ماسقارا بولدى دەگەن وسى. قۇداي-اي، قاي بەتىمدى شىمشيىن...

"قازاقستاننىڭ اكىمى پارانى رۋبلمەن الىپتى" دەپ اقپارات قۇرالدارى ۇلارداي شۋلاپ جاتىر.

سويتسەك، راس ەكەن. جەگەنى جەلكەسىنەن شىققىر الگى اكىم شىنىمەن پارانى رەسەيدىڭ رۋبلىمەن الىپ جاتقان جەرىنەن ۇستالىپتى. بەينە-جازباسى دا جاريا بولدى.

پارانى العان سولتۇستىك قازاقستان وبلىسىنا قاراستى مامليۋت اۋدانىنىڭ اكىمى. ەسىم-سويى - جاستىلەك سىزدىقوۆ.

بۇل وقيعا 1-قىركۇيەكتە بولعان. جاڭاعى اۋدان اكىمى مامليۋتكا قالاسىنا بارعان. وندا №1 گيمنازيا وقۋشىلارىن ءبىلىم كۇنىمەن قۇتتىقتاپ شىققان. سودان كەيىن سىبايلاس جەمقورلىققا قارسى كۇرەس بويىنشا ۇلتتىق بيۋرو قىزمەتكەرلەرى اكىمنىڭ پارا الىپ تۇرعان جەرىندە ۇستىنەن تۇسكەن.

سول تۇرعاندا 185 مىڭ رەسەي ءرۋبلى كولەمىندە پارا الىپ جاتقان ەكەن. بۇل تەڭگەگە شاققاندا 1 ميلليوننان اسىپ جىعىلاتىن سوما.

"شۇعىل ىزدەستىرۋ شارالارىن جۇرگىزۋ بارىسىندا سقو مامليۋت اۋدانىنىڭ اكىمى پارا العانى اشكەرەلەندى. ول جشس ديرەكتورىنان قامقورلىق جاساۋ ءۇشىن 185 مىڭ رەسەي رۋبل كولەمىندە پارا الدى دەگەن كۇدىككە ءىلىندى", - دەپ جازىلعان قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ رەسمي حابارلاماسىندا.

الگى اكىم كىناسىن سول جەردە مويىنداعان ەكەن. سوندىقتان تۇتقىندالماعان. قازىر سوتقا دەيىنگى تەرگەۋ جۇمىستارى جۇرگىزىلىپ جاتىر، - دەپ جازادى sputniknews.kz سايتى.

40 جاستاعى جاستىلەك سىزدىقوۆ 1997 جىلدان باستاپ اقجار اۋدانىندا ءتۇرلى لاۋازىمداردا جۇمىس ىستەدى. وسى جىلدىڭ قاڭتار ايىندا مامليۋت اۋدانىنىڭ اكىمى بولىپ تاعايىندالدى.

نۇكتە. ءبىزدىڭ ەلدە ءبارى مۇمكىن. تاۋەلسىزدىك العانىمىزعا 27 جىلدان اسىپ جىعىلسا دا، كەلمەسكە كەتكەن كەڭەستى ارمانداپ، ونىڭ قازىرگى مۇراگەرى رەسەيدىڭ مەملەكەتتىك ءتىلى مەن يدەولوگياسىنا تابىناتىن شەنەۋنىكتەر بىزدە جەتىپ ارتىلادى.

قۇلدىق سانادان ارىلماعان، ارىلا المايتىن، قۇلىقسىز سورلىلاردىڭ سولتۇستىكتەگى سارى ورىستىڭ ساياساتىنا سونشاما تاۋەلدىلىگىنىڭ كورىنىسى -  مىنە، شەنەۋنىكتەرىمىز، ءتىپتى پارانى دا رۋبلمەن الاتىن بولدى. ماسقارا بولدى دەگەن وسى. قۇداي-اي، قاي بەتىمدى شىمشيىن...

نۇرگەلدى ابدىعانيۇلى

Abai.kz