بەساعاشتىڭ تاۋ جاق بوكتەرىندەگى قىراتتاردا ورنالاسقان ساياجايعا كۇن باتا جاياۋ جەتۋدىڭ ءوزى قيامەت. تىك بەت توسكەي، قۇلاما ىلدي، قوس قاپتالدان قاراۋىتقان قالىڭ اعاش - ايىر ۇستاعان اجالدى تۇمشالاپ تۇرعانداي كورىنەتىن.

بىراق امال جوق، مەكتەپ پەن جۇمىستان قايتقان جۇرتقا كوكتەم مەن كۇزدىڭ لايساڭىندا باتپاق كەشىپ، وسى جولمەن جۇرۋىنە تۋرا كەلەدى. تۇرعىندار وسى ازاپتارىن ايتىپ، اۋدان اكىمدىگىنە قانشا رەت شاعىمدانسا دا، قالادان قاتىنايتىن اۆتوبۋس جۇرگىزۋگە جەرگىلىكتى بيلىكتىڭ «شاماسى» جەتپەي قويدى. ايتا-ايتا شارشاعان ساياجايلىقتار بەساعاشتىڭ تۇسىنداعى تاس جولدان توتەلەتىپ، ءۇش شاقىرىم جەر جاياۋ-جالپىلاپ قاتىناپ ءجۇردى. جانايىمنىڭ اكەسى عالي جەكەمەنشىك فيرمادا كۇزەتشى بولىپ ىستەيتىن. بار جيناعان اقشاسى وسى ساياجايداعى جەر تەلىمىنە عانا جەتىپ، بۇدان ءتورت جىل بۇرىن شاعىن ءۇي سالدى. وقۋدان قايتقاندا، كۇن سايىن وسى سوقپاقپەن جۇرەتىن جانايىم بىتپەي تۇرعان قاراڭعى قۇرىلىس، قالىڭ اعاش اراسىنان قاتتى ۇرەيلەنىپ وتەتىن. مۇمكىندىگى بولسا، قىرعا شىعار جولدا اۋىلداستارىنىڭ ءبىرىن كۇتىپ تۇرىپ، ىلەسە كەتۋشى ەدى. ون جەتىدەگى جەلكىلدەگەن بوي­جەتكەن ءوز اجالىنا ءبىر كۇنى ناق وسى جەردە كەزدەسەتىنىن قايدان ءبىلسىن؟!

بەساعاشتىڭ تاۋ جاق بوكتەرىندەگى قىراتتاردا ورنالاسقان ساياجايعا كۇن باتا جاياۋ جەتۋدىڭ ءوزى قيامەت. تىك بەت توسكەي، قۇلاما ىلدي، قوس قاپتالدان قاراۋىتقان قالىڭ اعاش - ايىر ۇستاعان اجالدى تۇمشالاپ تۇرعانداي كورىنەتىن.

بىراق امال جوق، مەكتەپ پەن جۇمىستان قايتقان جۇرتقا كوكتەم مەن كۇزدىڭ لايساڭىندا باتپاق كەشىپ، وسى جولمەن جۇرۋىنە تۋرا كەلەدى. تۇرعىندار وسى ازاپتارىن ايتىپ، اۋدان اكىمدىگىنە قانشا رەت شاعىمدانسا دا، قالادان قاتىنايتىن اۆتوبۋس جۇرگىزۋگە جەرگىلىكتى بيلىكتىڭ «شاماسى» جەتپەي قويدى. ايتا-ايتا شارشاعان ساياجايلىقتار بەساعاشتىڭ تۇسىنداعى تاس جولدان توتەلەتىپ، ءۇش شاقىرىم جەر جاياۋ-جالپىلاپ قاتىناپ ءجۇردى. جانايىمنىڭ اكەسى عالي جەكەمەنشىك فيرمادا كۇزەتشى بولىپ ىستەيتىن. بار جيناعان اقشاسى وسى ساياجايداعى جەر تەلىمىنە عانا جەتىپ، بۇدان ءتورت جىل بۇرىن شاعىن ءۇي سالدى. وقۋدان قايتقاندا، كۇن سايىن وسى سوقپاقپەن جۇرەتىن جانايىم بىتپەي تۇرعان قاراڭعى قۇرىلىس، قالىڭ اعاش اراسىنان قاتتى ۇرەيلەنىپ وتەتىن. مۇمكىندىگى بولسا، قىرعا شىعار جولدا اۋىلداستارىنىڭ ءبىرىن كۇتىپ تۇرىپ، ىلەسە كەتۋشى ەدى. ون جەتىدەگى جەلكىلدەگەن بوي­جەتكەن ءوز اجالىنا ءبىر كۇنى ناق وسى جەردە كەزدەسەتىنىن قايدان ءبىلسىن؟!

