جاقىندا جوعارعى سوتقا جولىم ءتۇسىپ، ءبىر سوت وتىرىسىنا قاتىستىم.
ەسىكتىڭ الدىندا وتىرعان قارشاداي قىزعا ادۆوكات "اينالايىن، ءبىزدىڭ ءۇش تىڭداۋشىمىز (وزدەرى "سلۋشاتەل" دەيدى ەكەن) كەلدى، قازىر تاعى ءبىر-ەكەۋى كەلەدى" دەگەن ءوتىنىش ايتىپ ەدى، قاعازىنا ۇڭىلگەن قىز:

- جوق، كۇتە المايمىز! بۇل سىزدەرگە اۋداندىق، وبلىستىق سوت ەمەس. بۇل جوعارعى سوت! - دەپ شورت كەستى. نەگىزى سوت وتىرىسىنىڭ باستالۋىنا ءالى ءبىراز ۋاقىت بار ەدى.

سويتسەم، قارشاداي قىز بۇل ءسوزدى سۋديادان ۇيرەنگەن ەكەن.

توردە وتىرعان سۋديا تىم قاتال، تىم تاككاپار. قيت ەتسەڭ، شارت كەتەدى. كوكىرەكتەرى ۇرىپ تۇر. الدىندا وتىرعان جانداردىڭ بارلىعى قىلمىسكەر، بالەقور، ارىزقويلار سياقتى. ايتەۋىر، تىم اسپاننان اسقاقتاپ قارايدى. ءوزىمدى سۋديانىڭ قاسىندا ادام ەمەس، ىزىڭداپ ۇشىپ جۇرگەن ماسا سياقتى سەزىندىم. دىبىسىڭ ءسال قاتتى شىقسا، سارت ەتكىزبەكشى...

"بۇل سەندەرگە اۋداندىق نەمەسە وبلىستىق سوت ەمەس، بۇل جوعارعى سوت!" دەگەن ءسوزدى بىرنەشە مارتە ايتتى. جانە تۇستەرى قانداي سۋىق دەسەڭىزشى. ءتىپتى، تەرەڭ تىنىس الۋعا قورقاسىڭ...

سودان ويلادىم: بۇلار سوندا اۋداندىق جانە وبلىستىق سوتتارداعى ارىپتەستەرىن تومەندەتىپ، قورلاپ وتىر ما دەپ... ءوزىڭىز ويلاڭىزشى، سوندا اۋداندىق جانە وبلىستىق سوتتارعا كەلۋشىلەر ويىنا كەلگەنىن جاساي بەرسە بولادى دەگەن ءسوز بە بۇل؟ شىنىن ايتۋ كەرەك، بۇل ايماقتىق سوتتاردى مەنسىنبەۋ سياقتى بولىپ كورىندى.

نەمەسە "بۇل جوعارعى سوت" دەپ زىلدەنگەندە جوعارعى سوتتىڭ ءوز الدىنا قابىلداپ العان بولەك زاڭى بار ما؟

ءتارتىپ تە، زاڭ دا بارلىعىنا بىردەي ورتاق ەمەس پە؟ ءسىز قالاي ويلايسىز؟ الدە مەن قاتەلەسىپ وتىرمىن با؟

جالپى العاندا سۋديالار الدىنا كەلگەن جانداردى سۇستى تۇرىمەن ىقتىرىپ، بيلەپ الامىن دەگەن شالا تۇسىنىكتەرىن قاشان قويادى؟ مەنىڭشە، ءتۇبى جوق سۋديانىڭ ءتۇرى جۇمىس ىستەيدى.

مەن قاتىسقان سوت وتىرىسى ۇزاق تا بولعان جوق. بىراق وسىناۋ ازعانا ۋاقىتتا سوتتار ءبىرتۇرلى اسەر قالدىردى. Əدەپ دەگەن قايدا سوندا؟

ورالحان ءداۋىتتىڭ Facebook-تەگى پاراقشاسىنان

Abai.kz