قر بالا قۇقىقتارى جونىندەگى ۋاكىل
ساۋلە مۇحانبەديانقىزى ايتپاەۆا
حانىمعا

اشىق حات

قۇرمەتتى ساۋلە مۇحانبەديانقىزى!

مەن مەدەت كەرىمبايۇلى ناديروۆ ايدىڭ كۇننىڭ امانىندا ءوز بالالارىمدى ءوز قامقورلىعىما الا الماي ءجۇرمىن. ەلىمىزدىڭ باسقا وڭىرىندە ءوزارا كەلىسىم ارقىلى شەشىلەتىن قاراپايىم ماسەلەنىڭ ماعان كەلگەندە زاڭ جۇزىندە شەشىم تاپپاي تۇرعانىنا تاڭمىن.

تۇسىنىكتى بولۋ ءۇشىن باسىنان باستايىن.

مەن گاۋحار سەرىكقىزى دۇيسەنباەۆامەن 2006 جىلدىڭ قىركۇيەگىنىڭ 6-جۇلدىزىندا زاڭدى نەكەگە تۇرىپ، وتباسى قۇردىم. ەكى بالالى بولعاننان كەيىن 2010 جىلى جىلوي اۋداندىق سوتىنىڭ شەشىمىمەن اجىراسىپ كەتتىك.

2017 جىلدىڭ 27 جەلتوقسانىندا ايەلىم گاۋحار دۇيسەنباەۆا ومىردەن وزدى.

سودان كەيىن بالالارىمنىڭ بولاشاق تاعدىرىنا الاڭداپ، قر زاڭدارىنىڭ نەگىزىندە ءوز قامقورلىعىما الماق بولىپ، ىزدەنە باستادىم.

قازىر كاملەتتىك جاسقا تولماعان قىزىم مەن ۇلىمدى ناعاشى اجەسى گۇلباحرام راقىمقىزى دۇيسەنباەۆا زاڭعا قايشى بولسا دا، ماعان قايتارماي، ءتىپتى مەنىڭ اكەلىك قۇقىعىمدى شەكتەپ، ويىنا كەلگەنىن ىستەۋدە. ەنەم ءوزى ۆاحتالىق جۇمىس جاسايدى. ول كىسى ايلاپ جۇمىسقا كەتكەندە بالالارىم وزدەرىنە مۇلدەم تۋىستىق قاتىناسى جوق ادامداردىڭ قولىندا قالادى. ورىمدەي قىزىمنىڭ تاعدىرىن جات ادامداردىڭ تاس تالقان ەتپەسىنە كىم كەپىلدىك بەرەدى؟ ونىڭ ۇستىنە ۇلىمنىڭ، ءوز قانىمنىڭ كىم كورىنگەننىڭ ەسىگىنىڭ الدىندا جۇرگەنىن قالامايمىن.

مەن الدىمەن بالالارىمدى العىم كەلەتىنىن ايتىپ، گۇلباحرام راقىمقىزى دۇيسەنباەۆاعا اۋىزشا ۇسىنىس جاسادىم. بىراق، جاۋاپكەر ناعاشى اجەسى تۇبەگەيلى قارسى بولىپ، بالالارىممەن كەزدەسۋىمە تيىم سالدى. مەكتەپتەن كەيىن بوتاقاندارىمدى مەنىمەن كەزدەستىرمەۋ ءۇشىن ۇيدەن شىعارماي، قاماپ ۇستادى.

قازىر ءوز بالالارىمدى وزىمە قارسى قويىپ، ءتۇرلى ارەكەت جاساپ، ءتىپتى تەلەفونمەن سويلەسۋىمىزگە تيىم سالىپ وتىر. مەن جات قولىنداعى بالالارىمنىڭ اماندىعىن بىلە الماي، ۋايىمداپ ءجۇرمىن.

ءوزارا كەلىسىم ارقىلى ماسەلە شەشىلمەيتىنىنە كوزىم جەتكەن سوڭ قر-نىڭ "نەكە (ەرلى-زايىپتىلىق) جانە وتباسى تۋرالى" زاڭنىڭ 75 بابىنا سايكەس ارەكەت ەتىپ، جىلوي اۋداندىق سوتىنا شاعىمدانعان ەدىم. بىراق، زاڭ مەن جاعىمدا بولا تۇرا ءىس سوزباقتالىپ كەتتى. سوت بالالارىمدى وزىمە قايتارىپ بەرمەۋگە ەشقانداي سەبەپ تاپپاسا دا، «ارىز ءماتىنىن دۇرىس جازبادىڭ» دەگەن جەلەۋمەن مەنىڭ تالابىمدى قاناعاتتاندىرمادى.