جانايىم -  سوڭعى جىلعا دەيىن ءبىر ءۇيدىڭ ۇلى دا، قىزى دا بولىپ، ەركىن ءوستى. اكە-شەشەسى جالعىز قىزدىڭ قولىنان قاقپادى. بىراق ءبىر ءۇيدىڭ جالعىزى سياقتى شولجاڭ ەمەس، مىنەزى جۇمساق، ەلگەزەك ءارى اقىلدى ەدى. ىشتەي «تاعى دا باۋىرىم بولساشى» دەپ تىلەيتىن. قالاداعى №4 مەكتەپتى بىتىرگەن كەزدە، اللا تىلەگىن قابىل الىپ، ون التى جىلدان سوڭ، اناسى قىز بوساندى. جانايىمنىڭ قۋانىشىندا شەك جوق ەدى. كۇن سايىن پەدكوللەدجدەگى وقۋدان گۇلايىمدى اڭساپ، ساعىنىپ جەتەتىن. ءدال سول كۇنى قىرسىققاندا، اۋىلعا سەرىك بولىپ بارار ەشكىم تابىلماي قالدى. ىلديعا تومەن ءتۇسىپ، قاراۋىتقان تالداردىڭ اراسىنا كىرە بەرگەندە، سوڭىنان اڭدىپ كەلە جاتقان الدەبىرەۋ قارۋلى قولىمەن اۋزىن جاۋىپ، جاقىن ماڭداعى قۇرىلىسقا قاراي سۇيرەي جونەلدى. ءناپ-نازىك قىزدىڭ قارسىلىق كورسەتۋگە دارمەنى قالمادى. پوليتسيا قىزمەتكەرلەرى جانايىمنىڭ زورلىق پەن قورلىقتان ازاپ شەككەن دەنەسىن ءتورت كۇن وتكەندە قۇرىلىسى بىتپەگەن ءۇيدىڭ جەرتولەسىنەن تاۋىپ الدى...

