مەن وسى، تۇرسىنجان اعا ايتپاقشى، "قازاقتىڭ اكىمقۇمارلىعىنا، الدە اكىمجاندىلىعىنا تاڭ قالامىن". "استاناعا كىم اكىم بولىپتى؟". "الماتىعا كىم بولايىن دەپ جاتىر ەكەن؟". فەيسبۋكتى اشىپ قالساڭ دا، تانىسىڭمەن جولىعىپ قالساڭ دا اڭگىمە وسى. قۇددى كۇللى قازاق اكىمشىلىكتە جۇمىس ىستەيتىن سياقتى. اكىمشىلىكتەگىلەردى تۇسىنۋگە بولادى: قانشا دەگەنمەن جاڭا باستىق كىم بولادى، قانداي ادام كەلەدى، جۇمىسىمىزدان ايرىلىپ قالمايمىز با... دەگەن سەكىلدى ايتەۋىر ناقتى ۋايىم، انىق الاڭ بار. باسقامىزعا نە جوق؟

ال بىرەۋ بولىپتى دەلىك. اكىم. ودان ءسىزدىڭ ومىرىڭىزگە كەلىپ-كەتەر نە بار؟ كەتكەن اكىممەن قانداي قارىم-قاتىناستا بولساڭىز (ياعني، ەشقانداي قارىم-قاتىناسىڭىز بولماسا), كەلگەن اكىممەن دە سونداي "بايلانىستا" بولارىڭىز انىق قوي. "ويباي، ءۇش كۇن بولدى، اكىمسىز وتىرمىز" دەپ شۋلاستى وتكەندە ءبىر وبلىس ورتالىعىنىڭ فب-شنيكتەرى. كۇندە جۇمىسىن سول اكىم ىستەپ بەرىپ، بالا-شاعاسىن سول اكىم اسىراپ وتىرعانداي... اكىم تاعايىندالىپ ەدى، ءبارى شۋلاپ الا جونەلدى: "اكىمىمىز كەلدى", "بىزگە اكىم بوپ پالەنشە كەلدى", "ەندى ءبىزدىڭ دە اكىمىمىز بار"... بۇ نە دەگەن اكىمقۇمارلىق؟ نە دەگەن اكىمجاندىلىق؟ چتو زا اكيموزاۆيسيموست؟

وسىعان دەيىن قىرىق اكىم كەلىپ، قىرىق اكىم كەتپەدى مە؟ نە تىندىرىپ ەدى؟ قازاققا نە ىستەپ قويىپ ەدى؟ ءتىپتى بىردەمە ىستەيمىن دەپ تىنباي تىرتىڭداسا دا، الەمگە ايگىلى اكىمنەن اسىپ قايدا بارادى؟ سونىڭ تاپسىرماسىن ورىنداپ قانا وتىرماي ما ونسىز دا؟..

كىم اكىم بولىپ كەلسە دە، ءسىزدى كەڭەسشىلىككە شاقىرا قويماس. ودان دا بوس ءسوز، قۇر ىرجاڭدى قويىپ، جۇمىسىڭىزدى ىستەڭىز: ءبارىبىر ءسىزدىڭ وزىڭىزدەن باسقا سەنەرىڭىز دە، سۇيەنەرىڭىز دە جوق...

ساكەن سىبانباي

Abai.kz