وزبەكتەن جەڭىلۋىمىز قىرعىزعا كورسەتكەن قىرىمىز با، بەكبولات قانايۇلى!
جيەنبەكوۆ تىزگىنىن ۇستاعان قىرعىز جۇرتىندا دۇنيەجۇزىلىك كوشپەندىلەر ويىنى ءوتىپ جاتىر، بىلەسىزدەر. كۇنى كەشە عانا كوكپاردان جارتىلاي فينال ويىندارى اياقتالدى.
قازاقستان مەن وزبەكستان قۇرامالارى كەزدەستى. نەسىن سۇرايسىز، اتۇستار ۇلى تۇلپار تاقىمداپ، ەسىن بىلگەننەن ەردىڭ ۇستىندە جۇرەتىن قازاقتىڭ "مەن" دەگەن كومانداسى جارتىلاي فينالدا جەڭىلدى. ءيا، اساۋدى قۇلاقتان باسىپ مىنگەن اتانىڭ ۇرپاقتارى، جىلقىمەن جاقىندىعى اسا كوپ ايتىلا بەرمەيتىن قوشىناسىنا ەسە جىبەردى. ەسەپ 4:5. ءسويتىپ، فينالعا شىقپاي قالدىق.
ال فينالدا الاڭ يەلەرى، ايىر قالپاق قىرعىز تۋعاندار ءبىزدى كۇتىپ تۇرعان ەدى. "كوك ءبورى" دەپ فەدەراتسيا قۇرىپ، كوكپاردان جىل سايىن حالىقارالىق جارىس ۇيىمداستىرىپ جۇرگەن ءوزىمىزدىڭ قىرعىز تۋعاندار ءبىزدى كۇتىپ تۇرعاندا، وزبەك قۇراماسى ءوتىپ كەتتى. وكىنىشتى. جارايدى، جارىستىڭ اتى جارىس. بىرەۋدىڭ بابى، بىرەۋدىڭ باعى دەگەن. ءبىز دە سول ادەپپەن ندەمەدىك.
سويتسەك، الەۋمەتتىك جەلىدە جارىستى ۇيىمداستىرىپ جۇرگەن ءبىر قىرعىزدىڭ قازاقستان قۇراماسىنىڭ جىگىتتەرىنە جەكىپ تۇرعان بەينەجازباسى جاريا بولدى. فەيسبۋكتە بۇنى تورەبەك ساعىندىقوۆ دەگەن جىگىت جاريالاپتى. ال ونى بولىسكەن ءوزىمىزدىڭ وعىز، وعىز دوعان. كورەمىن دەۋشىلەر بولسا، مىنەكەيىڭىز:
;feature=youtu.beءجا، اڭگىمەنىڭ توركىنىنە كوشەيىك...
"بىلتىر، سەندەرگە بارعاندا جاپ-جاقسى ويناپ بەردىك. بارلىق ەرەجەلەرىڭە ماقۇل بولىپ، ويناپ بەرگەنبىز. استاناعا مەن بارعانمىن. سول كەزدە قالاي بولدى؟ بارلىعىنا شىداپ، وينادىق قوي. ەندى نەگە سەندەر سولاي وينامايسىڭدار؟ ەي، مەيىرجان، وينامايسىڭدار ما؟! نامىس دەگەن بار ما، سەندەردە؟ بۇل سپورت قوي. نەمەنەگە ساياساتتى ارالاستىرىپ وتىرسىڭدار؟ "كوك بورىدەن" نەگە سونشا قورقاسىڭدار؟ بۇل ويىن عوي، سپورت قوي. جىگىتشە ويناپ، كۇلىپ ويناپ كەتپەيسىڭدەر مە، ەلدەرىڭە؟ وزبەكستان ءومىرى كوكپار ويناعان جوق. قايتىپ ۇتىلىپ باراسىڭدار ەلدەرىڭە؟ قاي بەتتەرىڭمەن باراسىڭدار؟ مەن دەگەن قازاقتىڭ نامىستى جىگىتتەرى كەلىپ، بىرەۋدىڭ استىنا جاتىپ بەرگەندەرىڭ، پازور بولدى عوي...".