تالعاردىڭ تاس جولىمەن تىك ءجۇرىپ، تاباعاننىڭ بۇرىلىسىنان ىلگەرى وتتىك. جول شەتىندە تاندىر نان مەن ءسۇت ساتاتىن ءۇي كوپ. سونىڭ ءبىرىن پوليتسيا كۇزەتىپ تۇر. الگى ءتارتىپ ساقشىلارى تۇرعان ءۇي - جانايىم سىدىقوۆانى ولتىرگەن 22-دەگى كۇرد جىگىتىنىڭ ءۇيى بولىپ شىقتى. پوليتسيا قىزمەتكەرلەرى ىشكە كىرۋگە رۇقسات بەرمەدى. «بۇل ءۇيدىڭ ادامدارى كەشە تۇگەل كوشىپ كەتتى. ءۇيدى ساتپاقشى. ال اۋلانى سۋرەتكە تۇسىرۋگە بولمايدى». كەلەسى ءۇيدىڭ ەسىگىنىڭ الدىندا ورىس شالى نان ساتىپ وتىر. اڭگىمەگە سول كىسىنى تارتتىق: «مەنىڭ اتى-ءجونىم - يۆان گۋبنيتسوۆ. بۇل وتباسىن جاقسى بىلەم. كەزىندە كولحوزدا جۇمىس ىستەدى. كۇدىكتى جىگىتتىڭ اتاسى دا، اكەسى دە. جاقسى وتباسى بولاتىن. ەندى، بالالارىنا جوندەپ تاربيە بەرە الماعان شىعار. سوندىقتان، الگى بالا ويىنا نە كەلسە، سونى ىستەدى. ءوز باسىم سولاي دەپ ويلايمىن».  ودان سوڭ، جانايىمنىڭ مەكەنجايىن ىزدەپ، جوعارى ورلەدىك. جول بويىندا كەزدەسكەن جىگىت اعاسىنان ءجون سۇرادىق. سىرتتاي كورسەتىپ جىبەرمەك بولىپ، ماشيناعا جايعاستى. «قىزدى ءولتىرىپ كەتتى دەگەندى ەستىپ، وسى ماڭنىڭ تۇرعىندارى ءبىر دۇرلىكتى. ءبارى كۇدىكتىنىڭ ۇيىنە جينالىپ بارماق بولعان. سوسىن، جۇمادا اۋىل ورتالىعىنداعى اكىمدىكتىڭ تۇسىنا جينالىپ، كۇردتەردى كوشىرىپ جىبەرۋ تۋرالى تالاپ قويدى. ال جىگىتتىڭ اتا-اناسىنىڭ «قازاقتار جينالىپ كەلىپ، ءۇيدى ورتەمەك بولدى» دەۋى - وتىرىك. ادەيى سولاي بايبالام سالىپ جاتىر. انە، قۇلاما قاباقتاعى كيىز ءۇي تىگىلىپ تۇرعان ءۇيدى كوردىڭىز بە؟ سول ءۇي.  مىنا تاۋدى اينالىپ باراسىز. مەن وسى جەردەن ءتۇسىپ قالايىن». ساياجايعا بۇرىلعاننان ويدىم-ويدىم، كەيبىر جەرىندە مۇزى ەرىمەگەن قيسىق جولعا تۇستىك. كوشەنىڭ ەڭ تۇبىندە تاعى دا پوليتسيانىڭ ءبىر كولىگى تۇر ەكەن، توقتاتىپ، ءجون سۇرادى. كەلگەن ماقساتىمىزدى بىلىسىمەن، دەرەۋ ۇلكەن جورنالعا اتى-ءجونىمدى، كەلۋ ماقساتىمدى، كولىگىمنىڭ ءنومىرى مەن قۇجاتىن تىركەپ الدى. ودان سوڭ، تومەن بۇرىلىپ، ۇلكەن جوتانىڭ بەل ورتاسىنداعى بالشىعى بەلدەن كەلەر كوشەگە تۇستىك. ەڭ شەتكى ءۇي - جانايىمدىكى. ەسىك الدىندا اكەسىنەن وزگە ەشكىم جوق. «ەسىمدى ەندى جيىپ جاتىرمىن، - دەدى قارالى اكە كۇرسىنىپ. - قازىر سىزگە ەشتەڭە دەي المايمىن. تاعى دا بىرنەشە كۇن ءوتسىنشى، سوسىن ءوزىم حابارلاسام... قۇداي ءۇشىن، ايەلىمە جولىعا كورمەڭىز. قايتا-قايتا تالىقسىپ جاتىر. قازىر ءسىزدى كورسە، تاعى دا قۇلايدى. قىزىم پەدكوللەدجدە وقيتىن. ۇستاز بولۋدى ارماندادى. وسى كوللەدجدى بىتىرگەسىن، ۋنيۆەرسيتەتكە وقۋعا تۇسەمىن دەۋشى ەدى. ارمانى كوپ بولاتىن. ءۇھ!.. ۇيدە ەش سۋرەتى قالمادى. ءبارىن پوليتسيا اكەتىپ قالدى. ەندى نە بولسا دا، ءبىر پوليتسيانىڭ قولىنا بەردىك، كۇدىكتىنى. زاڭ بويىنشا جازاسىن السىن دەپ وتىرمىز. باسقا ايتارىم جوق». فوتواپپاراتتى الىپ، وڭتايلانعانىمىز سول ەدى، باسىن شايقادى دا ىشكە ەنىپ كەتتى. امال جوق، قايتادان كەلگەن ىزىمىزبەن كەرى قايتتىق. جولاي، ەسىك الدىندا اعاشتان الدەنە جاساپ جاتقان جاس جىگىتتى كەزدەستىردىك. «جانايىمدى سىرتتاي تانيتىنمىن. جاقسى قىز ەدى. اشىقجارقىن بولاتىن...» اسقاردىڭ اڭگىمەسىنە اناسى كۇلشات ارالاستى: «جانايىمدى ءولتىرىپ كەتتى دەگەندە، جاقسى تانىماساق تا ۇيدە ءبارىمىز ءبىر جىلاپ الدىق. كوشەدە كورگەندە سالەمدەسىپ تۇراتىن يبالى-اق قىز ەدى! اكىم بۇل ساياجايعا اۆتوبۋستى ەندى شىعاراتىن بولىپتى. ولىك شىقپاي، كولىك شىعاراتىن ءتۇرى دە جوق ەدى! اۋىلدا ءالى كۇنگە دەيىن اۋىزسۋ جوق. جازدا باقشانى سۋارۋعا بەرەدى دە، قىس بويى ءۇش شاقىرىم جەردەن تاسيمىز. ونىڭ نەسىن ايتا بەرەمىز؟! ءبارىبىر تۇك ىستەمەيدى اكىم!» - دەپ قولىن ءبىر سىلتەدى. اڭگىمە سونىمەن ءتامام بولدى.  قايتادان تار جول، تايعاق كەشىپ، ۇلكەن تاس جولعا امان جەتتىك. وڭ جاق قاپتالدا قىرشىننان قيىلعان قىزدىڭ ءۇيى، بىردە قىر، بىردە ساي - بۇرىن جۇرگەن سوقپاعى، قالىڭ اعاش قالىپ بارادى. كۇن شاقىرايىپ تۇرسا دا، الگى ساي-سالا مەنىڭ كوزىمە دە اسا ۇرەيلى بولىپ كورىندى...

