لاۋلاپ جانعان وت دەيدى،
زارىم نەگە جەتپەيدى؟
شىرىلداعان بەس ءسابي
كوز الدىمنان كەتپەيدى!..

قىسقا ما ەدىڭ ءومىر-اي!
قاپا ما ەدىڭ كوڭىل-اي!
وتقا ورانىپ جوق بولعان
بەس ءسابيدىڭ ءولىمى-اي!

قالدى كىمگە جەر كەڭىپ،
كىمگە مۇنداي «ەركەلىك»؟
ءبىر-اق تۇندە بەس ءسابي
ولگەن دەي مە ورتەنىپ!

ءىشىم كۇيىپ بارا ما؟
سانسىز سۇراق سانادا...
ولگەن دەيدى بەس ءسابي
انا اتى جوق قالادا!

ول ءبىر زۇلمات ءتۇن ەكەن،
اجال كەزىپ ءجۇر ەكەن.
مۇنداي كۇيگە قازاقتى
جەتكىزگەندەر كىم ەكەن؟

كورگەن كۇنى ازاپ پا،
كورگەن كۇنى مازاق پا؟
نەگە قازاق، جۇمىسسىز،
باسپاناسىز - قازاق پا؟..

ايرىلعان كىم دىنىنەن،
ايرىلعان كىم، تىلىنەن؟
ىسىلداي ما قازاققا
سۋىق جىلان ىنىنەن؟

نەگە قازاق تونالدى،
نەگە بايلىق جوعالدى؟
بەس ءسابيدىڭ ءولىمى
ويلانتار ما ولاردى؟..

دارمەنسىز ۇلت كەكتى مە،
ۇرى، جەمقور – ەپتى مە؟
جانۇشىرعان بەس ءسابي
وتقا ورتەنىپ كەتتى مە؟

ەي، تويماستار، تويدىڭ با،
ەي، قويماستار، قويدىڭ با؟
بەس ءسابيدىڭ اجالى،
كىم-كىمدەردىڭ موينىندا؟..

جۇماش كوكبورى

Abai.kz