بۇل الگى بەينەجازباداعى قىرعىز جىگىتىنىڭ قازاقستان قۇراماسى ويىنشىلارىنا قاراتا ايتقانى. وسىنىڭ بارلىعىن ەستىپ وتىرعان قازاقستان قۇراماسىنداعى ءبىر جىگىتتىڭ جاۋابى:
ء"بىز قولىمىزدان كەلگەنىن ىستەدىك. سىزدەر دۇعا قىلىڭىزدار...".
ەندى نەگىزگى ماسەلەگە ات باسىن بۇرايىق. ماسەلە، اناۋ قىرعىز جىگىتى ايتىپ تۇرعانداي ساياساتتا بولسا، ونىڭ سيللۋەتى تۇسىنىكتى.
قازاقستان مەن قىرعىزستاننىڭ اراسى اتامباەۆتىڭ ارانداتۋىنان كەيىن ءبىرشاما سۋىدى. ونسىز دا ەكى جاقتاعى جۇرت جاقسى بىلەتىن ءبىرلى-جارىم اڭگىمەنى قىرعىزدىڭ ەكس-پرەزيدەنتى قاتتى ايتىپ الدى. ءبىر كەزدەرى اعالاپ جۇرگەن ول، اعاسىنىڭ ارقاسىنا پىشاق ۇرعانداي بولماسا دا، ەكى ەلدىڭ اراسىندا داۋ تۇتاتىپ كەتتى.
ەستەرىڭىزدە شىعار، اتامباەۆ ءوز پارتياسىنان ۇسىنىپ، ماسكەۋدىڭ كەلىسىمىن الىپ كەلگەن جيەنبەكوۆتىڭ باستى قارسىلاسى - ومىربەك بابانوۆتى قازاقستان پرەزيدەنتى قولداپ شىقتى. الماتىدا ەكەۋارا كەزدەستى دە.
وسىدان كەيىن-اق، شالا بۇلىنگەن الماس بايكە، اعاسىن اشىق قارالاپ، بەيساياسي دۇنيەلەردى داۋلاپ، دولداندى. ارادا شەكارا جابىلىپ، ەكى ەلدىڭ كاسىپكەرلەرى قىپ-قىزىل شىعىنعا باتتى. قازاقستان مەن قىرعىزستان اراسىندا، كومىر جانە سۋ داۋى قايتا ۋشىقتى.
مىنە، وسىدان كەيىن، قازاقستاننىڭ وا-داعى ينتەگراتسيالىق ساياساتى وزبەككە قاراي ويىستى. يسلام اكا كاريموۆتىڭ قازاسىنان كەيىن وزبەكستان تاعى بۇيىرعان شاۆكات ميرزيەۆ سەرگەك ويلايتىن جىگىت ەكەن، قازاقستانمەن قارىم-قاتىناستى نىعايتۋ ءۇشىن بارىن سالدى. بىرنەشە كەزدەسۋ ءوتتى. ارينە، پرەزيدەنتتىك دەڭگەيدە. بىرنەشە مەملەكەتارالىق قۇجاتتار قابىلداندى.
قازىر وزبەكستانمەن ارا قاتىناسىمىز جاقسى. جىلى. ال پرەزيدەنتتىك كرەسلو بۇيىرعان سوڭ ساۋرانباي بايكە، اۋەلى رەسەي فەدەراتسياسىمەن ستراتەگيالىق قارىم-قاتىناسىمىزدى رەتتەيمىز دەدى. سولاي بولدى دا.
دەگەنمەن، 2017 جىلى نازارباەۆ پەن جيەنبەكوۆ كەزدەسكەندە، ساۋرانباي بايكە نۇرسۇلتان نازارباەۆتىڭ ارقاسىنان قاعىپ، "اعام" دەپ ەدى. اعا دەمەكشى، اتامباەۆ تا "اعالاپ" ءجۇرۋشى ەدى عوي.
