جاس قازاق: دانىشپان اباي ولەڭىندە: «اقىل، قايرات جۇرەكتى بىردەي ۇستا»، -  دەسە، ال 16 قاراسوزىندە اقىل مەن قايراتتىڭ جۇرەككە جۇگىنگەنى ايتىلادى. ءسىز شەشىم قابىلداردا جۇرەككە سۇيەنەسىز بە، الدە اقىلعا ما؟
اسقار جۇمادىلداەۆ: اقىلعا. ويتكەنى قالىپتاسىپ قالعان ستەرەوتيپ بار. اقىندار جىردى جۇرەگىمەن جازادى. انشىلەر ءاندى جۇرەگىمەن ايتادى. بىراق مۇنىڭ ءبارىن شارتتى ءسوز دەپ ۇعۋ كەرەك.  ىلعي دا اقىل ءبىرىنشى ورىندا، جۇرەك ەكىنشى ورىندا جۇرەدى. ەگەر ءسىز ماشينە ايداساڭىز، جۇرمەي جاتقان ۋاقىتتا گازدى باسىپ قالاسىز. گازدى باسىپ قالعان ۋاقىتتا دۆيگاتەلگە كوبىرەك كۇش تۇسەدى. سول سياقتى اقىلعا سالماق تۇسكەن ۋاقىتتا، جۇرەككە سالماق كوبىرەك تۇسەدى. سوندىقتان جۇرتتىڭ بارلىعى جۇرەگىم اۋىرادى ەكەن دەپ ويلايدى. شىنتۋايتىندا، جۇرەگى اۋىرمايدى. ءسىز وتە جاقسى سۇراقتان باستادىڭىز. ماسەلەن، سيىردا دا اقىل بار. سيىردا دا جۇرەك بار. ونىڭ جۇرەگى ادامنىڭ جۇرەگىنەن ەكى ەسە ۇلكەن. نەگە سيىر ولەڭ جازبايدى، نەگە ەسەپ شىعارا المايدى؟ ويتكەنى اڭگىمەنى شەشەتىن جۇرەك ەمەس، اقىل.
جاس قازاق: جۇرەكتەن اقىلعا ەمەس، اقىلدان جۇرەككە ءامىر تۇسەدى دەگىڭىز كەلە مە؟
اسقار جۇمادىلداەۆ: مىندەتتى تۇردە. اقىل دەيتىنىمىز - اۋا، قار سياقتى. جاۋىپ تۇرادى، بىراق بايقالمايدى. اۋانىڭ بار ەكەنى بايقالمايتىنى سياقتى، ماتەماتيكانىڭ بار ەكەنىن دە بايقامايمىز. اۋا، ماتەماتيكا، اقىل ءبارى ءبىر سارىننىڭ ءىسى.

جاس قازاق: دانىشپان اباي ولەڭىندە: «اقىل، قايرات جۇرەكتى بىردەي ۇستا»، -  دەسە، ال 16 قاراسوزىندە اقىل مەن قايراتتىڭ جۇرەككە جۇگىنگەنى ايتىلادى. ءسىز شەشىم قابىلداردا جۇرەككە سۇيەنەسىز بە، الدە اقىلعا ما؟
اسقار جۇمادىلداەۆ: اقىلعا. ويتكەنى قالىپتاسىپ قالعان ستەرەوتيپ بار. اقىندار جىردى جۇرەگىمەن جازادى. انشىلەر ءاندى جۇرەگىمەن ايتادى. بىراق مۇنىڭ ءبارىن شارتتى ءسوز دەپ ۇعۋ كەرەك.  ىلعي دا اقىل ءبىرىنشى ورىندا، جۇرەك ەكىنشى ورىندا جۇرەدى. ەگەر ءسىز ماشينە ايداساڭىز، جۇرمەي جاتقان ۋاقىتتا گازدى باسىپ قالاسىز. گازدى باسىپ قالعان ۋاقىتتا دۆيگاتەلگە كوبىرەك كۇش تۇسەدى. سول سياقتى اقىلعا سالماق تۇسكەن ۋاقىتتا، جۇرەككە سالماق كوبىرەك تۇسەدى. سوندىقتان جۇرتتىڭ بارلىعى جۇرەگىم اۋىرادى ەكەن دەپ ويلايدى. شىنتۋايتىندا، جۇرەگى اۋىرمايدى. ءسىز وتە جاقسى سۇراقتان باستادىڭىز. ماسەلەن، سيىردا دا اقىل بار. سيىردا دا جۇرەك بار. ونىڭ جۇرەگى ادامنىڭ جۇرەگىنەن ەكى ەسە ۇلكەن. نەگە سيىر ولەڭ جازبايدى، نەگە ەسەپ شىعارا المايدى؟ ويتكەنى اڭگىمەنى شەشەتىن جۇرەك ەمەس، اقىل.
