مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان حالتمااگين باتتۋلگانى پرەزيدەنتتىك سايلاۋداعى جەڭىسىمەن قۇتتىقتاپ، قازاقستاننىڭ بارلىق باعىت بويىنشا ىنتىماقتاستىقتى دامىتۋعا دايىن ەكەنىن ايتتى.

–  بيىل قازاقستان رەسپۋبليكاسى مەن مونعوليا اراسىنداعى دوستىق قارىم-قاتىناستار مەن ىنتىماقتاستىق جونىندەگى شارتقا قول قويىلعانىنا 25 جىل تولادى. بۇل قۇجات كوپ عاسىرلىق دوستىق جانە تاتۋ كورشىلىك ءداستۇرى بار ەلدەرىمىز اراسىنداعى ىنتىماقتاستىقتى دايەكتى دامىتۋ جولىندا ماڭىزدى ءرول اتقارادى، – دەدى قازاقستان پرەزيدەنتى.

حالتمااگين باتتۋلگا ءوزىنىڭ مونعوليا پرەزيدەنتى بولىپ سايلانۋىمەن جانە تۋعان كۇنىمەن قۇتتىقتاعانى ءۇشىن نۇرسۇلتان نازارباەۆقا ريزاشىلىق ءبىلدىردى.

– مەن ءسىزدىڭ جۇمىسىڭىزدى مۇقيات باقىلاپ وتىرامىن جانە جاڭا ەلوردا – استانا قالاسىن سالعانىڭىزدى بىلەمىن. مەن مونعوليانىڭ قۇرىلىس ءمينيسترى بولعان كەزدە دە قازاقستان تاجىريبەسىن كوپ زەرتتەدىم. ءبىز دە ەلىمىزدىڭ استاناسى – ۇلان-باتور قالاسىنىڭ توڭىرەگىندە مايتار قالاسىن سالۋ مۇمكىندىگىن قاراستىرىپ جاتىرمىز، – دەدى مونعوليا پرەزيدەنتى.

سوڭىندا مەملەكەت باسشىسى، ەڭ الدىمەن، ەكى ەل اراسىنداعى ىنتىماقتاستىقتى جاڭا دەڭگەيگە كوتەرۋ قاجەتتىگىنە توقتالىپ، مونعوليانىڭ شانحاي ىنتىماقتاستىق ۇيىمىنىڭ جۇمىسىنا اتسالىسۋعا دەگەن ۇمتىلىسىن قازاقستاننىڭ قولدايتىنىن ايتتى.

Abai.kz