ەندى مىنە، ەكى ەلدىڭ اراسىنداعى سول ءبىر سالقىندىق سپورتتا دا سەزىلە باستاعان سەكىلدى. قازاقستان مەن قىرعىزستان كوكپارعا قاتىستى داۋلاستى، بۇرىن. كەيىن ءار تاراپ ءوز ەرەجەسىن بەكىتىپ، ءوز جوندەرىن تاپقان. ەندى، مىنە...
قازاقستان قۇراماسى "كوك بورىدەن" قورىقتى ما، جوق الدە قىرعىز كوكپارشىلارىنان با؟ بۇل - ەندى ەكىنشى ماسەلە. اتالعان جارىسقا بارعان قازاقستان قۇراماسى اۋەلدە كوكپار شاباتىن ات تاپپاي، جۇرت الدىندا ماسقارا بولعان. ءبىزدىڭ قۇراما سول كەزدە جارىسقا قاتىسۋدان باس تارتتى. كەيىن، قىرعىزدار اتىن بەرىپ، اياعىندا ۇلتتىق قۇراما جارتىلاي فينالعا جەتكەن.
جارتىلاي فينالدا وزبەكتەردەن ۇتىلىپ، ءۇشىنشى ورىن ءۇشىن رەسەي قۇراماسىمەن تارتىساتىن بولدى. سەنەسىز بە؟ سەنسەڭىز دە - سول، سەنبەسەڭىز دە - سول.
قازاقستان رەسپۋبليكاسى ۇلتتىق سپورت تۇرلەرى قاۋىمداستىعى بار. ونىڭ پرەزيدەنتى - بەكبولات قانايۇلى تىلەۋحان. بەكبولات قانايۇلى - قر پارلامەنتى ماجىلىسىندە دەپۋتات. جوعارىداعى بەينەجازبادان كەيىن بۇل جەڭىلىستى ساياساتقا اپارىپ تىرەۋدەن وزگە جول قالمادى بىزگە. بەكبولات قانايۇلى، ايتىڭىزشى! وزبەكتەن كوكپاردان ۇتىلۋىمىز، قىرعىزعا كورسەتكەن قىرىمىز با؟ وتكەندە ات جوق دەپ، الاتايداي ءبۇلىنىپ ەدىك. ەندى، مىنە، كىرەرگە تەسىك تاپپاي قالدىق. قازاقتى جەرگە قاراتقان وسى وقيعاعا ۇلتتىق سپورت تۇرلەرى قاۋىمداستىعىنىڭ باسشىسى رەتىندە سىزدەن جاۋاپ كۇتەمىز.
قىرعىز جۇرتى دۇنيەجۇزىلىك كوشپەندىلەر ويىنىن وسىمەن ءۇشىنشى رەت وتكىزىپ وتىر. ول ويىنعا 50-دەن اسا ەل كەلىپ قاتىسىپ جاتىر. كەلەسى ويىن - تۇركيادا، سودان كەيىنگىسى ءازىربايجاندا وتەدى دەپ بەلگىلەنىپ قويعان.
باسقا-باسقا قازاق ەجەلدەن كوكپار تارتادى. جۇرە كەلە ءسىڭىستى ەمەس، تۋا ءبىتتى ءتول سپورتىمىز. قازاقستاننىڭ كوكپارشىلارى فينالدا قىرعىزدارمەن كەزدەسپەۋدىڭ امالىن وسىلاي تاپقانى ما؟ جوق الدە، بۇنىڭ ارتىندا سىبايلاس جەمقورلىقتىڭ جەلى بار ما؟
بۇعان بىرەۋ جاۋاپ بەرۋگە ءتيىس بولسا، ۇلتتىق سپورت تۇرلەرى قاۋىمداستىعىنىڭ تىزگىنىن ۇستاپ وتىرعان بەكبولات قانايۇلى جاۋاپ بەرۋى كەرەك دەپ ويلايمىز. قانشا دەگەنمەن، سوزگە جۇيرىك ادام عوي. ءسوزىمىز جەردە قالماس...
نۇرگەلدى ابدىعانيۇلى
Abai.kz
