دۇيسەنبى, 25 ناۋرىز 2019
انىق 3139 26 پىكىر 29 قاڭتار, 2019 ساعات 07:38

قازاق اقشاسىنا كىمدەر قوجايىن؟

2018 جىلدىڭ ستاتيستيكاسىمەن سويلەيمىز. قازىر قازاقستاندا حالىق سانى 18,2 ميلليون ادامدى قۇراپتى. سونىڭ ىشىندە 59 پايىزى عانا ەڭبەككە جارامدى ەكەن. جانە 1 ميلليوننان استام زەينەتكەر بار. ال قازاقستاندا 5 ميلليوننان استام ادام ەكىنشى دەڭگەيلى بانكتەرگە بەرەشەك. ونىڭ جانە 1,5 ميلليونى قارىزىن قايتارا الماي ءجۇر.

«Abai.kz» اقپاراتتىق پورتالىندا وسىعان دەيىن قارىزبەن قۇل قىلۋدىڭ قازاقستاندىق جوباسى، ياعني بانكتەردىڭ بىلىق-شىلىعى تۋرالى ماقالالار دۇركىن-دۇركىن جازىلدى.

بۇگىن ءبىز قازاق اقشاسىن قالتاعا باسىپ اپ، قونجيىپ وتىرعان قوجايىندار تۋرالى جازباقپىز.

جۋىردا «Ia-centr.ru» اقپاراتتىق-ساراپتامالىق ورتالىعىنىڭ سايتى قازاقستانداعى ەكىنشى دەڭگەيلى بانكتەردە جۇمىس جاسايتىن شەتەل ازاماتتارىن انىقتاپ جازىپتى. اۆتور جانار تۋليندينوۆانىڭ ورىس تىلىندەگى ماقالاسىن قازاق تىلىنە قوتارىپ بەرگەندى ءجون كوردىك.

بىلە جۇرىڭىزدەر، قازاقتى قارىزبەن قۇل قىلىپ جۇرگەن قامپايعان قارىندى مىسىقتىلەۋ، مەشكەي ميسسيونەرلەرىڭىز مىنەكەي:

«قازاقستاننىڭ حالىق بانكى» اق

اتالعان بانكتىڭ ديرەكتورلار كەڭەسى 7 ادامنان تۇرادى. ىشىندە ەكى ادام شەتەلدىك تۇلعا ساناتىندا. ال باسقارما مۇشەلىگىندە شەتەلدىك تۇلعالار جوق ەكەن.

كريستاف رەل

ديرەكتورلار كەڭەسىنىڭ مۇشەسى. 2007 جىلدان بەرى «حالىق بانكتىڭ» تاۋەلسىز ديرەكتورى. كريستاف رەل ۆاشينگتونداعى، ماسكەۋدەگى جانە برازيلياداعى دۇنيەجۇزىلىك بانكتىڭ وكىلدىكتەرىندە جۇمىس جاساعان ەكەن. «BP p.l.c.» دەيتىن ترانسۇلتتىق مۇناي-گاز كومپانياسىندا ۆيتسە-پرەزيدەنت، باس ەكونوميست بولىپ قىزمەت اتقارعان.

فرەنك كايلارس

ديرەكتورلار كەڭەسىنىڭ مۇشەسى. 2009 جىلدان بەرى «حالىق بانكتىڭ» تاۋەلسىز ديرەكتورى. نيدەرلاندتاعى «ABN AMRO» دەيتىن ءىرى بانكتە، «Royal Bank of Scotland Group plc (RBS Group)» دەيتىن بريتان كومپانياسىندا قىزمەت ەتكەن.

Altyn Bank (China Citic Bank Corporation Limited قۇرامىنا كىرەدى)

2016 جىلى قازاقستاننىڭ حالىق بانكىنىڭ مەنشىگىنە تيەسىلى «Altyn Bank» 60 پايىز اكتسياسىن قىتايلىق كومپانياعا ساتقان ەدى.  «Altyn Bank» قازىر قىتايلىق «China CITIC Bank Corporation Ltd» دەيتىن بانكتىڭ قۇرامىنا كىرەدى. ديرەكتورلار كەڭەسىندە 5 شەتەلدىك ازامات بار.