جاس قازاق: جۇرەكتەن اقىلعا ەمەس، اقىلدان جۇرەككە ءامىر تۇسەدى دەگىڭىز كەلە مە؟
اسقار جۇمادىلداەۆ: مىندەتتى تۇردە. اقىل دەيتىنىمىز - اۋا، قار سياقتى. جاۋىپ تۇرادى، بىراق بايقالمايدى. اۋانىڭ بار ەكەنى بايقالمايتىنى سياقتى، ماتەماتيكانىڭ بار ەكەنىن دە بايقامايمىز. اۋا، ماتەماتيكا، اقىل ءبارى ءبىر سارىننىڭ ءىسى.
جاس قازاق: ءسىز اتاق-داڭقىڭىز ءبىزدىڭ ەلگە عانا ەمەس، الەمگە تانىس اكادەميكسىز. ادەتتە اتاقتىلاردىڭ ءومىربايانىنا قاراساق، كوپشىلىگىنىڭ بالالىق شاعى قيىندىقتا وتكەن. بالعىن عۇمىرىڭىزدا قيىنشىلىق كەزدەستى مە؟
اسقار جۇمادىلداەۆ: مەندە باقىتتى بالالىق شاق بولدى دەپ ەسەپتەيمىن. ومىرىمدە دە اسا ءبىر قيىنشىلىق كوردىم دەپ ايتا المايمىن. مەن ءبىر-اق رەت قيىنشىلىق كوردىم.  ءبىر-اق رەت، شىنىمدى ايتايىن، 1972 جىلى الماتىداعى مەكتەپ-ينتەرناتتى ءبىتىرىپ، ماسكەۋگە وقۋعا تارتتىم. پويىز ءتورت كۇن جۇرەدى، وندا دا الماتىدان ەكى-اق پويىز جۇرەتىن. 7 جانە 95 دەگەن. سول 95 پويىزبەن ماسكەۋگە بارىپ، مگۋ-عا وقۋعا ءتۇستىم. وقۋعا تۇسەردە لەۆ تولستويدىڭ «سوعىس جانە بەيبىتشىلىك» تۋىندىسى بويىنشا مازمۇنداما جازىپ، ورىس تىلىنەن ەكى العانمىن. قازىر لەۆ تولستوي مەنىڭ ەڭ سۇيىكتى جازۋشىم.
جاس قازاق: اسقار اعا، نورۆەگيا ستۋدەنتتەرى ايىنا 2000-3000 دوللار ستيپەنديا الادى ەكەن. باتىس ەلدەرىندە ستۋدەنتتەردىڭ ساپالى ءبىلىم الۋىنا جاعداي جاسالعان. سىزگە كوپ جۋرناليستەر وسى سۇراقتى قويادى. ءبىز دە وسىنىڭ جاۋابىن وزىڭىزدەن بىلسەك دەپ ەدىك. بىزدەگى ءبىلىم جۇيەسىنە كوڭىلىڭىز تولا ما؟
اسقار جۇمادىلداەۆ: تولادى. باعامداپ، بايقاساڭىز، قازاقستاننىڭ جاعدايى ودان دا جاقسى. بىرىنشىدەن، ءسىز قالاي دەسەڭىز دە وتانىڭىزدا جۇرەسىز. ەكىنشىدەن، بىزدە كەڭەس وداعىنان قالعان ينەرتسيا ءالى بار. مۇنى وقۋ جۇيەسىنە قاتىستى ايتىپ وتىرمىن. شەتەلدە، شىن مانىندە، ءبىلىم الۋعا تىرىسادى. ازاننان كەشكە دەيىن ساباق وقيدى، ىزدەنەدى، كىتاپحانادان شىقپايدى. بىزدە دە ونداي ستۋدەنتتەر بار. بىراق اراسىندا ىلعي «لەۆىي» قۋلىق قىلادى، ەبىن تاۋىپ، اعاسىن سالىپ، كوكەسىن سالىپ، ماسەلەسىن شەشۋگە تىرىسادى. شەتەلدە وندايدى كورگەنىم جوق.
