سەنبى, 19 قازان 2019
اباي.tv 8118 61 پىكىر 17 قاڭتار, 2019 ساعات 16:08

ءا.قوسانوۆ: "جاڭا كۇشتەر كەلە جاتىر"

قۇرمەتتى وقىرمان! «Abai.kz» اقپاراتتىق پورتالى تۇراقتى تۇردە جۇرگىزىپ كەلە جاتقان ينتەرنەت-كونفەرەنتسيا  جاڭا سيپاتتا ءوز جالعاسىن تاباتىن بولادى. ەندى، ينتەرنەت-كونفەرەنتسيانىڭ قوناعى وقىرمان سۇراقتارىنا پورتالدىڭ «You Tube» جەلىسىندەگى ارناسى ارقىلى جاۋاپ بەرەدى.

ابايدىڭ وسى اپتاداعى قوناعى بەلگىلى ساياساتكەر، تاۋەلسىز جۋرناليست، قوعام قايراتكەرى، «جاڭا قازاقستان» قوزعالىسىنىڭ مۇشەسى - ءامىرجان ساعيدراحمانۇلى قوسانوۆ. سپيكەر ءامىرجان قوسانوۆ مىرزانىڭ سۇحبات بارىسىندا ايتقان وتكىر ويلارىن ىقشامداپ جاريالاۋدى ءجون سانادىق. ال، اڭگىمەنىڭ تولىق نۇسقاسىن ماقالا سوڭىنداعى ۆيدەو-جازبادان تاماشالاۋعا بولادى.


2019 جىل – جاستار جىلى. جاستاردىڭ نەگىزگى ءۇش پروبلەماسى

مەن جاستار جىلى دەپ اتالۋىن قولدايمىن. ويتكەنى، قالاي بولعاندا دا بيلىكتىڭ بارلىق جۇيەلەرىنە جاستار پروبلەماسىنا كوڭىل ءبولۋ مىندەتتەلدى. سونىسىمەن دە جاقسى.

مۇمكىن بۇرىن كوپسالالى ساياساتتىڭ ىشىندە جاستار پروبلەماسىنا كوپ توقتالمايتىن اكىمدەر، مينيسترلەر وسى جارلىق نەگىزىندە ءوز جوسپارلارىن جاسايتىن شىعار. بىراق، قازىر قوعامدا وسىنداي ارنايى جىلدارعا دەگەن سەنىمسىزدىك تۋعان. پيسسيميزم باسىم. اۋىل جىلى دەدىك. ودان كوركەيىپ كەتكەن اۋىلدى كورمەدىك. باسقا دا اتاۋلى جىلدار بولدى...

تاعى دا ءبىر فورۋمدار، كونفەرەنتسيالار ءوتىپ، تاعى دا جاستاردى جيناپ الىپ «ۋرالاتىپ»، بيلىككە راقمەتتەرىن ايتقىزىپ، الاقايلاتا ما دەپ قورقامىن.

مەنىڭشە، كەمىندە ەستە قالارلىق ەكى دۇنيە جاسالۋى كەرەك. سول ەكى دۇنيەنى ورىندايتىن بولسا، بيىلعى جىلدى جاستار جىلى دەپ جاريالاعان بيلىككە راقمەت ايتۋىمىز كەرەك.

ءبىرىنشى ماسەلە – قازىر ءبىزدىڭ ەلدە جاستار پروبلەمالارىن زەرتتەيتىن بەدەلدى عىلىمي ورتالىقتار جوقتىڭ قاسى. جوق ەمەس، بار. تالعات قاليەۆ دەگەن ازامات باستاپ، جاستار ينستيتۋتىن قۇردى. بىراق، ول دا ءالى كۇنگە دەيىن مەملەكەتتىك ەمەس ۇيىم دەڭگەيىنەن كوتەرىلە الماي كەلە جاتىر. زەرتتەۋ كەرەك. وسى 27 جىلدىڭ ىشىندە، 27-گە كەلگەن جاستىڭ پورترەتى قانداي؟ ونىڭ سۇرانىسى قانداي؟ ول بيلىكتەن نە قاجەت ەتەدى؟

كەز كەلگەن مەملەكەتتىڭ جاستار الدىنداعى مىندەتى ءبىر سويلەمگە سىيادى. 1. وقۋعا مۇمكىندىك بەرىڭىز. 2. العاشقى جۇمىسىنا ورنالاسۋعا كومەك جاساڭىز. 3. ءۇي-جاي جاساي الاتىنداي جالاقى بەرىڭىز.

