پارلامەنت سەناتىنىڭ توراعاسى قاسىم-جومارت توقاەۆ كاسىبي مەرەكە قارساڭىندا جۋرناليستەردى بايلانىس جانە اقپارات سالاسى قىزمەتكەرلەرىنىڭ كۇنى مەرەكەسىمەن قۇتتىقتادى.

ول سەنات دەپۋتاتتارى دا، ءوزى دە اقپارات سالاسىنىڭ ماماندارىنا قۇرمەتپەن قارايتىنىن، ولاردىڭ كاسىبي شەبەرلىكتەرى، پاتريوتتىق،  ادامگەرشىلىك قاسيەتتەرىن جوعارى باعالايتىنىن اتاپ ءوتتى.

«بۇقارالىق اقپارات قۇرالدارىنىڭ ءرولى تۇراقتى تۇردە ءوسىپ كەلەدى. ءتىپتى الەۋمەتتىك جەلىلەر پايدا بولسا دا، ءداستۇرلى بۇقارالىق اقپارات قۇرالدارىنىڭ ءرولى باسەڭدەمەيدى. كەرىسىنشە ولار وزىق تەحنولوگيالاردى جۇمىس قۇرالىنا اينالدىرىپ وتىر»، - دەدى ق.توقاەۆ.

توراعا ءبىزدىڭ ەلدەگى جۋرناليستيكا اۋقىمدى رەفورمالاردىڭ ۇدايى الدىڭعى ساپىندا ەكەنىن، باسپا جانە ەلەكتروندىق باسىلىمدار ميلليونداعان ادامداردىڭ كوڭىل تۇكپىرىنەن بەرىك ورىن العانىن اتاپ ءوتتى. وتاندىق بۇقارالىق اقپارات قۇرالدارى كاسىبي تۇردە شەبەر، شىنايى جانە جەدەل جۇمىس جۇرگىزۋدە.

سەنات توراعاسى ءبىزدىڭ ەلىمىز كۇردەلى گەوساياسي جاعدايداعى دامۋدىڭ وزگەرىستەر كەزەڭىن باستان وتكەرىپ جاتقانىنا نازار اۋداردى. الەمنىڭ ءار بۇرىشىندا جانجالدار ازايماي وتىر، سانكتسيالىق تۇردەگى تەكە-تىرەستەر ءورشىپ بارادى. «جاھاندىق ەكى ءۇردىس – جاھاندانۋ مەن ۇلتشىلدىقتىڭ اراسىنداعى قاراما-قايشىلىق تا ۇلعايا تۇسۋدە. قازاقستان حالىقارالىق قوعامداستىقتىڭ جاۋاپتى جانە بەدەلدى مۇشەسى رەتىندە ءوزىنىڭ ۇلتتىق مۇددەلەرىن قورعاۋدا ءتيىستى ۇستانىمداردى تاباندىلىقپەن پاش ەتىپ وتىر»، - دەدى ول. توراعا حالىقتىڭ شىنايى سەنىمىنە يە ءارى شەت ەلدەردە بەدەلى زور ءبىزدىڭ ەلىمىزدىڭ مەملەكەت باسشىسى حالىقارالىق ارەناداعى قازاقستاننىڭ ۇلتتىق مۇددەسىن ءاردايىم بيىك ۇستاپ كەلە جاتقانىن اتاپ ءوتتى. «ەلباسىنىڭ كوشباسشىلىق ءارى تۇڭعىش پرەزيدەنت مارتەبەسى ەلىمىزدىڭ ساياسي جۇيەسىندەگى تۇراقتىلىقتىڭ سەنىمدى كەپىلى»، - دەدى ول.

زاڭ شىعارۋ جۇمىستارى تۋرالى ايتا كەلىپ، سەنات توراعاسى «تۇڭعىش پرەزيدەنت - ەلباسى تۋرالى»،  تاياۋدا قابىلدانعان «قاۋىپسىزدىك كەڭەسى تۋرالى» زاڭدار ەلدەگى ىشكى جانە سىرتقى ساياساتتى جۇرگiزۋدە ەلباسىنىڭ جەتەكشى رولىنە قۇقىقتىق كەپىلدىكتەردى قامتاماسىز ەتەتىنى ءارى قازىرگى الەمدەگى دۇربەلەڭگە تولى جاعدايلاردا ماڭىزدى ءرول اتقاراتىنى تۋرالى حاباردار ەتتى. «ەلباسى – ءبىزدىڭ كونستيتۋتسيامىزدىڭ جانە ىشكى ساياسي تۇراقتىلىقتىڭ سەنىمدى كەپىلى. پرەزيدەنت نۇرسۇلتان نازارباەۆتىڭ تاۋەلسىز قازاقستاننىڭ نەگىزىن سالۋشى رەتىندەگى سىڭىرگەن ەڭبەگى اسا اۋقىمدى، تاريحي ماڭىزى زور»، - دەپ اتاپ ءوتتى ق.توقاەۆ.

توراعا پرەزيدەنتتىڭ تاياۋداعى جولداۋىندا تسيفرلىق تەحنولوگيالاردىڭ دەندەپ ەنۋىنە بايلانىستى قازاقستاندىقتاردى جاھاندىق وزگەرىستەر مەن قاتەرلەرگە دايىن بولۋعا شاقىرۋىنا جۋرناليستەردىڭ نازارىن اۋداردى. ق. توقاەۆتىڭ پىكىرىنشە، بۇل مىندەت تەك قوعامنىڭ قولداۋىمەن تابىستى شەشىلەدى. سوندىقتان تسيفرلاندىرۋ يدەياسىنىڭ ءمان-ماڭىزىن قالىڭ بۇقاراعا جەتكىزۋدە جۋرناليستەرگە اسا جاۋاپتى مىندەت جۇكتەلىپ وتىر.

بۇقارالىق اقپارات قۇرالدارى جاستاردىڭ كۇش-قۋاتىن شىعارماشىلىق ارناعا قاراي بۇرۋى ءتيىس. جاس ۇرپاق بارلىق الەۋمەتتىك ماڭىزدى ءىس-شارالارعا بەلسەنە ارالاسۋى قاجەت. سەنات باسشىسى ەلىمىزدىڭ ءداستۇرلى قۇندىلىقتارىن ساقتاۋعا جانە ۇلىقتاۋعا، قوعامنىڭ رۋحاني ءومىرىن جاڭارتۋعا باعىتتالعان ەلباسىنىڭ «رۋحاني جاڭعىرۋ» تۇجىرىمداماسىن ىسكە اسىرۋدا اقپارات قۇرالدارىنىڭ ءرولى ەرەكشە دەپ سانايدى.

قاسىم-جومارت توقاەۆ ەلىمىزدىڭ اقپارات سالاسىندا بەلسەندى قىزمەت ەتىپ جۇرگەن بىرقاتار ءباسپاسوز وكىلدەرىنە سەناتتىڭ قۇرمەت گراموتاسىن جانە العىس حاتىن تابىس ەتىپ، وتانىمىزدىڭ جارقىن كەلەشەگى جولىنداعى ەڭبەكتەرى تابىستى بولۋىنا تىلەكتەستىگىن ايتتى.

Abai.kz