جاس قازاق: سوندا شەتەل ستۋدەنتتەرى مەن ءبىزدىڭ ستۋدەنتتەردىڭ ايىرماشىلىعى نەدە؟
اسقار جۇمادىلداەۆ: بىزدىكىلەر قۋلىق جولىمەن قيسىق جاعىنا كەتىپ قالۋعا تىرىسىپ باعادى. نەگە ولاي ەكەنىن تۇسىنبەدىم. قوعامنىڭ ءوزى سونداي ما دەپ قالدىم. ويتكەنى، قيسىق جاققا ۇمتىلىپ تۇرادى. ماسەلەنى باسقا جاعىنان اينالىپ، توتەسىنەن جول تابۋعا تىرىسادى. قازىر وقۋعا ءتۇسۋ وڭاي، ءبىتىرۋ دە قيىن ەمەس. اسا ءبىر توپاس بىرەۋ بولماسا، كەز كەلگەن ادام ءبىتىرىپ شىعادى. نەگە؟ ولاي دەيتىنىم، وكىنىشكە قاراي، ءبىز وقۋدى ويىنشىققا اينالدىرىپ جىبەردىك، عىلىمدى دا...
جاس قازاق: ءسىزدى ۇيالى تەلەفون ۇستامايدى دەيدى. وسى راس پا؟
اسقار جۇمادىلداەۆ: مەنىڭ ەڭ قينالاتىن كەزىم قاي كەز ەكەنىن بىلەسىز بە؟ سەسسيانىڭ كەزى. مەن سەسسيانىڭ كەزىندە قاشىپ كەتەمىن. مەنى ەشكىم تابا المايدى. ويتكەنى، ول كەزدە مەنىڭ رۋلاسىم، تۋىسقانىم، جەرلەسىم، سىنىپتاسىم، كۋرستاسىم كوبەيىپ كەتەدى. ءار ستۋدەنتتى سۇيرەپ جۇرگەن بىرەۋ بار. مەنىڭ ۇيالى تەلەفون ۇستاماۋىمنىڭ سەبەبى دە وسىندا. مەن بىرەۋلەرگە جىلىنا ەكى-اق رەت كەرەك بولامىن. ول سەسسيانىڭ ۋاقىتىندا. باسقا ۋاقىتتا ەشكىمگە كەرەگىم جوق.
جاس قازاق: ءبىر سۇحباتىڭىزدا «قازاق ادەبيەتىنىڭ دەڭگەيى، قازاق عىلىمىنا قاراعاندا وتە جوعارى دەڭگەيدە» دەپسىز. بىراق الەمدىك ارەناعا ءالى شىعا الماي ءجۇرمىز. نوبەل سىيلىعىن العان قازاق قالامگەرىن دە،  عالىمىن دا كورمەدىك. نەگە؟
اسقار جۇمادىلداەۆ: ادەبيەت پەن عىلىمنىڭ ايىرماشىلىعى نەدە؟ ادەبيەتتە ءبارى تۇسىنىكتى، عىلىمدا ءبارى تۇسىنىكسىز. ادەبيەتتى بۇكىل حالىققا جازادى. عىلىمدى ءبىرلى-جارىم ادامعا ارناپ جازادى. مەنىڭ ەڭبەگىمدى قازاقستاندا تۇسىنەتىن ءبىر-ەكى-اق ادام بولۋى مۇمكىن. ال ادەبيەتتى جۇرتتىڭ ءبارى تۇسىنەدى. تۇسىنبەيتىن ادام بولمايدى. بىراق ادەبيەتتىڭ ءبىر كەمشىلىگى بار. ونى ءتۇسىنۋ ءۇشىن، سەن ءتىلدى ءبىلۋىڭ كەرەك. قازاقتىڭ اقىندارى مەن جازۋشىلارى قانشا جەردەن مىقتى بولسا دا، ونى قازاق قانا مويىندايدى. وزگەلەر مويىندامايدى. ويتكەنى، ونىڭ ءتىلىن بىلمەيدى. ال ماتەماتيكا ەڭبەگىن ءبىر-اق قازاق وقۋى مۇمكىن. بىراق بۇكىل الەم بىلەدى. شىن مانىندە، مىقتى جازساڭىز، ءسىزدىڭ مىقتىلىعىڭىزدى بۇكىل الەم مويىندايدى. ءبىزدىڭ مىقتى ادەبيەتىمىز بار، ول راس. ونى مەن مويىندايمىن. مۇمكىن ءسىز دە مويىندارسىز، تاعى دا بىرەۋلەر مويىندار. باسقا ەشكىم مويىندامايدى. ءبىزدىڭ مىقتى ماتەماتيكامىز بار. ونى قازاق مويىندامايدى (كۇلەدى). بىراق ەۆرەي مەن امەريكاندىق عالىمدار مويىنداۋى مۇمكىن. نوبەل سىيلىعىن كىمدەر الىپ جاتىر؟ ەڭ كوپ الىپ جاتقان امەريكاندىقتار، وزگە ءدىننىڭ وكىلدەرى. ماسەلەن، نوبەل سىيلىعىن العان ءبىر-اق مۇسىلمان بار.
