بەيسەنبى, 15 ءساۋىر 2021
2194 1 پىكىر 8 قاراشا, 2018 ساعات 23:02

ەلباسى "جاۋاپسىز مونوپوليستەردى" جازالاۋدى بۇيىردى

قازاقستان پرەزيدەنتى نۇرسۇلتان نازارباەۆ شەنەۋنىكتەردى تاياۋدا حالىققا جولداۋىنىڭ ءمانىسىن انىقتاۋدى شاقىرىپ، جاۋاپسىز مونوپوليستەردى جاۋاپقا تارتۋدى بۇيىردى.

7 قاراشادا استانادا وتكەن قاۋىپسىزدىك كەڭەسىنىڭ وتىرىسىندا نازارباەۆ الەۋمەتتىك زەرتتەۋلەردىڭ ناتيجەسى بويىنشا، قازاقستان حالقىن كوممۋنالدىق قىزمەت باعاسى مەن ءبىلىم جانە مەديتسينا قىزمەتىنىڭ قىمباتتىعى الاڭداتادى دەدى.

قازاقستان پرەزيدەنتى ۇكىمەت پەن باس پروكۋراتۋرادان تاريفتەردىڭ نەگىزسىز كوتەرىلۋىنە جول بەرگەن تۇلعالارعا قاتىستى بارلىق قۇقىقتىق اكتىلەردىڭ زاڭعا ساي ورىندالۋىن تالاپ ەتتى.

– ەلەكتر ەنەرگياسى مەن جىلۋ تاريفتەرى ماسەلەسى – پروبلەمانىڭ ءبىر بولىگى عانا. باسقا دا قىزمەت كورسەتۋشى-مونوپوليستەر بار. بۇل اۋىز سۋ، گاز، كارىز جۇيەسى، تەلەفون بايلانىسى جانە ينتەرنەت ءۇشىن كورسەتىلەتىن قىزمەتتەرمەن قامتاماسىز ەتۋ ىسىنە دە قاتىستى. مونوپولياعا قارسى كوميتەت وسى ماسەلەلەردى دە رەتكە كەلتىرۋى كەرەك، – دەدى مەملەكەت باسشىسى.

قازاقستان پرەزيدەنتى ەنەرگيا جەتكىزۋشى كومپانيالاردىڭ وسى ارەكەتتەرىنەن تۇرعىندارعا كەلگەن شىعىن كولەمى 14 ميلليارد تەڭگەگە جەتكەنىن ايتىپ، ەنەرگيامەن قامتاماسىز ەتەتىن كومپانيالاردىڭ زاڭسىز كىرىسى 15 ميلليارد تەڭگە بولعانىن اتاپ ءوتتى. سونداي-اق، تەكسەرىس ناتيجەسىندە جەرگىلىكتى اتقارۋشى ورگاندار تاراپىنان تاريفتەردى تومەندەتۋ ءۇشىن بولىنگەن سۋبسيديالاردىڭ ءتيىمسىز پايدالانىلعانى انىقتالعان.

– قاپشاعاي قالاسىنان ءبىر عانا مىسال كەلتىرەيىن. باعدارلامانىڭ ىسكە اسىرىلۋ كەزىندە تاريف ەكى ەسە وسكەن. ەنەرگيامەن قامتاماسىز ەتەتىن قۇرىلعىلاردىڭ توزۋ كورسەتكىشى 53-تەن 77 پايىزعا ۇلعايعان. بارلىق قۇقىق بۇزۋشىلىقتار ۇلتتىق ەكونوميكا، ەنەرگەتيكا مينيسترلىكتەرى مەن جەرگىلىكتى اتقارۋشى ورگاندار تاراپىنان باقىلاۋ جاسالماعاندىقتان جانە ولاردىڭ ارەكەتسىزدىگىنەن تۋىنداپ وتىر، – دەدى نۇرسۇلتان نازارباەۆ.

Abai.kz

1 پىكىر