ەكىنشى ماسەلە – الەۋمەتتىك-ەكونوميكالىق جاعداي. كوپ جاعدايدا ءبىز جاستار پروبلەماسىن ايتقاندا گۋمانيتارلىق سالاداعى ءىس-شارالارعا اۋىتقىپ كەتەمىز دە، اۋىلداعى، قالاداعى جاستاردىڭ كۇندەلىكتى مۇڭ-مۇقتاجىنا توقتالمايمىز.

مىسالى، كۇنى كەشە عانا فرانتسيادا ماكروندى ۇلتتىق دەباتقا شىقتى. 7 ساعات بويى ءوزىنىڭ قىزمەتىنە كوڭىلى تولمايتىن فرانتسۋزداردىڭ سۇراقتارىنا جاۋاپ بەرۋگە تىرىستى.

سول سەكىلدى پرەزيدەنت نازارباەۆ تا رەسمي باق-پەن ەمەس (ويتكەنى جاستار رەسمي باق-تى قارامايدى), قازىرگى زاماناۋي جەلىلەر ارقىلى جاستارمەن بىرگە تىكەلەي ەفيرگە شىقسا... «مەن مىنە، جاستار جىلىن جاريالادىم. جاستار-اۋ، سەندەرگە نە كەرەك؟» دەپ ايتسا، سول دۇرىس بولار ەدى.

مەنىڭ ۇسىنىسىم: نەگە ءدال وسى جىلى كەز كەلگەن 30 جاسقا دەيىنگى جاستاردىڭ قۇرعان شاعىن-جانە ورتا بيزنەسىن سالىقتان بوساتپاسقا؟! ارينە، بارلىعى بىردەي اياققا تۇرىپ كەتپەس، دەگەنمەن 10/5-ءى اياققا تۇرىپ كەتسە، جاستار كاسىپكەرلىگىن دامىتۋعا ۇلكەن ۇلەس بولار ەدى.

نەمەسە، بانكتەر ارقىلى جاستار كاسىپكەرلىگىن دامىتۋ ءۇشىن جەڭىلدەتىلگەن پايىزبەن نەسيەلەندىرۋ ساياساتىن قولعا السا؟

قازىرگى جاستاردىڭ ۇلكەن پروبلەماسى جۇمىسسىزدىق. مىنە، وسىنداي ءبىر مەحانيزمدەر جاسالسا، بيىلعى جىل قۇر دابىرامەن وتپەيدى دەپ ويلايمىن.

جاستار نەگە سەنaتور بولمايدى؟

قاسىم-جومارت توقاەۆتىڭ سەنات جۇمىسىنا جاستاردى ارالاستىرۋ تۋرالى ويىن قولدايمىن. بىراق مەن ايتار ەدىم، جاستار نەگە سەناتور بولمايدى؟

نەگە بىزدە سەنات زەينەتكە شىققان اكىمدەر مەن مينيسترلەردىڭ زاپاستاعى اەرودرومى بولىپ قالدى؟ پارتيالىق پرينتسيپكە جاساقتالعان ماجىلىستەن گورى سەناتتا تۇلعالاردىڭ ءرولى كوپ بولۋى كەرەك. ماجىلىستەگى دەپۋتاتتار پارتيالىق تارتىپتەن شىعا الماي قالۋى مۇمكىن. سەناتتا جەكە تۇلعا رەتىندە ءبىر پروبلەمانى كوتەرۋگە جاستاردىڭ مۇمكىندىگى بار.

