جاقىندا ءبىزدىڭ قوستاناي وبلىسىندا ۇسىنعان پارادان باس تارتىپ، ادالدىق تانىتقان ەكى بىردەي پوليتسيا قىزمەتكەرى كەۋدەگە تاعاتىن «التىن جۇرەك» بەلگىسىمەن ماراپاتتالعانى تۋرالى وسىنداعى ءباسپاسوز جارىسا جازدى. بۇل جاعداي ءتىپتى رەسپۋبليكالىق دەڭگەيدە دە جالعاسىن تاپتى. مۇنداي بەلگىنى وسىنداعى مەملەكەتتىك قىزمەت ىستەرى مەن جەمقورلىققا قارسى ءىس-قيمىل اگەنتتىگىنىڭ وبلىسىمىزداعى دەپارتامەنتى جانىنداعى «استانا - ادالدىق الاڭى» اتتى جوبالىق وفيس ۇلەستىرەتىن كورىنەدى.

- دەپارتامەنت قىزمەتكەرلەرى دانيار ەرماعانبەتوۆ پەن قاجىمۇرات جۇماعازينوۆ بۇل ۇلگىسىمەن ءبىزدىڭ قۇقىق قورعاۋ ورگاندارىنىڭ پارادان اۋلاق جۇرەتىن ادالدىعىن تانىتتى, - دەيدى اتالمىش ءوفيستىڭ مەنەدجەرى ەۆگەني بەدىچ دەگەن ازامات  الگى جىگىتتەردى ءبىراز جەرگە اپارىپ تاستادى.

اتامىز قازاق «جاقسىنىڭ جاقسىلىعىن ايت، نۇرى تاسىسىن» دەگەندى بەكەر ايتپاعان بولار. بۇل ازاماتتاردىڭ ادالدىعىنا كىم-كىمنىڭ ريزا بولارى ءسوزسىز. قازىرگى مىناۋ دۇنيەنىڭ ءبارىن اقشا دەگەن پالە بيلەگەن زاماندا ەشبىر ەڭبەكسىز قولىنا تيەتىن قوماقتى سومادان ءپرينتسيپتى تۇردە باس تارتىپ، مىنا قۋ دۇنيەگە قىزىقپاي، ءوزىن-ءوزى ۇستاپ قالۋى، ارينە، قازىرگى جاستارعا ۇلكەن ۇلگى بولارى انىق. بۇعان ەشكىمنىڭ دە داۋى جوق.

الايدا ءبىزدىڭ كوڭىلىمىزدى كۇپتى ەتىپ كەتكەن بىرەر جايتتى ايتپاسا تاعى دا بولمايتىن ءتۇرى بار. بىزدىڭشە، پارادان باس تارتقان ادامدى ماراپاتتاۋدىڭ ءوزى بۇل دەرتتىڭ قوعامىمىزدىڭ تامىرىنا تەرەڭ بويلاپ كەتكەنىن انىق بايقاتادى. ايتپەسە جاڭاعىداي پارادان باس تارتۋ ەرلىك ەمەس، پوليتسيا قىزمەتىنىڭ جاقسى داعدىسىنا اينالۋى قاجەت. قايتا كەرىسىنشە اقشاعا قىزىعىپ، جەڭ ۇشىنان جالعاسقان قۇقىق قورعاۋ قىزمەتكەرلەرىنىڭ كەزدەسۋى توتەنشە وقيعا رەتىندە قاراستىرىلۋى كەرەك. مىنە، سوندا عانا ەلدىڭ وسىنداي ورگاندارعا دەگەن قۇرمەتى ارتىپ، ولارعا دەگەن سەنىم مىقتاپ ورنايدى. بۇل بۇكىل قوعام بولىپ شەشەتىن اسا كۇردەلى قۇبىلىس، ال ەندى جەكەلەنگەن وقيعانى ايرىقشا اسپەتتەۋدىڭ ءوزى داڭعازالىق پەن جالاڭ ۇرانعا ۇقساپ كەتەرى ايقىن. ونىڭ ۇستىنە «جامان ايتپاي جاقسى جوق» دەگەندەي الگى ەكى ازاماتىمىزدىڭ ءبىرى كەيىنىرەك دۇنيەگە قىزىعىپ كەتىپ، جولدان تايىپ كەتپەسىنە كىم كەپىل؟ قانشا دەگەنمەن، ولار دا جۇمىر باستى پەندە. ال اقشا  دەگەن پالە ەكىنىڭ ءبىرىنىڭ باسىن اينالدىرىپ جىبەرەتىن جامان قاسيەتى بار. ال ەندى مۇنداي وقيعا ۇشىراسسا، الگىندەي ناگرادان قانداي قاسيەت، قانداي بەدەل قالادى؟

ەگەر قيسىنعا سايار بولساق، بۇل ناگرادانىڭ توڭىرەگىندە كوڭىلدى كۇپتى ەتكەن بىرەر ساۋال بوي كوتەرەدى. ماسەلەن، الگىندە دەپارتامەنتتەگى پالەنباي قىزمەتكەرلەردىڭ ىشىندە وسى ەكەۋى عانا پەرىشتەدەي ادال بولسا، قالعاندارى شە؟ ولارعا ازىرگە ۇلكەن كۇمانمەن قاراۋىمىز كەرەك پە؟

سوسىن، مۇنداي جەكەلەنگەن قۇبىلىستار الگى مەنەدجەر ايتقانداي بۇكىل قۇقىق قورعاۋ ورگاندارىنىڭ تۇگەلدەي سۋدان تازا، سۇتتەن اق ەكەنىن تانىتپايدى. مىنە  شىندىقتان تىم الىستاۋ جاتقان وسى ءسوزدىڭ وزىنەن جاساندىلىق پەن كوزبوياۋشىلىقتىڭ كورىنىسىن انىق بايقاۋعا بولادى. ال بۇل جاقسى ءۇردىس ەمەس.

جايبەرگەن بولاتوۆ، قوستاناي

Abai.kz