شۇعىل سۇحبات

ءبىز وسى مالەلە بويىنشا الماتى وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى كوبەيحان نۇراحمەتتىڭ پىكىرىن بىلدىك.

جاس قازاق: بەساعاشتى دۇرلىكتىرگەن وقيعانىڭ ءمان-جايىن كەڭىرەك بايانداساڭىز.

كوبەيحان نۇراحمەت: اقپان ايىنىڭ سوڭىندا ءبىز بەساعاش اۋىلىنىڭ ماڭىنان 17 جاستاعى  قىزدىڭ ءمايىتىن تاپتىق. ءالى كامەلەتكە تولماعان. زورلىقپەن ولگەنى كورىنىپ تۇر. سوت-دارىگەرلىك ساراپتامانىڭ قورىتىندىسى بويىنشا، باسىنان الدەكىمنىڭ قاتتى سوققىمەن ۇرىپ ولتىرگەنى بەلگىلى بولدى. ارادا ەكى-ءۇش كۇن وتكەسىن، بەساعاش اۋىلىنىڭ ءبىر تۇرعىنىن كۇدىكتى رەتىندە قولعا تۇسىردىك. جيىرما ەكىدەگى جۇمىسسىز، بۇرىن سوتتى بولعان ازامات. بىراق ماسەلە ونىڭ ۇلتىندا ەمەس. قىلمىستىڭ ۇلتى جوق. وسى ازاماتتىڭ اياقكيىمىن الىپ تەكسەرۋگە جىبەردىك. وكشەسىنەن مارقۇم قىزدىڭ شاشى مەن قان تامشىسى تابىلدى. كۇدىكتى ءوز قىلمىسىن بىردەن مويىندادى. پروكۋروردىڭ سانك­تسياسى بويىنشا ونى قاماۋعا الىپ، ۋاقىتشا قاماۋ يزوليا­تورىنا جاپتىق.

جاس قازاق: قىز بەن جىگىت ءبىر-ءبىرىن تانىعان با؟ سويلەسىپ تۇرىپ پا؟ كۇدىكتى بۇل وقيعا تۋرالى نە دەيدى؟

كوبەيحان نۇراحمەت: ولار ءبىر-ءبىرىن اۋىلداس رەتىندە سىرتتاي ءبىلۋى مۇمكىن، بىراق جاقىن ارالاسپاعان. كۇدىكتىنىڭ ايتۋىنشا، ۇيىندە اراق ءىشىپ وتىرىپ، ساياجايعا ءوتىپ بارا جاتقان قىزدى كورگەن. شىعارىپ سالماقشى بولىپ سوڭىنان ىلەسىپتى. ال جانايىم بولسا: «شىعارىپ سالمايسىڭ» دەپ قارسىلاسىپتى. كۇدىكتى وعان دا كونبەي، تانىسپاقشى بولىپتى. قىز وعان دا كونبەگەن. سوسىن ونى ۇرىپ ءولتىرىپ قويىپتى. قىسقى اياقكيىمىنىڭ وكشەسىنەن تابىلعان قاننىڭ ءىزى مەن شاشتىڭ قالدىعى - بويجەتكەننىڭ باسىنان تەپكەنىن ايعاقتاپ وتىر.