نەگە 27 جىلدان بەرى كەڭەستىك اتريبۋتتاردان ارىلا الماي كەلەمىز؟

قازىر تاۋەلسىزدىككە 27 جىل. ونىڭ الدىنداعى 10 جىلدى قوسساق، قازىر بىزدە 30-40 جاستىڭ اينالاسىنداعى  سابەت ءداۋىرىن كورمەگەن، وكتيابريات، پيونەر، كومسومول، كومۋننيسىن كورمەگەن، لەنين مەن ماركستىڭ كىتاپتارىن جاتتاپ وسپەگەن تۇتاس ءبىر ۇرپاق پايدا بولدى.

دەگەنمەن، بيلىكتە ءالى كۇنگە كوممۋنيزم يدەولوگياسىمەن تاربيەلەنگەن، سول كەزەڭدە ەل باسقارعان، مينيستر بولعان ازاماتتار وتىر. بۇل جالپى ينەرتسيالىق قۇبىلىس دەپ ويلايمىن.

پۋتين ارتىق قىلامىن دەپ تىرتىق قىلىپ وتىر

ءپۋتينىننىڭ كەزەڭىندەگى پوست-كەڭەستىك كەڭىستىكتەگى نەويمپەريالىق ساياسات تۋرالى ءبىز كوپ ايتتىق. سونىڭ تىرناقشى ىشىندەگى جاقسى جاعى دا بار. ول – پۋتين ارتىق قىلامىن دەپ، تىرتىق قىلىپ جاتقاندىعى. ونىڭ بارلىعىن ماسكەۋدىڭ توڭىرەگىنە جينايمىن دەگەن ساياساتىنا قارسى كۇشتەر شىقتى. ءبىز قازاقتى ايتپاعاندا، وزدەرىنىڭ تۋىسى – ۋكرايندەر، كۇنى سول ماسكەۋگە قاراپ وتىرعان بەلارۋستەر قازىر انتيرەسەيلىك ساياساتتى ۇستانىپ وتىر.

جاڭا كۇشتەر كەلە جاتىر

ءبىزدى قازىر ەسكى وپپوزيتسيا دەيدى. بىزگە كەتىڭدەر دەيدى. ءبىز قۋانامىز. ءبىز ايتىپ جۇرگەن ويلاردى قازىر جاستار دا ايتا باستادى. ولاردىڭ پاراساتى بولەك، ءبىلىمى بولەك، بولاشاعى بولەك.

ءبىز قازىر وپپوزيتسيانىڭ جاڭا بەينەسىن جاساعىمىز كەلەدى. بيلىكتىڭ ىشىندە دە ۇلتتىق تۇرعىدان ويلايتىن، ادىلەتتىككە ءبىر تابان جاقىن، كلانارالىق، توپارالىق تارتىستان شارشاعان ادامدار بار. ول كۇشتەرمەن دە جۇمىس ىستەپ، يدەولوگيالىق تۇرعىداعى جاڭا باستامالاردى قولدايتىن كۇشتەرمەن دە جۇمىس جاساۋ كەرەك. وپپوزيتسيا دەگەن بارلىعىن تەرىستەپ، جاڭا پروتسەسستەن قالۋ دەگەن ءسوز ەمەس.

مىنە، سول ۇستانىم جاستارعا كەرەگى. سەبەبى، جاستار وزدەرىن تەك وپپوزيتسيادا ەمەس، مەملەكەتتىك جۇمىستا دا كورسەتكىسى كەلەدى.

سوندىقتان، كەلەسى سايلاۋلاردا، ءماجىلىس، ماسليحات سايلاۋلارىندا جاڭا، تىڭ، ەسكىنىڭ جۇگىن ارقالاماعان كۇشتەر كەلە جاتىر دەپ ويلايمىن. ەگەر سول جاستار ءبىزدىڭ ورنىمىزدى باسامىز دەسە، قۇبا-قۇپ. ءبىز ورنىمىزدى بەرۋگە دايىنبىز.