جاس قازاق: نەگە؟
اسقار جۇمادىلداەۆ: ويتكەنى، ەۋروپادا عىلىمعا قاتتى كوڭىل بولەدى. ناقتى تاقىرىپپەن، ناقتى باعىتپەن جۇمىس ىستەيدى. بىزدە، وكىنىشكە قاراي، جالپى، فيلوسوفياعا كوڭىل بولەدى. ادەمىلىككە، سوزگە نازار اۋدارادى.
قازاقتىڭ ءتىلى باي دەپ ماقتانىپ جاتادى بارىنە. بىراق ونىڭ باي ەكەنىن قازاقتان باسقا ەشكىم بىلمەيدى.
جاس قازاق: عىلىم دەمەكشى، قازاقتان قاشان تەحنوكرات شىعادى؟
اسقار جۇمادىلداەۆ: مويىندايىن، بىلمەيمىن. بۇل سۇراقتى وسىمەن ەكىنشى ادام قويىپ وتىر. بۇرىن ەشكىم قويمايتىن. ال بىراق ءسىزدىڭ قويىپ وتىرعانىڭىز ماعان ۇناپ تۇر. بۇل اڭگىمەنى ايتىپ جۇرگەنىمە كوپ بولسا دا، ەشكىم نازار سالمايتىن. سەبەبى، مۇنداي پروبلەما بار دەپ ەشكىم ويلانبايتىن. بۇل نەنى كورسەتەدى؟ دەمەك، ءبىرلى-جارىم كىسىلەردىڭ پسيحولوگياسى وزگەرىپ كەلە جاتىر. جۇرتتا اۋزىمەن وراق ورعاننان كورى، ناقتى تىرلىككە ۇمتىلىس بار دەگەن ءسوز. وسىلاي ءبىرلى-جارىم كىسىلەر شىعا بەرسە، تامشى بولىپ تاستى بۇزادى. سول كەزدە قازاقتان تەحنوكرات شىعۋى مۇمكىن (كۇلەدى)...
جاس قازاق: اكادەميك اعامىز داعدارىس كەزىندە قالاي كۇن كورىپ ءجۇر ەكەن؟
اسقار جۇمادىلداەۆ: ماعان داعدارىس ەشقانداي اسەر ەتكەن جوق. ماعان داعدارىسىڭ نە، پروگرەسىڭ نە، ءبارىبىر. بيىل ايلىق كوتەرىلدى نەمەسە باعا اسپانداپ كەتتى دەپ جاتادى عوي. مەن ەشقانداي وزگەرىستى بايقاعان ەمەسپىن. دالادا قار جاۋىپ جاتىر ما، جاڭبىر جاۋىپ تۇر ما، مەنىڭ تۇسىنگەنىم مىناۋ: بۇكىل دۇنيەجۇزىندە ماتەماتيكانى ۇقپايتىن ادامدار كوپ. قازاقشالاپ ايتساق، «دۋراكتار» كوپ.
جاس قازاق: قالاممەن ەسەپ قانا شىعارماي، ولەڭ دە جازادى ەكەنسىز.