لۋ ۆەي – ديرەكتورلار كەڭەسىنىڭ توراعاسى، اكتسيونەرلىك بانك وكىلى;

ليۋ دزى يۋن – ديرەكتورلار كەڭەسىنىڭ مۇشەسى، اكتسيونەرلىك بانك وكىلى;

ۋاڭ لي - ديرەكتورلار كەڭەسىنىڭ مۇشەسى، اكتسيونەرلىك بانك وكىلى;

تسياۋ شۋ يڭ – ديرەكتورلار كەڭەسىنىڭ مۇشەسى، اكتسيونەرلىك بانك وكىلى;

نگاي كا چيڭ – ديرەكتورلار كەڭەسىنىڭ مۇشەسى، تاۋەلسىز ديرەكتور;

بانكتىڭ باسقارما مۇشەلەرىنىڭ ىشىندە ەكى ادام شەتەل ازاماتى ەكەن.

حۋ تسى فىڭ – باسقارما توراعاسىنىڭ ءبىرىنشى ورىنباسارى;

جيا في – باسقارما توراعاسىنىڭ ورىنباسارى.

Capital Bank Kazakhstan

2013 جىلعا دەيىن بۇل قارجىلىق ۇيىم «تايب قازاق بانكى» دەپ اتالىپ كەلگەن. سەبەبى، باحرەين كارولدىگىنە تيەسىلى «TAIB BANK BSC(c)-مەن ەنشىلەس بانك بولعان.

ءسويتىپ، 2013 جىلدىڭ ساۋىرىندە بانك تولىعىمەن قازاقستاندىق كاسىپكەر وريفجان شاديەۆتىڭ مەنشىگىنە وتەدى. ال 2014 جىلى بۇل بانك ءوزىنىڭ رەسمي اتاۋىن وزگەرتىپ، «Capital Bank Kazakhstan» اق دەپ اتالاتىن بولدى.

«Capital Bank Kazakhstan» اق-نىڭ ديرەكتورلار كەڭەسى 4 ادامنان تۇرادى ەكەن. ونىڭ ەكەۋى شەتەل ازاماتى.

يۋسۋف زيا اسلان – ديرەكتورلار كەڭەسىنىڭ مۇشەسى جانە بانكتىڭ باسقارما توراعاسى;

ەردەن قادىر چەۆيك – تاۋەلسىز ديرەكتور.

بانكتىڭ باسقارما مۇشەلىگىندە 5 ادام بولسا، ونىڭ ىشىندە 3 ادام شەتەل ازاماتى ەكەن.

يۋسۋف زيا اسلان

ديرەكتورلار كەڭەسىنىڭ مۇشەسى جانە بانكتىڭ باسقارما توراعاسى. 1998 جىلدان بەرى تۇركيانىڭ بىرنەشە بانكىندە باسقارۋشى قىزمەتتەر اتقارعان. اتاپ ايتقاندا، «Kentbank & Birlesik Fon Bankasi»، «Turkland Bank»، «BankPozitif Turkey». بۇل جاڭاعى يۋسۋف زيانىڭ جۇمىس ىستەگەن بانكتەرى.

2011 جىلدىڭ تامىزانان بەرى قازاقستاندا جۇمىس جاساپ ءجۇر. «پوزيتيۆ بانك قازاقستان» اق-دا باسقارما توراعاسىنىڭ ورىنباسارى، توراعا قىزمەتتەرىن اتقارعان.

ابدۋرراحمان زەكي اريفوگلۋ

باسقارما توراعاسىنىڭ ءبىرىنشى ورىنباسارى. 1999-2006 جىلدار ارالىعىندا تۇركياداعى «Ziraat Bankasi» دەيتىن بانكتە ءتۇرلى قىزمەتتەردە بولعان. 2006 جىلدان بەرى قازاقستاندا ءجۇر. سول 2006 جىلدان بەرى «كازاحستان-زيراات ينتەرنەشنل بانك» دەيتىن ەنشىلەس بانكتە جۇمىس جاساعان.