سايلاۋ بولادى

مەنىڭشە، سايلاۋ بولادى. وعان بىرنەشە سەبەپ بار. بىرىنشىدەن، ەكونوميكالىق جاعداي تىم قيىنداپ بارادى. ءتىپتى، بيلىككە ءبىر تابان جاقىن ەكسپەرتتەردىڭ ءوزى وسى جىلدىڭ قيىن بولاتىنىن ايتىپ وتىر. جاعداي قيىنداعان سايىن، سايلاۋ وتكىزۋ دە قيىنداي تۇسەدى. سوندىقتان، وسى جىلى بولماسا دا، كەلەر جىلى سايلاۋ بولادى.

ول سايلاۋ قالاي بولادى؟ پارلامەنتتىك پە، الدە پرەزيدەنتتىك پە؟ مىسالعا قاراڭىزشى، پاشينيان ارمەنيا ۇكىمەتىن باسقارۋعا كەلدى. بىراق، ونىڭ بارلىق باستامالارىنا بۇرىنعى پارلامەنت كەدەرگى بولدى. سوندىقتان، ول پارلامەنتتى تاراتىپ، جاڭا پارلامەنتىن ءتۇزدى. وعان ارمەنيانىڭ بۇرىنعى «نۇر وتانى» كىرە الماي قالدى.

ءبىزدىڭ بيلىك وسى 27 جىلدا دەموكراتيالىق پرينتسيپتەردەن الىستاي بەردى. ول بىتەۋ جارا سەكىلدى. ول جارا ءبىر كۇنى جارىلادى. مەنىڭ، وسى ەلدىڭ ازاماتى رەتىندە، اكە رەتىندە، قازاق رەتىندە قورقاتىنىم، ەرتەڭ ول بۇلىككە ۇلاسىپ كەتىپ، سول بۇلىكتى سىرتقى كۇشتەر پايدالانىپ كەتپەي مە؟

ەگەر سولتۇستىكتەگى كورشىمىز ىقپال ەتپەك بولعان جاعدايدا، ءبىزدىڭ ساياسي ەليتا، وپپوزيتسيا، ءۇشىنشى كۇشتەر اۋىزبىرشىلىك تانىتىپ، ۇلتتىق، مەملەكەتتىك مۇددەنى بيىك قويا الامىز با؟ الدە قىرىقپىشاق بولىپ، بيلىك ءۇشىن تالاسا ما؟ وسىنداي ۇرەيىم بار.

جاڭا پارلامەنتكە ۇلتتىق ليبەرالدار كىرۋى كەرەك

سوندىقتان، پرەزيدەنت ءوزى تولىق بيلىكتە بولعان كەزەڭدە ساياسي رەفورما جاساۋى كەرەك. كەزىندەگىدەي، 360 دەپۋتاتتان تۇراتىن جاڭا پارلامەنت سايلانۋى كەرەك. ول پارلامەنتتەن كوممۋنيستەر كەتۋى كەرەك. بيلىك ءوز پارتياسىن قالدىرسا مەيلى، بىراق ءبىرىنشى كەزەكتە ول پارلامەنتكە ۇلتتىق ليبەرەلدى كۇشتەر كىرۋى كەرەك.

بىزگە وكرۋگتەردەن سايلاناتىن دەپۋتاتتار كورپۋسى كەرەك

بىزدە وكىنىشكە وراي پارلامەنت تەك پارتيالىق تىزىممەن سايلانادى. ماجوريتارلىق جۇيە جوق. مەنىڭشە، 50/50 بولۋى كەرەك. 50 پايىز پارتيالىق ءتىزىم بويىنشا، 50 پايىز جەرگىلىكتى وكرۋگتەر بويىنشا دەپۋتاتتار سايلانۋى كەرەك. سول كەزدە ءبىز پارتيادان تىس دەپۋتاتتار كورپۋسىن جاسايمىز. سول كەزدە، مىسالى قاراعاندىدان سايلانعان دەپۋتات سول كۇنى تاڭدا پارلامەنتتىڭ جيىنىن ۇيىمداستىرىپ، تالاپ ەتىپ، ماسەلەنى شەشۋگە اتسالىساتىن ەدى.

