مەملەكەت باسشىسى ن.نازارباەۆتىڭ “پرەزيدەنتتىڭ بەس الەۋمەتتىك باستاماسى” اتتى حالىققا ۇندەۋىنىڭ بەسىنشى باستاماسى - «ەلدى گازبەن قامتاماسىز ەتۋدى جالعاستىرۋ» دەپ اتالعان بولاتىن. وسىعان سايكەس وڭىرلەردە اتقارىلىپ جاتقان اۋقىمدى ىستەر از ەمەس.

ماسەلەن، بىلتىرعى جىلدىڭ جەلتوقسان ايىندا پرەزيدەنت ن. نازارباەۆ استانادا وتكەن «يندۋستريالاندىرۋدىڭ ەكىنشى بەسجىلدىعى: قازاقستاندا جاسالعان» اتتى جالپىۇلتتىق تەلەكوپىرگە قاتىسقان بولاتىن. سول شارادا ونلاين رەجيمدە بىرقاتار يندۋستريالىق، ينفراقۇرىلىمدىق، اگرارلىق جانە تسيفرلىق جوبالار ىسكە قوسىلعان ەدى. سوالردىڭ ىشىندە - "سارىارقا" گاز قۇبىرىنىڭ قۇرىلىسى دا بار. ەلباسى ناۋرىز ايىنداعى حالىققا ۇندەۋى كەزىندە «ءبىز قاراوزەك (قىزىلوردا وبلىسى) – جەزقازعان–قاراعاندى–تەمىرتاۋ–استانا باعىتىندا ماگيسترالدى گاز قۇبىرىن سالۋ جوباسىن جۇزەگە اسىرۋىمىز كەرەك. وعان تيىسىنشە قاراجات تارتۋ قاجەت بولادى، سونىڭ ىشىندە حالىقارالىق قارجى ينستيتۋتتارىنان دا. بۇل 2,7 ميلليون ادامدى گازبەن قامتاماسىز ەتۋمەن قاتار، شاعىن جانە ورتا بيزنەستىڭ جاڭا وندىرىستەرىن اشۋعا مۇمكىندىك بەرەدى. سونىمەن بىرگە، ەكولوگيا جاقسارادى» - دەگەن بولاتىن. بۇل ۇندەۋ جاڭا گاز قۇبىرىنىڭ تارتىلۋىنا جول اشتى.

ەلوردا تورىندەگى تەلەكوپىر كەزىندە مەملەكەت باسشىسى 5 الەۋمەتتىك باستامانىڭ» ءبىرى رەتىندە استانانى گازداندىرۋ جوباسىنداعى قىزىلوردا-جەزقازعان-قاراعاندى-تەمىرتاۋ-استانا باعىتى بويىنشا ۇزاقتىعى 1061 كم بولاتىن جانە جىلىنا 2,2 ميلليارد تەكشە مەتر گاز وتكىزۋ مۇمكىندىگى بار «سارىارقا» گاز ماگيسترالىنىڭ 1-ءشى كەزەڭىن ىسكە قوسۋعا پارمەن بەردى.

- بۇل ءبىزدىڭ ەڭ ءىرى جوبامىزدىڭ ءبىرى. مۇناي مەن گاز شىعاراتىن مەملەكەت رەتىندە قازاقستاننىڭ ورتالىعىن گازداندىرۋ ماسەلەسىنە ەندى عانا نازار اۋداردىق. ەندى بۇل ەل الدىنداعى ۇلكەن جاۋاپكەرشىلىك. ءبىز كەلەسى جىلى وسى ماڭىزدى گاز قۇبىرىنىڭ قۇرىلىسى اياقتالىپ قالدى دەپ ايتاتىن بولامىز. بۇل گاز قۇبىرى ءبىزدىڭ ەلوردامىزعا دەيىن جەتىپ، ءار ۇيگە بارادى. وسىلايشا، ونەركاسىبىمىز وركەندەي تۇسەدى. سىزدەرگە ساتتىلىك تىلەيمىن»، - دەگەن بولاتىن ەلباسى.

بۇگىندە جوبانىڭ سمەتالىق قۇجاتتاماسى ازىرلەنىپ، ساراپتامالىق وڭ قورىتىندى الىنعان. 2019 جىلى قۇرىلىسى باستالاتىن گاز قۇبىرىنىڭ بۇگىندە قارجىلاندىرۋ كەستەسى مەن شارتتارى ازىرلەنىپ ۇكىمەتتىڭ ءتيىستى شەشىمدەرىمەن بەكىتىلگەن.

- ناۋرىز ايىندا ءسىز جاريالاعان 5 الەۋمەتتىك باستامانىڭ ءبىرى ەلدىڭ ورتالىق جانە سولتۇستىك ايماقتارىن گازداندىرۋعا ارنالعان بولاتىن. قولعا الىنعان «سارىارقا» ماگيسترالدىق گاز قۇبىرى «قىزىلوردا-جەزقازعان-قاراعاندى-تەمىرتاۋ-استانا» باعدارى بويىنشا وتەدى. ونىڭ جالپى ۇزىندىعى 1 061 شاقىرىمعا تارتىلادى جانە ءبىر جىلداعى گاز وتكىزۋ مۇمكىندىگى 2,2 ملرد تەكشە مەترگە جەتەدى. اتالعان جوبانى ىسكە اسىرۋ 2 ميلليون 700 مىڭ قازاقستاندىقتى گازبەن قامتاماسىز ەتۋگە جول اشادى، - دەدى «استانا گاز» قمگ باس ديرەكتورى ساعيدوللا ماقاشەۆ.

«سارىارقا» گاز ماگيسترالىن سالۋدىڭ ماڭىزى جوعارى. قاراوزەك گاز كومپرەسسورلىق ستانتسياسىنان 44 شاقىرىم جەردە «بەينەۋ-بوزوي-شىمكەنت» گاز قۇبىرىنىڭ بويىنان بۇرىپ سالىناتىن جوبا اياسىندا مىڭ شاقىرىمنان استام ماگيسترالدى جەلى تارتىلادى. قۇرىلىس اياقتالعاندا ەل ورتالىعى مەن سولتۇستىك وڭىرلەرىندەگى 171 ەلدى مەكەنگە كوگىلدىر وتىن جەتەدى. ونىڭ ىشىندە استانا قالاسى ماڭى مەن قاراعاندى وبلىسىنىڭ 119 ەلدى مەكەنى جانە اقمولا وبلىسىنىڭ 51 ەلدى مەكەنى تابيعي گازبەن كەزەڭ-كەزەڭىمەن قامتاماسىز ەتىلەدى.

قازىرگى تاڭدا حالىقتى گازداندىرۋ دەڭگەيى 47,38% قۇرايدى. بۇل دەگەنىمىز 8,5 ميلليون تۇرعىن گازبەن قامتىلعان. اعىمداعى جىلى مەملەكەت تاراپىنان گازداندىرۋعا 18,4 ميلليارد تەڭگە، ال ۇلتتىق وپەراتور تاراپىنان 1,5 ميلليارد تەڭگە قاراستىرىلعان. ۇستىمىزدەگى جىلدىڭ قورىتىندىسى بويىنشا كوگىلدىر وتىنعا قول جەتكىزگەن تۇرعىندار سانى تاعى 129 مىڭعا ارتادى دەپ كۇتىلۋدە. بۇگىندە ەلىمىزدەگى 17 ءوڭىردىڭ 11-ءى تابيعي گازبەن قامتىلعان.

اbai.kz