وسى جەردە بالالارىمنىڭ قۇقىقتارىن قورعاۋى ءتيىس «اتىراۋ وبلىسى جىلىوي اۋدانى ءبىلىم ءبولىمى» ءوز جۇمىستارىنا اسا سالعىرت قاراپ وتىرعانىن ايتقىم كەلەدى. نەگىزى زاڭ بويىنشا بالالاردىڭ اناسى قايتىس بولعان سوڭ بالا قۇقىعىن قورعاۋ ورتالىعى ءۇش كۇن ىشىندە كەلىپ سابيلەردىڭ جاعدايىن ءبىلۋى كەرەك بولاتىن. مەن بۇرىنعى ايەلىم قايتىس بولعاندا جىلىوي اۋدانىنا بارىپ، ءبىر اپتا سوندا بولدىم. سول كەزدە بالا قۇقىعىن قورعاۋ ورتالىعىنان ەشكىم كەلگەن جوق. بۇل ورتالىقتىڭ تاعى ءبىر مىندەتى، اناسى قايتىس بولعان سوڭ ءبىر ايدىڭ ىشىندە بالالاردى اكەسىنە تابىستاۋى كەرەك بولاتىن. ەگەر اكەسى بالانى ءوز قامقورلىعىنا اۋلان باس تارتسا، وزگە تۋىسقاندارىنا وتكىزىپ بەرۋگە مىندەتتى. الايدا، ءبىز ايتىپ وتىرعان «اتىراۋ وبلىسى جىلىوي اۋدانى ءبىلىم ءبولىمى» قىزمەتكەرلەرى بۇنىڭ ءبىرىن دە ىستەگەن جوق.

2018 جىلى 23 قاڭتار كۇنى «اتىراۋ وبلىسى جىلىوي اۋدانى ءبىلىم ءبولىمى» باسشىسىنا بالالارىمدى وزىمە الىپ بەرۋىن سۇراپ ءوتىنىش جازدىم. ول وتىنىشىمە ەش جاۋاپ بولماعاندىقتان 17 مامىردا ەكىنشى رەت ءوتىنىش جازدىم. بۇل وتىنىشىمە اتالعان مەكەمە قىزمەتكەرلەرى ءاتۇستى جاۋاپ بەردى. بالالاردىڭ اناسىنىڭ قايتىس بولىپ كەتكەنىن بىلە تۇرا، ءبىزدىڭ ماسەلەنى «نەكە جانە وتباسى تۋرالى زاڭنىڭ 61-ءشى بابىنا» سايكەس اتا-انالارى بولەك تۇرىپ جاتقان بالالار قاتارىندا قاراستىرعانىن جەتكىزدى.

اتالعان مەكەمە مەنىڭ ءوتىنىشىم بويىنشا اناسىنان ايرىلعان بالالاردى تۋعان اكەسىنە قايتارىپ بەرگەننىڭ ورنىنا، مەنى اتا-انالىق قۇقىعىمنان شەكتەۋ تۋرالى الماتى وبلىسىنىڭ №2 كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنا شاعىم ءتۇسىردى. بىراق، سۋديا ك.ق.دۋانبەكوۆانىڭ جەتەكشىلىگىمەن وتكەن سوت وتىرىسى مەنى اتا-انالىق قۇقىعىمنان شەكتەۋگە ەش سەبەپ جوق ەكەنىن انىقتاپ، «اتىراۋ وبلىسى جىلىوي اۋدانى ءبىلىم ءبولىمىنىڭ» تالاپ ارىزىن قاناعاتتاندىرمادى.
وسى ۋاقىتقا دەيىن وتكەن سوت پروتسەسى مەنىڭ بالالارىمدى ءوز قامقورلىعىما السام دەگەن تالابىمنىڭ ورىندى ەكەنىن كورسەتىپ وتىرسا دا، قوس قۇلىنىمدى قايتارىپ الا الماي جۇرگەنىمە 8 اي بولدى. وسى ارالىقتا ۇلكەندەردىڭ تالاس-تارتىسىنان شارشاعان قوس جەتكىنشەكتىڭ پسيحولوگياسىنا اۋىر سوققى بولعانى ءسوزسىز. مەن شىنىمدى ايتقاندا بالالارىمنىڭ قانداي جاعدايدا ەكەنىن دە بىلمەيمىن. ولار مەنى ءوز تۋعان بالالارىما مۇلدە جاقىنداتپايدى، حابارلاسا دا المايمىن. ال مەنى بالاپاندارىم نە ءىشىپ، نە كيىپ ءجۇر، وقۋعا بارىپ ءجۇر مە، جوق پا دەگەن سۇراقتار مازالايدى. جاتتىڭ قولىندا جۇرگەن جەتكىنشەكتەرىمدى ءوز قامقورلىعىما السام دەگەن اكەلىك تىلەگىمنىڭ ورىندالۋى سونشا قيىنداپ كەتكەنىنە كۇيىنەمىن.

قۇرمەتتى ساۋلە مۇحانبەديانقىزى!

مەن سىزدەن ءوز قىزمەتتەرىنە سالعىرتتىقپەن قاراپ، زاڭ جۇزىندەگى مىندەتتەرىن تولىق ورىنداماي وتىرعان «اتىراۋ وبلىسى جىلىوي اۋدانى ءبىلىم بولىمىنەن» وسى ماسەلەگە زاڭ بويىنشا ارەكەت ەتۋىن تالاپ ەتۋىڭىزدى سۇرايمىن. بالا قۇقىعىن قورعاۋ ورتالىعى زاڭ بويىنشا اناسىنان ايرىلعان بالالارىمدى تۋعان اكەسىنىڭ قامقورلىعىنا وتكىزىپ بەرسە دەيمىن.

سالەمنەن مەدەت كەرىمبايۇلى

Abai.kz