اسقار جۇمادىلداەۆ: ولەڭ جازامىن دەپ ەشكىمگە ايتپايمىن. تولستوي: «شىن ماحابباتىڭدى جۇرتقا جايىپ ايقايلاي بەرمە»، - دەمەي مە؟ مەن دە ولەڭدەرىمدى ەشكىمگە كورسەتپەيمىن. مەن ءوزىمدى اقىنمىن، جىرشىمىن دەۋدەن اۋلاقپىن. مەن ءسوز قۇراستىرىپ جۇرگەن كوپ قازاقتىڭ ءبىرىمىن. باسقا ەشكىم ەمەسپىن. قازاقتان اسىپ  قايدا بارامىن؟ مەنىكى سياقتى ءسوزدى كەز كەلگەن قازاق قۇراستىرا بەرەدى. سوندىقتان، ونى مەن ەشكىمگە ايقايلاپ ايتقىم كەلمەيدى. مەن پوەزيانى تەرەڭ تۇسىنە بەرمەيمىن. ويىما نە كەلسە، سونى جازامىن.
جاس قازاق: عىلىم مەن پوەزيانىڭ قانداي ايىرماشىلىعى بار؟
اسقار جۇمادىلداەۆ: عىلىم مەن پوەزيانىڭ ايىرماشىلىعى دەيسىز بە؟ پوەزيا دەگەن ينتيمدىك نارسە. سوندىقتان مەنىڭ ولەڭدەرىم وزىممەن بىرگە كومپيۋتەردىڭ ىشىندە قالادى.
جاس قازاق: ماتەماتيكا سالاسىندا جولىڭىزدى قۋىپ كەلە جاتقان ءىزباسارلارىڭىز بار ما؟
اسقار جۇمادىلداەۆ: كوپ دەپ تە، جوق دەپ تە ايتا المايمىن. عىلىمنىڭ ەرەكشەلىگى سول، بۇل سالاعا جۇرتتىڭ ءبارى كەلە بەرمەيدى. ويتكەنى، بۇل وڭاي ەمەس. ماحاببات تۋرالى ولەڭ جازۋ وڭاي. نە قيىنشىلىعى بار ونىڭ؟ كۇيدىم، ءسۇيدىم دەپ جازا بەر. عىلىمدى جازۋ وڭاي ەمەس...
جاس قازاق: بالا تاربيەسىنە الاڭدايتىن قازاقتىڭ ءبىرىسىز بە؟ اباي: «...ءوزى ەرجەتىپ، اتا-اناسىن تۇزاقتان قۇتقارارلىق بالا قازاقتان تۋا ما ەكەن؟ ونداي بالانى سەندەي اكە، سەنىڭ ەلىڭدەي ەل اسىراپ وسىرمەك پە ەكەن؟..» -  دەپ قىنجىلادى. بالالارىڭىزدى قالاي تاربيەلەيسىز؟
اسقار جۇمادىلداەۆ: مەدەت جانە ساعىن ەسىمدى ەكى ۇلىم بار. ۇلكەنى مەدەت - التىدا، كىشىسى ساعىن - بەستە. جۇرتتىڭ ءبارى كورە قالسا، مەنەن: «نەمەرەلەرىڭ بە؟» - دەپ سۇرايدى. مەن وعان قازىر قارسىلىق بىلدىرمەيمىن. نەمەرەم دەپ قويا سالامىن. مەن ەكى رەت ۇيلەنگەنمىن. ءبىرىنشى جەڭگەلەرىڭ قايتىس بولعان. ەكىنشى جەڭگەلەرىڭ جاس. «ءبىر بالا تۋسا، ءبىر قوزى ارتىق تۋادى، ءبىر قوزى ارتىق تۋسا، ءبىر ءشوپ ارتىق شىعادى» دەيدى. مەنىڭ ۇستانىمىم وسى.
جاس قازاق: قازىر كەيبىر قازاقتار بالالارىن «ەۆرەيشە» تاربيەلەگىسى كەلەدى. ءسىز سوندايلاردان ەمەسسىز بە؟
اسقار جۇمادىلداەۆ: مەنىڭ تاربيەم «قازاقبايشا» جانە «ەۆرەيشە». ەكەۋى دە. نەگە ەۆرەيشە دەسەڭىز، ونىڭ نەسى كەمشىلىك؟ ەۆرەي بالاسىنا: «سەن اقىلدىسىڭ، سەن ءبىلىمدىسىڭ»، - دەيدى. ونى سپورتقا بەرەدى، عىلىمعا ۇيرەتەدى، مۋزىكاعا اۋەستەندىرەدى. ءبارىن بولماعانمەن، ايتەۋىر، ءبىرىن ۇيرەنىپ شىعار دەگەن ويمەن وسىلاي تاربيەلەيدى. مەدەت دومبىرا ۇيىرمەسىنە بارادى. قازاقشا مەكتەپكە بارادى. قازاقشا سويلەيدى. سوندىقتان مەن ەكى تاربيەنىڭ ەشقايسىسىنا قارسى ەمەسپىن.
