بىشكەكتە ۇقشۇ ۇجىمدىق قاۋىپسىزدىك كەڭەسىنىڭ كەڭەيتىلگەن قۇرامداعى وتىرىسى ءوتتى.

قازاقستان، بەلارۋس، قىرعىزستان، رەسەي جانە تاجىكستان كوشباسشىلارى ۇيىمعا مۇشە ەلدەردىڭ ۇجىمدىق قاۋىپسىزدىگىن قامتاماسىز ەتۋدىڭ وزەكتى ماسەلەلەرىن قاراستىرىپ، بيىلعى ۇقشۇ جۇمىسىنىڭ نەگىزگى باعىتتارىن قورىتىندىلادى. سونداي-اق الداعى كەزەڭگە ارنالعان باسىمدىقتاردى انىقتادى.

وتىرىس قورىتىندىسى بويىنشا ۇجىمدىق قاۋىپسىزدىك كەڭەسىنىڭ دەكلاراتسياسى قابىلداندى. سونداي-اق ۇيىمعا مۇشە مەملەكەتتەردىڭ مۇددەسىنە ساي ۇجىمدىق قاۋىپسىزدىك جۇيەسىن جان-جاقتى جەتىلدىرۋگە باعىتتالعان بىرقاتار قۇجاتقا قول قويىلدى.

بۇل جولعى وتىرىستىڭ جۇرت نازارىن وزىنە ەرەكشە اۋدارعانى بار. سەبەبى بۇل جولى ۇيىمنىڭ باس حاتشىسى اۋىسادى. الدىنعى جولى اسكەري ۇيىمنىڭ باس حاتشىلىعىنا قازاقستان اتىنان بەدەلدى ساياساتكەر يمانعالي تاسماعانبەتوۆ سايلانىپ، وسى كۇنگە دەيىن ۇيىمدى باسقارىپ كەلگەن ەدى.

جيىن بارىسىندا 2026 جىلعى 1 قاڭتاردان باستاپ ۇقشۇ باس حاتشىسى قىزمەتىنە ءۇش جىل مەرزىمگە قىرعىز رەسپۋبليكاسىنىڭ وكىلى تاالاتبەك ماسادىكوۆتى تاعايىنداۋ تۋرالى شەشىم بەكىتىلدى.

پرەزيدەنتتەر ۇقشۇ باس حاتشىسى لاۋازىمىنداعى قىزمەتىن اياقتاپ جاتقان يمانعالي تاسماعامبەتوۆكە العىس ايتتى.

قازاقستاندىقتار پرەزيدەنت رەتىندە كورگىسى كەلەتىن يمانعالي تاسماعانبەتوۆ تۇڭعىش پرەزيدەنت نۇرسۇلتان نازارباەۆ بيلىكتەن كەتكەننەن كەيىن، كۇتپەگەن جەردەن زەينەتكەرلىككە شىققانىن حابارلاپ، ەلدى اڭ-تاڭ قالدىرعان ەدى. «قاڭتار وقيعاسىنان» كەيىن ساياسي ساحناعا قايتا ورالدى. 2022 جىلدىڭ سوڭىندا ۇقشۇ-نىڭ باس حاتشىلىعىنا تاعايىندالدى. سول كەزدە سىرت كوز ونىڭ ساياساتقا قايتا ورالۋىن رەسەي پرەزيدەنتى پۋتينمەن بايلانىستىرعان ەدى.

ايتىپ-ايتپاي اسكەري ۇيىمنىڭ باس حاتشىلىعى لاۋازىمىندا وتكىزگەن ءۇش جىل تاسماعانبەتوۆقا وڭاي سوققان جوق. ءپۋتيننىڭ ۋكرايناعا شاپقىنشىلىعى، ۇيىم مۇشەلەرى اراسىنداعى كيكىلجىڭ ونى تىعىرىققا تىرەدى. رەسەيگە باعىنىشتى اسكەري ۇيىم اتىنان ناتو-نى ايىپتاۋعا ءماجبۇر بولدى. كۇنى كەشە ۋكراينالىق "ميروتۆورەتس" سايتى يمانعالي تاسماعامبەتوۆتى رەسەيشىل ادام رەتىندە تىزىمگە قوستى.

تاسماعانبەتوۆتىڭ سوڭعى ساياسي لاۋازىمدارى رەسەيمەن بايلانىستى بولدى. رەسەيدە ەلشى بولدى، اسكەري ۇيىمنىڭ باس حاتشىسى بولدى. جاڭا جىلدان باستاپ رەسەيدە قالا ما، جوق قازاقستانعا قايتا ورالا ما، ونى ۋاقىت كورسەتەدى.

Abai.kz