جاس قازاق: قىز ولگەننەن كەيىن زورلاعان با؟

كوبەيحان نۇراحمەت: جوق. ءازىر بۇل انىقتالعان جوق. سوت-دارىگەرلىك ساراپتامانىڭ قورىتىندىسى ءالى تولىق شىققان جوق. قىز ولگەسىن، ونىڭ قالتاسىنداعى تەلەفونى مەن ءجۇز تەڭگەسىن الىپ كەتكەن. ءمايىتتىڭ جانىنداعى سومكەسىن اشقاندا، ىشىندە اقشاسى تۇرعان بولاتىن.

جاس قازاق: كۇدىكتىنىڭ ىزىنە قالاي ءتۇسىپ، قالاي ۇستادىڭىزدار؟

كوبەيحان نۇراحمەت: ءبىز ەكى تاۋلىك بويى بەساعاشتى ارالاپ، تۇگەل «توڭكەرىپ» شىقتىق. وبلىستان، تالعاردان كەلگەن شۇعىل ىزدەستىرۋ توبى كوپ تەر توكتى. سوسىن، انا كۇدىكتىنىڭ الىپ كەتكەن تەلەفوندى انىقتاپ، سول ارقىلى جىگىتتى ۇستادىق.

جاس قازاق: سوندا كۇدىكتىنىڭ ىزىنە ناقتى قالاي تۇستىڭىزدەر؟

كوبەيحان نۇراحمەت: شۇعىل ىزدەستىرۋ كەزىندە بىزگە شۇعىل اقپارات كەلىپ ءتۇستى. ونىڭ بۇگە-شىگەسى - تەرگەۋ قۇپياسى. قازىر قىلمىستىق ءىس ەكى باپ بويىنشا قوزعالىپ جاتىر. ءبىرىنشىسى - كىسى ءولتىرۋ، ەكىنشىسى - قاراقشىلىق شابۋىل. ەندى سوت-دارىگەرلىك ساراپتاما قورىتىندىسى مارقۇمدى «زورلانعان» دەپ شەشىم شىعارسا، وندا «قىز زورلاۋ» بابى قوسىلادى. ونداي بولماعان جاعدايدا، «زورلاماق بولدى» دەگەن ايىپ تا تاعىلۋى مۇمكىن.

جاس قازاق: بۇل قىلمىستىق ءىستى جالعىز كاكا كوعلى عانا جاسادى ما، جوق ونىڭ باسقا دا سىبايلاستارى بولدى ما؟

كوبەيحان نۇراحمەت: قازىر وسىعان قاتىستى تەرگەۋ ارەكەتتەرى ءجۇرىپ جاتىر. ونىڭ ءبارىن باسپاسوزگە تولىق اشىپ ايتا المايمىز. بىراق ازىرشە كۇدىكتى تەك ءوز موينىنا عانا الىپ وتىر.

جاس قازاق: سىزدەر بۇل قىلمىستىڭ «توپپەن جاسالۋى مۇمكىن» دەگەن نۇسقاسىن قاراستىرمادىڭىزدار ما؟

كوبەيحان نۇراحمەت: تەرگەۋ ارەكەتتەرى كەزىندە وقيعانىڭ جالعىز ءتۇرى عانا ەمەس،  بارلىق نۇسقاسى قارالادى. بۇل عانا ەمەس، كەز كەلگەن قىلمىستىق ءىستى تەكسەرۋدە سولاي. ءبىز قىلمىسكەرلەردى ۇلتىنا قاراپ بولمەيمىز. بىزگە زاڭ بۇزعان ادام قازاق پا، ورىس پا، ءازىربايجان با، كۇرد پە - ءبارىبىر. بىزگە ەڭ باستىسى - كۇدىكتىنىڭ بارلىق ارەكەتىن جان-جاقتى، مۇقيات تەكسەرىپ شىعۋ. كەيبىرەۋلەر پوليتسيا تۋرالى باسقا پىكىر ايتادى. بىراق ءبىز دە ادامبىز، ءبىزدىڭ دە ءوسىرىپ وتىرعان ۇلىمىز، قىزىمىز بار. سوندىقتان، قىلمىس جاساعان ادامدى بەت جوق جىبەرە سالمايمىز. مىنا جاعدايدا دا ەكى تاۋلىك بويى قانشاما ادام ۇيىقتاماي، اياعىمىزدان تىك تۇردىق.  ەندىگى ماسەلە - وسى ءىستىڭ تولىق جانە جان-جاقتى اشىلىپ، سوتقا وتكىزىلۋىندە. ال كەسىلەتىن جازانى - سوت پەن پروكۋراتۋرا انىقتايدى.

