭ باس پروكۋراتۋراسى تۇڭعىشباەۆتى قازاقستانعا بەرۋدى ماقۇلدادى.

مۇراتبەك تۇڭعىشباەۆقا ەلىندە «قىلمىستىق توپتى قارجىلاندىردى»، «سوت ەكسترەميستىك دەپ تانىعان بىرلەستىكتى ۇيىمداستىرۋ جانە ونىڭ قىزمەتىنە اتسالىستى» دەگەن ايىپتار تاعىلعان. مۇندا تۇڭعىشباەۆتىڭ تىركەلمەگەن «قازاقستاننىڭ دەموكراتيالىق تاڭداۋى» قوزعالىسىنا قاتىستىلىعى تۋرالى ءسوز بولىپ وتىر. وپپوزيتسيالىق قوزعالىستى بۇرىنعى بانكير مۇحتار ءابليازوۆ قۇرعان. قازاقستان سوتى 2018 جىلى ناۋرىزدى ونىڭ قىزمەتىنە تىيىم سالدى.

Abai.kz

0 پىكىر