پرەزيدەنتتىك سايلاۋ – بۇل ۇلكەن ماسەلە

پرەزيدەنتتىك سايلاۋ – بۇل ۇلكەن ماسەلە. مەملەكەتتىڭ، ۇلتتىڭ تۇتاستىعى ءۇشىن قازىرگى ترانزيتتىك كەزەڭنىڭ دۇرىس ءوتۋىنىڭ بىرنەشە شارتى بار. 1. سايلاۋ ءادىل ءوتۋى كەرەك. 2. مىندەتتى تۇردە ءوزىن وپپوزيتسيا، دەموكرات سانايتىن كۇشتەر كانديدات ۇسىنۋى كەرەك. 3. جاڭا كەلەتىن ادام مىندەتتى تۇردە ەكى مەرزىمنەن ارتىق وتىرماۋعا، وتباسىن مەملەكەتتىك ىسكە ارالاستىرماۋعا، ءوزىنىڭ بيزنەسى بولمايتىنىنا، كونستيتۋتسيالىق رەفورما جاساپ، پارلامەنتتىك وكىلەتىن كۇشەيتۋگە، ءسوز بوستاندىعىنا كەپىل بولۋعا تۇزىلگەن باعدارلاماسىن ۇسىنۋى قاجەت.

وپپوزيتسيا بىرىگىپ كانديدات ۇسىنۋىمىز كەرەك

سايلاۋ كەزىندە، ءوزىن وپپوزيتسيالىق كۇشپىن، دەموكراتپىن دەگەن ازاماتتار جينالىپ، ارامىزدان ءبىر كانديدات شىعارۋىمىز كەرەك. ەگەر ءبىز ءبىر كانديدات شىعارا الماساق، حالىق الدىندا، تاريح الدىندا ماسقارا بولامىز.

100 پايىز قازاق ءتىلى بوۋلى كەرەك

بىزدە مەملەكەتتىك ءتىل - قازاق ءتىلى. سوندىقتان، 100 پايىز قازاق تىلىندە بولۋى كەرەك.

«جاڭا قازاقستاننىڭ» بەلسەندىلىگى باسەڭدەدى. نەگە؟

«جاڭا قازاقستاننىڭ» بەلسەندىلىگى باسەڭدەگەنى راس. تىركەۋ پروتسەسسى قيىن. ءبىز زاڭ اياسىندا، كونستيتۋتسياعا ساي جۇمىس جاسايمىز دەدىك. زاڭ بويىنشا تىركەلمەگەن ۇيىم جۇمىس جاسaماۋى كەرەك. ول دۇرىس. بۇگىن ءبىز تىركەلمەسەك، ەرتەڭ قاۋىپتى ءبىر ۇيىمدار تىركەلمەي جۇمىس جاساۋى مۇمكىن. سوندىقتان، ءبىز زاڭدى مويىندايمىز، باعىنامىز. تىركەۋگە قۇجاتتارىمىزدى بەرەيىك دەپ، قازاققا تانىمال ۇيىمنىڭ اتىن وزگەرتەمىز دەپ ەدىك. ەندى سول ۇيىمدى جاپقىسى كەلىپ جاتىر.

ءبىز تىركەۋ پروتسەسسىن تۇپكىلىكتى وتەمىز. ەگەر ءبىز تىركەلە المايتىن بولساق، وندا ەلمەن، جۇرتپەن اقىلداسىپ، جۇمىس جاساۋدىڭ باسقا دا جولدارىن قاراستىرارمىز. قازىر تىركەۋ پروتسەسسىندەمىز.

