قىزىلوردانىڭ قوعامدىق كولىگىنىڭ قىزمەتىنە قاتىستى جولاۋشىلاردىڭ وكپە-رەنىشى تۋرالى ماتەريالدار بۇقارالىق اقپارات قۇرالدارىندا بۇدان بۇرىن دا تالاي رەت جازىلعان بولاتىن. سەبەبى ءبىز وركەنيەتتى ەل بولۋعا ۇمتىلىپ جاتقاندىقتان بۇل ماسەلە زاڭ جۇزىندە قوعامدىق پىكىردىڭ نەگىزىندە رەتتەلۋى كەرەك. بىراق، وكىنىشكە وراي، ءبىز سول وركەنيەت كوشىنەن ءبىرشاما قالىس كەلە جاتقان جايىمىز بار.

جۋىردا مەن وبلىس اكىمىنىڭ سايتىنا ارنايى حات جازدىم. وندا بىلاي دەلىنگەن ەدى. «قۇرمەتتى قىرىمبەك ەلەۋۇلى! قىزىلوردالىقتار ءسىزدىڭ جولاۋشىلار تاسىمالداۋدى جاقسارتۋ ماقساتىندا جاڭا اۆتوبۋستار اكەلگەنىڭىزدى جاقسى بىلەدى جانە ونى زور قۋانىشپەن قارسى الدى. الايدا بانك نەسيەسىنە الىنعان سول اۆتوبۋستاردىڭ اقشاسىن قايتارۋ قيىنعا سوعىپ، ول جولاۋشىلاردىڭ جولپۇلىن ءوسىرۋ ەسەبىنەن وتەلىپ جاتقانىن ءسىز دە بىلەسىز دەپ ويلايمىن.

جۋىردا ۇلكەن جىبەك جولى كوشەسىنەن №5 «گازەل» شاعىن اۆتوبۋسىن «سىرداريا» شاعىن اۋدانىنىڭ كوپقاباتتى ۇيلەرىنىڭ، تار كوشەلەرىنىڭ اراسىنان جۇرگىزىپ قويدى. بۇعان حالىقتىڭ ءبىرى ريزا، كوپشىلىگى نارازى. اركىم ءۇيىنىڭ تاپ قاسىنان كولىككە وتىرادى. مۇنداي «وركەنيەت» قايدا بار؟! «گازەلدەر» لىق تولى، ءبىر-بىرىمەن جارىسىپ جۇرەدى. ونىڭ ۇستىنە ولار باس-كوزىنە قاراماي جىلدام جۇرەتىندىكتەن بالالارعا قاۋىپتى. «گازەلدەردىڭ» رەنتابەلدىلىگى – 300%! جىبەك جولىندا جۇرگەن ءسىز اكەلگەن اۆتوبۋستاردىڭ نەسىبەسىن سولار سىپىرىپ الىپ جاتىر.

مەن بۇل ماسەلەنى بۇرىن دا كوتەرگەنمىن. ناتيجە جوق. اقشا جۇرگەن جەردە بىرەۋلەردىڭ مۇددەسى بار سياقتى. سوندىقتان، قۇرمەتتى قىرىمبەك ەلەۋۇلى! «گازەلدەردى» شەتكى ايماقتارعا شىعارۋ كەرەك! اۆتوبۋسقا 100-200 مەتر جاياۋ ءجۇرىپ مىنگەنگە ەشكىمنىڭ ەشتەڭەسى كەتپەيدى. قايتالاپ ايتامىن، №5 مارشرۋت «گازەلدەرىنىڭ» رەنتابەلدىلىگى – 300%. سەبەبى جولپۇلدى 90 تەڭگەگە كوتەرۋ ەڭ الدىمەن جەكە «گازەلدەرگە» ءتيىمدى بولىپ شىقتى. ولار جۇرگىنشىلەرگە بيلەت كەسپەيدى، كەز كەلگەن جەرگە توقتايدى.

ءسىزدى وڭتايلى شەشىم قابىلدايدى دەپ سەنەمىن. سەبەبى ول كەلەشەكتە بيۋدجەتىمىزدى الدەقايدا توسىن جاعدايلاردان ساقتاندىراتىن سەنىمدى كەپىلى بولىپ تابىلادى».

وبلىس اكىمىنىڭ وبلىس اۋماعىنداعى مىڭ تۇيتكىلدى ماسەلەنى شەشۋگە ۋاقىتى بولمايتىن شىعار دەپ، بۇل ماسەلەنى قالا اكىمىنىڭ نازارىنا دا سالۋدى ءجون كوردىك.

ويتكەنى قالا اكىمىنىڭ اتىنا رەداكتسيا ارقىلى مارعۇلان كوشەسىنىڭ تۇرعىندارى دا شاعىم ءبىلدىرىپ وتىر.

«قۇرمەتتى نۇرلىبەك ماشبەكۇلى! ءبىز، قىزىلوردا قالاسى، ءا.مارعۇلان كوشەسىنىڭ تۇرعىندارى وتكەن 2017 جىلى جەرگىلىكتى پوليتسياعا كوشەنىڭ تارلىعىن ايتىپ، ماشينالاردىڭ ءجۇرىسىن ازايتۋ ءۇشىن قوزعالىستى ءبىر باعىتتا جۇرگىزۋدى قامتاماسىز ەتۋ جونىندە ءوتىنىش بىلدىرگەن ەدىك. 

قازىر ۇزىندىعى 300 مەتر كوشەنىڭ بويىمەن №5 مارشرۋتتىڭ «گازەلدەرى» جۇرەدى.  جول تار. تارلىعىنا قاراماستان ماشينالار ءبىر-بىرىمەن جارىسادى. بالالارعا، جۇرگىنشىلەرگە قاۋىپتى. سول ءوتىنىش ارىزىمىزدان ەشتەڭە شىقپادى. پوليتسيا قىزمەتكەرلەرى كەلىپ، ارنارسەنى سىلتاۋراتتى. ۇلكەن كوشەگە جاقىن كوپقاباتتى ۇيلەردىڭ  بالالار وينايتىن اۋلاسىنان جولاۋشى گازەلىن جىبەرۋ قاي مەملەكەتتىڭ، قاي قالانىڭ تاجىريبەسىندە بار؟ سوندا اركىم ءوز ءۇيىنىڭ تاپ قاسىنان قوعامدىق كولىككە وتىرۋى كەرەك پە؟ وسى مارشرۋتتى ۇلكەن جولعا – جىبەك جولىنا قايتا جىبەرۋ كەرەك. بۇل توتەنشە جاعدايدى بولدىرماۋدىڭ ءبىر جولى بولىپ تابىلادى».

بارلىعى ون ادام قول قويعان.

قىزىلوردالىقتار قالاعا جاڭا اۆتوبۋستار كەلگەندە قۋاندى. ەندى ولاردى ساقتاپ قالۋ پروبلەماعا اينالىپ وتىر. ونىڭ ۇستىنە ولار ەسكىرە باستادى. ال بۇل ماسەلەنى وڭتايلى شەشۋ بيىل قالانىڭ 200 جىلدىق مەرەيتويىن وتكىزگەلى جاتقان وبلىس، قالا باسشىلارىنا جاراسىمدى بولار ەدى.

وبلىس ورتالىعىنداعى كولىك قاتىناسىنىڭ مادەنيەتى دە ارتار ەدى.

ج.ءالماحان

Abai.kz