بەرتران گوسسار

بولشەك ساۋدا بيزنەسى بويىنشا باسقارۋشى ديرەكتور. فرانتسيادا وقىعان ەكەن. «Amiens Business School» مەكتەبىنىڭ ىسكەرلىك اكىمشىلىك باسقارۋ ماگيسترى. باسقارۋ ءىسى بويىنشا 25 جىلدىق تاجىربيەسى بار. ەۋروپا، تمد مەن ازياداعى (قىتاي، ءۇندىستان،تايلاند، ۆەتنام، گونكونگ، قازاقستان، رەسەي، پولشا جانە چەحيادا) بولشەك ساۋداداعى بانكينگ، تۇتىنۋشىلىق نەسيە سالاسىندا قىزمەتتەر اتقارعان. 2011 جىلدان بەرى قازاقستاندا ءجۇر. «ەۆرازيالىق بانكتە» قىزمەت ەتكەن.

First Heartland Bank

بۇل بۇرىنعى «ەكسپو كرەديت بانك» اق. قارجىلىق ۇيىمنىڭ رەسمي سايتىندا اتالعان ۇيىمنىڭ حالىقارالىق «ABN Amro» مەن «RBS» بانكتەرىنىڭ تاجىربيەسىن نەگىزگە الا وتىرىپ جۇمىس جاسايتىنى جازىلعان ەكەن.

ديرەكتورلار كەڭەسىندە 4 ادام بولسا، ونىڭ ەكەۋى شەتەل ازاماتى.

داۆيد ماشۋري

تاۋەلسىز ديرەكتور. اقش ازاماتى. 10 جىلدان استام ۋاقىت اقش-تا جانە رەسەيدە حالىقارالىق كومپانيالاردا، بانك سەكتورىندا، كونسالينگ جانە ءبىلىم سەكتورىندا، مەملەكەتتىك سەكتوردا قىزمەت جاساعان.

«First Heartland Bank» ديرەكتورلىعىنا كەلمەستەن بۇرىن، «كازكوممەرتسبانك»اق  باسقارما مۇشەسى بولعان.

اندرەي روزانوۆ

تاۋەلسىز ديرەكتور. ۇلىبريتانيا ازاماتى.  CFA, FRM, CAIA. لوندونداعى «Permal Group» مەن  «State Street Global Markets» كومپانيالارىندا باسقارۋشى ديرەكتور بولعان. قر ۇلتتىق بانكى «ۇلتتىق ينۆەستيتسيالىق كورپوراتسياسى» اق-نىڭ تاۋەلسىز ديرەكتورى.

ForteBank

اتالعان بانكتىڭ ديرەكتورلار كەڭەسىندە 1 شەتەل ازاماتى بار ەكەن.

حۋبەرت پاندزا

ديرەكتورلار كەڭەسىنىڭ مۇشەسى. تاۋەلسىز ديرەكتور. 1976-1988 جىلدار ارالىعىندا گەرمانياداعى «Deutsche Bank» باسقارماسىندا جۇمىس جاساعان.

1988 جىلى «Deutsche Bank» بانكىنىڭ ماسكەۋدەگى بولىمشەسىن باسقارعان. 2000 جىلدان باستاپ ەۋروپالىق رەكونسترۋكتسيا جانە دامۋ بانكىنىڭ رەسەيدەگى جانە ورتالىق ازياداعى وكىلى بولعان.

بۇرىن «اليانس بانك» اق تاۋەلسىز ديرەكتورى بولعان.

Kaspi Bank

ميحەيل نۋگزاروۆيچ لومتادزە

اتالعان بانكتىڭ ديرەكتورلار كەڭەسىنىڭ مۇشەسى (بۇرىنعى باسقارما توراعاسى). گرۋزيانىڭ تۋماسى. كەيبىر دەرەككوزدەرىندە لومتادزەنى گرۋزيا ازاماتى دەپ كورسەتەدى.

KZI Bank (كازاحستان زيرات ينتەرنەشنل)

بۇل بانك تۇركياداعى «Ziraat Bankasi» دەيتىن بانكتىڭ ەنشىلەسى. ديرەكتورلار كەڭەسى 3 ادامنان تۇرادى. بۇل ۇشەۋى دە شەتال ازاماتى ەكەن.

مۇسا اردا – ديرەكتورلار كەڭەسىنىڭ توراعاسى. بانكتىڭ رەسمي سايتى مۇسا اردا مىرزانىڭ وسىعان دەيىن «Türkiye Halk Bankası A.Ş.» دەيتىن بانكتە قىزمەت ەتكەنىن، 2011 جىلدان كۇنى بۇگىنگە دەيىن «T.C. Ziraat Bankası A.Ş.» باسقارما توراعاسىنىڭ نەسيەلەندىرۋ جونىندەگى ورىنباسارى بولىپ قىزمەت جاسايتىنىن جازىپتى.