«مۇحتار، سەنىڭ ءجونىڭ بولەك...»

مەن مۇحتار قۇرداسىما: «مۇحتار سەنىڭ ءجونىڭ بولەك، سەنىڭ تاكتيكاڭ بار، ستراتەگياڭ بار. سەن بيلىكتىڭ كەمشىلىگىن اشكەرەلەپ، ونداعى جەمقورلىقتى اشىق ايتقانىڭدى مەن قولدايمىن» دەپ ايتار ەدىم.

بىزدە سونداي بىرنەشە مۇحتار بولۋى كەرەك. وكىنىشكە وراي ءبىز بيلىكتەن ەرتە كەتتىك. ال مۇحتار سول ورتانى بىلەدى.

بىراق، وتىرىپ الىپ، «مەن عانا وپپوزيتسيامىن. مىنا ەل دەپ جۇرگەندەردىڭ ءبارى ساتقىندار» دەگەندى قويۋ كەرەك. سوندا وسى ۋاقىتتىڭ ىشىندە ەل ىشىندە جۇرگەن زامانبەك، التىنبەك، باتىرحان، وسى كۇنگە دەيىن كەلە جاتقان گۇلجان ەرعاليەۆا، رىسبەك سارسەنباي، بولات ءابىلوۆ، تولەگەن جۇكەەۆ، ەرمۇرات باپي ت.ب. وسىلاردىڭ بارلىعى بيلىككە ساتىلعان با؟

ءيا، ءبىز ەلدىڭ ىشىندەمىز. ەش جاققا كەتكەن جوقپىز. كەتكىمىز دە جوق. ويتكەنى ءبىز قازاققا عانا كەرەكپىز. باسقاعا كەرەك ەمەسپىز. ءبىزدىڭ مۇحتار سياقتى شەتەلگە شىعىپ كەتەتىن اقشامىز دا جوق. سوندىقتان مۇحتارعا دوعارۋ كەرەك. بىرىگۋ كەرەك. ەگەر ول ءبىزدىڭ 33 پۋنكتتەن تۇراتىن باعدارلامامىزدى قولداسا، ەلدىڭ ىشىندە ءجۇرىپ، ەلدىڭ ىشىندەگى جاعدايدى وزگەرتەمىن دەسە بىزبەن بىرگە بولسىن.

«جاڭا قازاقستان» سەكىلدى «جاس قازاقستان» قۇرىلسىن!

جسدپ مەنىڭ پارتيام

جسدپ مەنىڭ پارتيام. مەن سەكىلدى جۇزدەگەن مىڭ ادامنىڭ پارتياسى. وسى پارتيانى العاشقى كۇنىنەن باستاپ جارماحان تۇياقبايمەن بىرگە ءجۇرىپ قۇردىق. 5 جىل مەن جارماحان تۇياقبايدىڭ ءبىرىنشى ورىنباسارى بولدىم. ادال جۇمىس ىستەدىك. اعالى-ءىنىلى بولدىق. ارامىزدا داۋ بولعان جوق.

بىراق، 2011 جىلعى سايلاۋدان كەيىن ول كىسى بۇزىلدى. نەگە ەكەنىن، نە جازعانىمدى دا بىلمەيمىن. جارماحان تۇياقبايدىڭ جەكە باسىنا تيىسپەيمىن، ءبىز بىرگە جۇردىك. ال ساياساتكەر رەتىندەگى ۇلكەن كەمشىلىگى – بىرىككەن جسدپ-ازات پارتياسىنىڭ بولىنۋىنە ءوزىنىڭ ىقپال ەتكەندىگى. وكىنىشكە وراي، بىرەگەي پارتيانى ءبىز ساقتاپ قالا المادىق. باس حاتشى رەتىندە وعان مەنىڭ دە كىنام بار دەپ ەسەپتەيمىن. سول ءۇشىن دە 500 ادامنىڭ الدىندا، سەزدە وسى ءۇشىن كەشىرىم سۇراعانمىن.

