ء"بىز جومارت ەرتاەۆتىڭ ۇيقاماقتان بوساتىلاتىنى تۋرالى رەسمي حات قولىمىزعا تيگەن سوڭ ونى (ەرتاەۆتى - رەد.) قازاقستانعا بەرمەيتىنىنە جانە بارلىق قىرسىق ارتتا قالاتىنىنا سەنىم پايدا بولدى" دەگەن اندرەي پەتروۆ.
ادۆوكاتتىڭ سوزىنشە، بۇنىڭ الدىندا رەسەي بيلىگى جومارت ەرتاەۆقا بوسقىن مارتەبەسىن بەرگەن. ەرتاەۆ مامىر ايىندا تۇتقىندالعاننان كەيىن ماسكەۋ قالالىق ميگراتسيا ماسەلەلەرى جونىندەگى باس باسقارماسىنا وزىنە بوسقىن مارتەبەسىن بەرۋ جونىندە ءوتىنىش تۇسىرگەن.
رەسەيلىك "ترويكا-د بانك" يەلەرىنىڭ ءبىرى 45 جاستاعى جومارت ەرتاەۆتى مامىردىڭ باسىندا رەسەي قاۋىپسىزدىك ورگاندارىنىڭ قىزمەتكەرلەرى ۇستاعان. 11 مامىر كۇنى ماسكەۋدىڭ پرەسنەنسكي اۋداندىق سوتى پروكۋراتۋرانىڭ ەرتاەۆقا قاماۋعا الۋ تۇرىندە بۇلتارتپاۋ شاراسىن قولدانۋ تۋرالى ءوتىنىشىن قاناعاتتاندىرۋدان باس تارتىپ، ونى ۇيقاماققا العان.
قازاقستان باس پروكۋراتۋراسى جومارت ەرتاەۆتى سىرتتاي قىلمىستىق كودەكستىڭ 177-بابىنىڭ 4-تارماعى ("الاياقتىق") بويىنشا ايىپتاپ وتىر.
قازاقستان بيلىگى جومارت ەرتاەۆتى "قازاقستاندىق Bank RBK-ءنىڭ ديرەكتورلار كەڭەسى توراعاسىنىڭ كەڭەسشىسى بولعان كەزىندە بانكتەن جالعان فيرمانىڭ اتىنا 80 ميلليون دوللاردان استام زايم الىپ بەرۋگە جانە ونى قايتارماۋعا كومەكتەسكەن" دەپ كۇدىكتەنەدى.
مامىردا رەسەيلىك باق جومارت ەرتاەۆتىڭ ادۆوكاتى ارقىلى جولداعان ۇندەۋىن جاريالاعان. ۇندەۋدە ەرتاەۆ Bank RBK-دا ەشقاشان جۇمىس ىستەمەگەنىن، بۇل بانكتىڭ شتاتىندا جانە اكتسيونەرلەرى قۇرامىندا بولماعانىن ايتادى. رەسەيلىك "كوممەرسانت" گازەتى جومارت ەرتاەۆتىڭ سوتتا رەسەيدەن ساياسي باسپانا جانە ازاماتتىق بەرۋدى مالىمدەگەنىن حابارلاعان. ول ءوزىن قۋدالاۋدىڭ ساياسي استارى بار دەپ بىلەتىنىن ايتقان.
Abai.kz