«اكەگە قاراپ ۇل وسەر» - دەيدى قازاق. مەن ۇلدارىما ءوزىمدى ۇلگى ەتىپ كورسەتەمىن. مەن اراق ىشپەيمىن، تەمەكى تارتپايمىن، بالاعات ايتپايمىن. مىنە، تاربيە دەگەنىمىز - وسى. تاربيەنى سوزبەن دە، ىسپەن دە جەتكىزۋ كەرەك. ماعان بالالارىم «ءسىز» دەيدى. ويتكەنى، ۇيدەگى جەڭگەڭىز سولاي ۇيرەتكەن. ولار شۋلاپ، مازامدى الىپ جاتسا، مەن وعان قارسىلىق بىلدىرمەيمىن. بالا بولعان سوڭ، شۋلاۋ كەرەك قوي. شۋلاماسا، وندا ول بالا بولا ما؟ ءار نارسەنىڭ ءوزىنىڭ مەزگىلى بولادى.
مەزگىلى كەلگەن سوڭ قويادى. اباي ايتپاقشى، بالا بولعان سوڭ جىلتىراققا قۇمار بولادى. نە كورسە سوعان تالپىنىپ، جالت-جۇلت ەتكەن بولسا، وعان قىزىعىپ، اۋزىنا سالىپ، بىرەۋ جىلاسا دا تۇرا جۇگىرىپ، «ول نەمەنە؟»، «بۇل نەمەنە؟»، «ول نەگە ۇيتەدى؟»، «بۇل نەگە بۇيتەدى؟» دەپ، ءبارىن سۇراپ، تىنىشتىق كورمەيدى. ءبارىن كورە بەرسىن. ءسويتىپ ۇيرەنەدى.
جاس قازاق: ومىردەن قانداي ساباق الدىڭىز؟
اسقار جۇمادىلداەۆ: قانداي ساباق العانىمدى بىلمەيمىن. ويتكەنى، مەن ومىردەن ساباقتى كۇندە الامىن. ەڭ باستى ساباق - قازاقتىڭ فيلوسوفياسى. قازاق  «اللانىڭ بەرگەن كۇنىنە قۋان، شۇكىرشىلىك ەت»  دەيدى. ءبىر كۇننىڭ ءوزى - ءبىر باقىت. مۇقاعاليشا ايتساق، مىنا جارىق ساۋلەنىڭ ءوزى - ءبىر باقىت. ماعان اسپيرانتتارىم كەلگەن كەزدە، ماتەماتيك بولسا دا، «مۇقاعاليدىڭ قانداي ولەڭىن بىلەسىڭ؟» - دەپ سۇراق قويامىن. كوبىسى ايتا المايدى.
مەن مۇمكىندىگىنشە، قاراپايىم تىرلىك قىلۋعا تىرىسامىن. ەڭبەك قىل، عىلىمىڭدى جاسا، بالاڭدى باق. جۇمىسىڭدى ادال ىستە. 
مۇقاعاليدىڭ تاعى دا ءبىر ولەڭى بار:
«ءوزىمنىڭ ەسەبىمدە،
مەن بيىل ءدال قىرىقتىڭ بەسەۋىندە.
كىم بىلەدى...
قالعان ءومىر،
نەشە جىلعا جەتەرىن،
نەشە كۇنگە...»، - دەپ كەلەتىن.
سول ايتپاقشى، «وسى ءبىر ءوزىمنىڭ ەسەبىمشە، ەلۋدىڭ مەن دە كەلدىم بەسەۋىنە». قايىن اتام تۇمانباي مولداعاليەۆ ايتىپ ەدى: «ەلۋدەن كەيىن ءومىر دەگەن زىمىرايدى» دەپ. ايتقان ءسوزى دۇرىس ەكەن. بۇگىن بايقاسام، تۋرا بەس جىلدا ماشينەممەن 40 مىڭ شاقىرىم جۇرگەن ەكەنمىن. سوندا جىلىنا سەگىز مىڭ شاقىرىم جول ءجۇرىپپىن. كۇنىنە 20 شاقىرىمنان. جىلدار دا سولاي زىمىراپ ءوتىپ جاتىر...

«جاس قازاق» گازەتى