وكىنىشكە وراي، جسدپ قازىرگى قوعامدىق جاعدايلارعا تىم سەلقوس قاراي باستادى. ءۇنسىز جاتىر. مەن پارتياما ءتىل تيگىزگىم كەلمەيدى، كەرىسىنشە جارماحان تۇياقبايعا ۇسىنىس ايتار ەدىم. «جسدپ قازىر جالعىز تىركەلگەن وپپوزيتسيالىق پارتيا. ءسىز جەتپىستەن استىڭىز، مەن ەلۋدىڭ ورتاسىنا كەلدىم. ەگەر ەرتەڭ سايلاۋ بولسا، ءبىز جاستارعا وسى پارتيانى ۇسىنايىق. وسى پارتيانىڭ قۇرامىنا كىرىپ، جاستار پارلامەنت سايلاۋىنا ءتۇسسىن. وسى پارتيانىڭ اتىنا وپپوزيتسيا بىرەگەي كانديدات ۇسىنسىن» دەگىم كەلەدى.

مەن وپپوزيتسيانىڭ كوسەمى ەمەسپىن

مەن ەشقاشان ءوزىمدى قازاق وپپوزيتسياسىنىڭ كوسەمىمىن دەگەم جوق. مەن وپپوزيتسيادا جۇرگەن، كەشەگى سەرىكبولسىن ءابدىلدين اعامىز باستاعان توپتىڭ ءبىر مۇشەسى، وكىلىمىن. قاراپايىم قازاپىن. ومىرلىك ۇستانىمىم – شىندىقتى ايتۋ، ادىلەتتىلىككە قول جەتكىزۋگە تىرىسۋ. 2005 جىلى بۇكىل قازاق وپپوزيتسياسى بىرىكتى. سىرتتا جۇرگەنى بار، ىشتە جۇرگەنى بار، راديكالى بار، وڭشىل، سولشىلى بار بارلىعى بىرىكتى. سول كەزدە ءبىراز نارسەگە قولجەتكىزۋگە بولاتىن ەدى. بىراق، ءبىز سول بىرلىگىمىزدەن ايىرىلىپ قالدىق.

قاجىگەلدين «جاڭا قازاقستاننىڭ كوسەمى ەمەس»

مەن اكەجان ماعجانۇلىمەن كەزىندە جۇمىس ىستەدىم. وعان دا جيىرما جىل ءوتتى. ءبىز ءالى كۇنگە اعا-ءىنى رەتىندە ارالاسامىز، حابارلاسىپ تۇرامىز. ول كىسى ءبىزدىڭ قاتارداعى مۇشەمىزدىڭ ءبىرى. ول و، باستان كوسەم، باسشى بولمايتىنىن، تەك تاجيىربەسىمەن بولىسەتىنىن ايتتى.

زەينەتكە شىعۋىما ءالى 9 جىل بار ەكەن

مەنىڭ جاسىم 54-تە. زەينەتكە شىعايىن دەسەم، ءالى 9 جىل بار ەكەن. شاشىم اعارعانى بولماسا، ورتا جاستاعى جىگىتپىن. ماماندىعىم جۋرناليست. ازىرشە، كۇش قۋاتىمنان ايىرىلدىم دەپ ايتا المايمىن. سوندىقتان ايتارىم، وسى العان ۇستانىمىمنان تايمايمىن. جازاتىنىمدى اپتا سايىن «دات» گازەتىنە، «Abai.kz-كە»، «جاس الاش» گازەتىنە جازىپ كەلەمىن. ەرتەڭ، «جاس قازاقستان»، «وڭشىل قازاقستان»، «سولشىل قازاقستان» دەگەن سەكىلدى ۇيىمدار قۇرىپ، جاستار كەلسە، مەن باتامدى بەرەمىن. جيىندارىنا بارامىن.

سۇحباتتىڭ تولىق بەينە نۇسقاسى:

Abai.kz

61 پىكىر