نۇرحان كۇشىككايالار – ديرەكتورلار كەڭەسىنىڭ مۇشەسى. تاۋەلسىز ديرەكتور;

يۋكسەل جەسۋر – ديرەكتورلار كەڭەسىنىڭ مۇشەسى.

اتالعان بانكتىڭ باسقارما مۇشەلەرى 5 ادامنان تۇرادى ەكەن. ونىڭ بىرەۋى شەتەل ازاماتى.

جانان ولەكلي – باسقارما توراعاسى.

Tengri Bank (Punjab National Bank)

بۇل بانكتىڭ 45 پايىز اكتسياسى ۇندىستانداعى «Punjab National Bank»  بانكىنە تيەسىلى. ديرەكتورلار كەڭەسىندە 1 شەتەل ازاماتى بار.

كاليا سابحاش چاندەر – ديرەكتورلار كەڭەسىنىڭ مۇشەسى. تاۋەلسىز ديرەكتور.

باسقارما مۇشەسى 7 ادامنان تۇرادى. ونىڭ ەكەۋى شەتەل ازاماتى.

دينەش كۋمار

باسقارما توراعاسىنىڭ ورىنباسارى. ءۇندىستاندا بانكتىڭ وقۋىن وقىعان. 1986 جىلدان بەرى ۇندىستانداعى «Punjab National Bank» جۇيەسىندە قىزمەت اتقارادى.

دميتري ياكوۆلەۆ

باسقارۋشى ديرەكتور. 2002-2010 جىلدار ارالىعىندا «بانك رۋسسكي ستاندارت» اق-دا، 2010 جىلدان بەرى ۆتب گرۋپپاسىندا ءتۇرلى قىزمەتتەردە بولعان. 2015 جىلدان بەرى قازاقستاندا ءجۇر.

«ازيا كرەديت بانك»

بۇل بانكتىڭ بۇرىنعى اتاۋى -  «سوۆمەستنىي بانك «لاريبا-بانك».

ديرەكتورلار كەڭەسىنىڭ جانە باسقارما مۇشەلەرىنىڭ 99,9 پايىز اكتسياسى سۇلتان نۇربول سارىبايۇلىنا تيەسىلى. شەتەلدىك تۇلعالار جوق.

«الفا-بانك» ەب

«الفا-بانك» ەب «الفا-گرۋپپ» دەيتىن بانكتىك گرۋپپانىڭ «ABH Holdings S.A.» دەپ اتالاتىن جەكە حالىقارالىق حولدينگىنە كىرەدى. شاتاب-پاتەرى ليۋكسەمبۋرگتە ورنالاسقان.

ديرەكتورلار كەڭەسىندە 7 ادام بولسا، ونىڭ تورتەۋى شەتەل ازاماتى.

يليا پوز

ديرەكتورلار كەڭەسىنىڭ توراعاسى. ومبى مەملەكەتتىك ۋنيۆەرسيتەتىن بىتىرگەن. 2000 جىلى «موسكوۆسكي دەلوۆوي مير» دەيتىن كومپانيادا جۇمىس جاساعان. 2008 جىلدان بەرى «الفا-بانك» ەب-دا ءجۇر.

روبەرت اندجەي دزيالاك

ديرەكتورلار كەڭەسىنىڭ مۇشەسى. 2002-2016 جىلدارى ۋكراينا مەن پولشادا بانك سەكتورىندا قىزمەت  ەتكەن ەكەن. 2016 جىلدان بەرى «الفا-بانك» ەب-دا.

ولەگ سىسۋەۆ

ديرەكتورلار كەڭەسىنىڭ مۇشەسى. ديرەكتورلار كەڭەسى توراعاسىنىڭ ورىنباسارى. 1990 جىلى رەسەي فەدەراتسياسى ۇكىمەت باسشىسىنىڭ ورىنباسارى، رف پرەزيدەنتى اكىمشىلىگىندە ورىنباسار بولعان.

دەۆيد مارك براۋن

ديرەكتورلار كەڭەسىنىڭ مۇشەسى. 2000 جىلى «Commerzbank Securities London»، «Merrill Lynch International London»، «Financial Services Authority London» ۇيىمدارىندا جۇمىس جاساعان.