P.S. ەرتەڭىنە جانايىم سىدىقوۆا وقىعان الماتىداعى №1 قازاق مەملەكەتتىك پەداگوگيكا كوللەدجىنە ات باسىن بۇرعانبىز. ۇستازداردىڭ پىكىرىن قاز-قالپىندا بەرۋدى ءجون كوردىك.

ءجاميلا مىرزابەكوۆا,

قازاق مەملەكەتتىك №1 پەداگوگيكالىق كوللەدج  ديرەكتورىنىڭ تاربيە ءىسى جونىندەگى ورىنباسارى:

«جانايىم سىدىقوۆا - ساباقتى جاقسى وقيتىن، قاق-سوقپەن ءىسى جوق، ءاپ-ادەمى قازاقتىڭ ورىكتەي قىزى بولاتىن. بيىل سوڭعى كۋرستا وقيتىن. ساباقتان قالىپ، كەشىگىپ، قوعامدىق جۇمىستارعا قاتىسپايتىن بولسا، اڭگىمە ءبىر باسقا ەدى. بالالاردىڭ اراسىندا ءبىر-بىرىمەن كىشكەنتاي بولسا دا كەلىسپەۋشىلىكتەر بولىپ قالادى. جانايىم ونداي جەردەن دە كوزگە تۇسكەن ەمەس. ونىڭ ءۇيى قاشىق بولسا دا، ساباقتان قالمايتىن. سونداي ءبىر تاربيەلى، ءاپ-ادەمى بالا ەدى. قايتىس بولعانىن ەستىپ، ءىشىمىز قان جىلادى. ستۋدەنتتەر قاتتى قايعىردى. ساباعىنا قاراپ وتىرساڭىز، بىرىڭعاي «ءتورت» پەن «بەس» ەدى... ەندى ءبىر ءۇيدى، ءبىر ءۇيدى ەمەس، بۇكىل دوس-جارانىن، تانىستارىن اڭىراتىپ كەتكەن حايۋاندى ەڭ جوعارعى جازاعا كەسسە دەيمىز».

قارلىعاش مۇساحانوۆا,

مارقۇم جانايىم سىدىقوۆانىڭ كوللەدجدەگى كۋراتورى:

«بيىل اقپاننىڭ سوڭىندا ءۇشىنشى كۋرستىڭ ستۋدەنتتەرى پراكتيكاعا كەتكەن بولاتىن. بۇل وقيعا سول كەزدە ورىن الىپ وتىر. جانايىمنىڭ مىنەزى تىم تۇيىق، شەشىلىپ، سىرىن اشقان ەمەس. توبىنداعى ەكى-ءۇش قىزبەن جاقىن دوس بولدى. قۇربىلارىنىڭ ايتۋىنشا، ۇيىندە كىشكەنتاي ءسىڭلىسى بار ەكەن، ساباق بىتە سالىسىمەن ۇيىنە، سول سىڭلىسىنە اسىعاتىن. دۇكەننەن ءتاتتى-پۇتتى، ويىنشىق ءجيى ساتىپ الادى ەكەن. ءوزى اعىلشىن اندەرىن جاقسى كوردى. كەشە جەرلەگەندە بۇكىل كۋرستاستارى بولىپ، ۇيىنە بارىپ-قايتتىق. وي-ساي، قالىڭ اعاش، وتە قورقىنىشتى جولمەن جۇرگەن ەكەن. توپپەن بارساق تا، جولدان قاتتى قورىقتىق. ءبىزدىڭ ويىمىزشا، مۇنداي جاۋىزدى ەڭ قاتال جازاعا كەسۋ كەرەك!».

«جاس قازاق» گازەتى