سەيسەنبى, 19 قازان 2021
ساڭلاق 4992 6 پىكىر 7 قاراشا, 2018 ساعات 11:20

الەم چەمپيوناتى: ەكى "جاڭا قازاق" جۇلدە الدى

تۇرىكمەنستان استاناسى اشحاباد قالاسىندا اۋىر اتلەتيكادان ليتسەنزيالىق الەم چەمپيوناتى ءوتىپ جاتىر.

بۇل سىندا دوپينگ داۋىنا بايلانىستى ءبىر جىل بويى حالىقارالىق جارىستارعا قاتىسا الماعان قازاقستان قۇراماسى دا باق سىناۋدا. حالىقارالىق اۋىر اتلەتيكا فەدەراتسياسىنىڭ اتقارۋشى كوميتەتى قازاقستان اۋىر اتلەتيكا فەدەراتسياسىن ءبىر جىلعا جارىستاردان شەتتەتكەن بولاتىن. جازا مەرزىمى 19 قازان كۇنى اياقتالدى.

اشحاباد تورىندە قازىرگە دەيىن قۇراما قورجىنىنا قوس مەدال ءتۇستى. العاشقى جارىس كۇنىندە ونەر كورسەتكەن ارلي چونتەي 55 كەلىگە دەيىنگى سالماق دارەجەسىندە كۇمىس جۇلدە جەڭىپ الدى. قوس جاتتىعۋدىڭ قورىتىندىسى بويىنشا 258 كەلى زىلتەمىردى كوتەرگەن ارلي 2012 جىلعى وليمپيادا چەمپيونى وم يۋن چxولگە (282 كەلى) ەسە جىبەردى.

وسىدان كەيىن ءتورت كۇن بويى قازاقستاندىق سپورتشىلارعا مەدال بۇيىرعان جوق. تەك بەسىنشى جارىس كۇنى نادەجدا ليحاچەۆا قولا جۇلدەگە قول جەتكىزدى. 71 كەلى سالماق دالەجەسىندە ونەر كورسەتكەن وتانداسىمىز 242 كەلىنى باعىندىردى. ال باس جۇلدەنى 267 كەلى (الەمدىك رەكورد) كوتەرگەن قىتاي سپورتشىسى ۆانگلي جانگ، كۇمىس مەدالدى مىسىرلىق ساروي احمەد (252) جەڭىپ الدى.

الەم چەمپيوناتىنىڭ اياقتالۋىنا بار بولعانى ءۇش كۇن عانا قالدى. ەلىمىز اۋىر اتلەتتەرىنىڭ ناتيجەسى كوڭىل كونشىتەرلىك ەمەس. ودان دا ماڭىزدىسى مەدال العان ەكى سپورتشىمىز دا لەگيونەر.

ارلي چونتەي قىتايدا تۋىپ-وسكەن دۋنگان ازاماتى. قىتاي قۇراماسىنىڭ ەسىگىنەن سىعالاي الماي 2012 جىلى قازاقستان ازاماتتىعىن العان. قازىر ەلىمىز اتىنان حالىقارالىق جارىستارعا قاتىسىپ ءجۇر.

ال نادەجدا ليحاچەۆانىڭ تۋعان جەرى رەسەي ەلى. ول ءتىپتى رەسەي قۇراماسى ساپىندا 2015 جىلعى ەۋروپا چەمپيوناتىنا قاتىسىپ، كۇمىس مەدال العان. قازاقستان اتىنان بيىلدان باستاپ عانا جارىستارعا قاتىسىپ ءجۇر.

قۋانىش قاپپاس

اbai.kz

 

6 پىكىر