«الفا-بانك» ەب باسقارما مۇشەلىگى 5 ادامنان تۇراتىن بولسا، ونىڭ ەكەۋى شەتەل ازاماتى.

الينا انيكينا

باسقارما توراعاسى. 2011 جىلدان بەرى كۇنى بۇگىنگە دەيىن «كومپانيا «رۋسيا پەترولەۋم»اقب، «ۆارەگاننەفتەگاز» اقب، «ساراتوۆسكي نپز»، «ورەنبۋرگنەفت» اقب ديرەكتورلار كەڭەسىنىڭ مۇشەسى.

يگور شالاي

باسقارۋشى ديرەكتور. 2017 جىلدان بەرى «الفا-بانك» جۇيەسىندە. بانك سالاسىندا 12 جىل جۇمىس جاساپتى.

اتف بانك

ديرەكتورلار كەڭەسىندە 4 ادام بار. ونىڭ ەكەۋى شەتەل ازاماتى.

ادريانو اريەتتي

تاۋەلسىز ديرەكتور. كيەۆتەگى «پراۆەكس-بانك-ءتىڭ» باقىلاۋشىلىق كەڭەسىنىڭ مۇشەسى. كايردەگى «الەكساندريا بانكىنىڭ» ديرەكتورلار كەڭەسىنىڭ مۇشەسى.

ەنتوني ەسپينا

ديرەكتورلار كەڭەسىنىڭ مۇشەسى. باسقارما توراعاسى. 1972 جىلى وڭتۇستىك كۆينسلەندتە ۋنيۆەرسيتەت بىتىرگەن. گونكونگتاعى «Goldride Securities Limited» بروكەرلىك فيرمانىڭ نەگىزىن قالاۋشى جانە ديرەكتورى.

بانكتىڭ باسقارما مۇشەلەگىندە 8 ادام بار. ونىڭ ەكەۋى شەتەل ازاماتى.

ەنتوني ەسپينا – باسقارما توراعاسى;

سەرگەي كوۆالەنكو – باسقارما توراعاسىنىڭ ورىنباسارى. 2000-2010 جىلدار ارالىعىندا ۋكرايناداعى «زيپ» كومپانياسىندا، اكب «ىندۋسترىالبانك» (ۋكراينا), «نوۆايا پوچتا» (ۋكراينا) كومپانياسىندا جۇمىس جاساعان.

Bank RBK

تورستەن پول

ديرەكتورلار كەڭەسىنىڭ توراعاسى. ول بۇل قىزمەتكە 2017 جىلدىڭ قاراشاسىندا «Bank RBK» اق  مەن قر ۇكىمەتى، ۇلتتىق بانك پەن «قازاقمىس» كومپانياسى اراسىندا كەلىسىم جاسالعاننان كەيىن كىرىستى.

بانك Kassa Nova

ديرەكتورلار كەڭەسىندە جانە باسقارما مۇشەلىگىندە شەتەل ازاماتتارى جوق.

بانك ۆتب

بۇل رەسەيدەگى بانك ۆتب-نىڭ ەنشىلەسى. ديرەكتورلار كەڭەسىندە 2 شەتەل ازاماتى بار.

دەنيس بورتنيكوۆ

ديرەكتورلار كەڭەسىنىڭ توراعاسى. بەلارۋسياداعى بانك ۆتب-نىڭ ديرەكتورلار كەڭەسىن باسقارادى. ازىربايجانداعى بانك ۆتب-نىڭ باقىلاۋشىلىق كەڭەسىنىڭ توراعاسى.

سەرگەي ستەپانوۆ

ديرەكتورلار كەڭەسىنىڭ مۇشەسى. 2013 جىلدان باستاپ بانك ۆتب-نىڭ توبىندا جۇمىس جاسايدى.

اتالعان بانكتىڭ باسقارما مۇشەلىگىندە 5 ادام بولسا، ونىڭ ۇشەۋى شەتەل ازاماتى.

دميتري زابەللو – باسقارما توراعاسى;

يۋري ميرونوۆ – 2018 جىلدان بەرى باسقارما توراعاسىنىڭ ورىنباسارى;

ارتەم بادىكوۆ – باسقارما مۇشەسى.

ءتۇيىن. بۇل تولىق ءتىزىم ەمەس. الداعى ۋاقتا بۇل ءتىزىمدى تولىقتىرا جاتارمىز...

