ەكس-قورعانىس ءمينيسترى ساكەن جاسۇزاقوۆ قازاقستان رەسپۋبليكاسى تۇڭعىش پرەزيدەنتى - ەلباسى اتىنداعى ۇلتتىق قورعانىس ۋنيۆەرسيتەتىنىڭ مەڭگەرۋشىسى بولىپ تاعايىندالدى. بۇل تۋرالى اقوردانىڭ ءباسپاسوز قىزمەتى حابارلادى.

ال جاسۇزاقوۆقا دەيىن اتالعان وقۋ ورنىن باسقارىپ كەلگەن  اسحات ناۋرىزبايۇلى رىسپاەۆ قىزمەتىنەن بوساتىلدى.

ساكەن ءادىلحانۇلى جاسۇزاقوۆ - 1957 جىلعى 25 قازاندا وڭتۇستىك قازاقستان وبلىسىنىڭ شالدار كەڭشارىندا تۋعان. 1978 جىلى الماتى جوعارى جالپىاسكەري كوماندالىق ۋچيليششەسىن بىتىرگەن. رەسپۋبليكا قارۋلى كۇشتەرىنىڭ قالىپتاسۋى مەن دامۋىنا، سونداي-اق تاۋەلسىز قازاقستاننىڭ قورعانىس قابىلەتىنىڭ نىعايۋىنا لايىقتى ۇلەس قوسا وتىرىپ، لەيتەنانتتان باستاپ گەنەرالعا دەيىنگى اسكەري قىزمەتتىڭ بارلىق ساتىلارىنان وتكەن.

1987 جىلدىڭ قىركۇيەگى مەن 1990 جىلدىڭ ماۋسىمى ارالىعىندا م.ۆ. فرۋنزە اتىنداعى اسكەري اكادەميادا تىڭداۋشى. ودان سوڭ الماتى قالاسى، الاتاۋ اۋداندىق ازاماتتىق قورعانىس باستىعىنىڭ ورىنباسارى – شتاب باستىعى لاۋازىمىندا بولدى.

1994 جىلعى شىلدەدە رف قك باس شتابىنىڭ اسكەري اكادەمياسىنا وقۋعا ءتۇستى.

1996 جىلى اتالعان اكادەميانى ءبىتىرىپ، قازاقستان رەسپۋبليكاسى قارۋلى كۇشتەرى باس شتابى باستىعىنىڭ ورىنباسارى بولدى. جەدەل جوسپارلاۋ دەپارتامەنتىن باسقاردى. ودان سوڭ قازاقستان رەسپۋبليكاسى قارۋلى كۇشتەرى باس شتابى باستىعىنىڭ جەدەل جۇمىستار جونىندەگى ورىنباسارى لاۋازىمىندا بولدى. كەيىنىرەك ارميا كورپۋسىنىڭ شتاب باستىعى، ۇتقىر كۇشتەردىڭ قولباسشىسى لاۋازىمدارىندا بولدى.

2003 جىلى باس شتاب باستىعى – قازاقستان رەسپۋبليكاسى قارۋلى كۇشتەرى قۇرلىق اسكەرلەرى باس قولباسشىسىنىڭ ءبىرىنشى ورىنباسارى قىزمەتىنە تاعايىندالدى. ودان سوڭ «شىعىس» وڭىرلىك قولباسشىلىعى اسكەرلەرىنىڭ قولباسشىسى بولدى.

2007 جىلعى ءساۋىر ايىندا قر قم شتابتار باستىقتارى كوميتەتى توراعاسىنىڭ ءبىرىنشى ورىنباسارى لاۋازىمىنا تاعايىندالدى.

2009 جىلى ءساۋىر ايىندا مەملەكەت باسشىسىنىڭ وكىمىمەن قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ باس قولباسشىسى بولىپ تاعايىندالدى.

2010 جىلعى ناۋرىز ايىنان باستاپ 2013 جىلعى 22 قاڭتارعا دەيىن قورعانىس ءمينيسترىنىڭ ءبىرىنشى ورىنباسارى – قازاقستان رەسپۋبليكاسى قورعانىس مينيسترلىگى شتابتار باستىقتارى كوميتەتىنىڭ توراعاسى لاۋازىمىن اتقاردى.

2013 جىلعى 22 قاڭتاردا قازاقستان رەسپۋبليكاسى پرەزيدەنتىنىڭ وكىمىمەن قازاقستان رەسپۋبليكاسى قورعانىس ءمينيسترىنىڭ ءبىرىنشى ورىنباسارى - قر قك باس شتابىنىڭ باستىعى بولىپ تاعايىندالدى.

2016 جىلعى 13 قىركۇيەكتە قازاقستان رەسپۋبليكاسى پرەزيدەنتىنىڭ جارلىعىمەن قازاقستان رەسپۋبليكاسىنىڭ قورعانىس ءمينيسترى بولىپ تاعايىندالدى.

«قىزىل جۇلدىز»، ءىىى دارەجەلى «قسرو قك-دەگى وتانعا قىزمەتى ءۇشىن»، II دارەجەلى «دانق»، II دارەجەلى «اۋليە كنياز الەكساندر نەۆسكي» جانە ءار ءتۇرلى دارەجەدەگى 21 مەدالمەن ناگرادتالعان.

1981-1983 جىلدار ارالىعىندا ادر جاۋىنگەرلىك قيمىلدارعا قاتىسقان.

1993-1994 جىلدارى تاجىكستان رەسپۋبليكاسىندا بىتىمگەرلىك ميسسيا اتقاردى.

Abai.kz