ەستەرىڭىزگە سالا كەتەيىك، قازاقستان پرەزيدەنتى نۇرسۇلتان نازارباەۆ قولىنان ءىس كەلمەيتىن ەبەدەيسىز باستىقتاردى قىزمەتسىز قالدىراتىنىن ايتىپ جۇرگەلى دە ءبىراز بولدى. جاتىپىشەر جالقاۋ جەتەكشىلەردىڭ ورنىنا شەتەلدەن ماماندار شاقىرتىپ،  ىس جۇرگىزۋ ىسىنە باسشىلىققا تاعايىنداۋدى مىسال ەتىپ ءجۇر. وتكەن جىلعى قازانداعى جولداۋدا سينگاپۋردى مىسال ەتتى. جەر الەمنەن ىزدەپ ءجۇرىپ، قولىنان ءىس كەلەتىن ەپتىلەردى ەلگە الدىرتۋدى تاپسىردى.

ەسكە تۇسىرەيىكشى، پرەزيدەنت نە دەپ ەدى؟..

«بىزدە «ەير استانانى» كىم باسقارادى؟ اعىلشىن. «نازارباەۆ ۋنيۆەرسيتەتىن؟» جاپون. كورىڭدەر! ەگەر دۇرىس جۇمىس جاساماساڭدار، مەن سەندەردىڭ ورىندارىڭا بارلىعىن سول جاقتان شاقىرتامىن» دەدى پرەزيدەنت.

قاراپ وتىرساق، پرەزيدەنتتىڭ شەتەلدەن مامان شاقىرتۋ تۋرالى باستاماسى ءبىز ءۇشىن جاڭالىق ەمەس ەكەن. ونى جوعارىدان وقىپ كوردىڭىزدەر. بۇل شەتەلدىكتەر نەگە قازاق اقشاسىنا قوجايىندىق جاساپ ءجۇر دەپ، جانە شۇيلىگە المايسىڭ، وكىنىشكە وراي.

پرەزيدەنتتىڭ 2016 جىلعى «ۇلت جوسپارى – قازاقستاندىق ارمانعا باستايتىن جول» اتتى ماقالاسىن ەسكە تۇسىرەيىكشى. سول ماقالانىڭ «مەملەكەتتى كاسىبيلەندىرۋ» دەپ اتالاتىن بولىمىندە بىلاي دەپ جازىلعان: «قازىر قازاقستاندىق مەملەكەتتىك قىزمەتتى دامىتۋدىڭ جاڭا كەزەڭى باستاۋ الدى. جاڭا زاڭعا بىرقاتار قاعيداتتى نورمالار ەنگىزىلگەن. ەكىنشىدەن، مەملەكەتتىك قىزمەتكە اشىق كونكۋرس ارقىلى جانە كادر ساياساتى جونىندەگى ۇلتتىق كوميسسيانىڭ شەشىمى بويىنشا كەلىسىمشارتتىق نەگىزدە مەملەكەتتىك ەمەس سەكتورداعى باسقارۋشىلار قاتارىنان ازاماتتار جانە شەتەلدىك مەنەدجەرلەر تارتىلا الادى».

ءبىز جوعارىدا قازاقستانداعى ەكىنشى دەڭگەيلى 14 بانكتىڭ باسشىلارىن ءتىزىپ جازدىق. ول جەرلەردە 39 شەتەل ازاماتى جۇمىس جاساپ ءجۇر.

ەستەرىڭىزگە سالا كەتەيىك، 2018 جىلدىڭ 30 قاراشاسى كۇنى «Abai.kz» اقپاراتتىق پورتالىندا «قازاق مۇنايىنا قازاقتان باسقانىڭ ءبارى باستىق» اتتى ماقالا جاريالانعان ەدى. وندا قازاقستانداعى ءىرى مۇناي كومپانيالارىندا باسشىلىق قىزمەتتە جۇرگەن شەتەلدىك تۇلعالاردىڭ ەسىم-سويىن ءتىزىپ جازىپ كورسەتكەن ەدىك. ەندى مىنە، قازاقستان بانكتەرىنىڭ شەتەلدىك قوجايىندارىن جاريالاپ وتىرمىز. وقىڭىز، كورىڭىز، ءبىلىڭىز...

نۇرگەلدى ابدىعانيۇلى

Abai.kz

26 پىكىر