2019 جىلى 19 ناۋرىز ەلىمىزدە ۇلكەن تاريحي وقيعا ورىن الدى. نۇرسۇلتان نازارباەۆ پرەزيدەنتتىك وكىلەتتىگىن توقتاتاتىنىن جاريالادى. ال بۇگىن رەسپۋبليكا پرەزيدەنتى وكىلەتتىگىن ۋاقىتشا اتقاراتىن قاسىم-جومارت توقاەۆ قازاقستان حالقىنا انت بەردى.

وسى وقيعاعا بايلانىستى بىرقانشا ازاماتتاردان پىكىر سۇراعان ەدىك.

بەرىك ابدىعالي، cاياساتكەر:

– بۇل تاريxي تۇلعانىڭ - تاريxي شەشىمى. نۇرسۇلتان نازارباەۆ ءوز مالىمدەمەسىندە بيلىكتە بولعان 30 جىلىنا شولۋ جاساپ، مەملەكەت تاريحىنداعى ماڭىزدى وقيعالارعا توقتالىپ ءوتتى. شىن مانىندە تۇڭعىش پرەزيدەنت وتە قيىن، كۇردەلى كەزەڭدە ەل تىزگىنىن قولىنا الدى. كەڭەستىك قازاقستاننان تاۋەلسىز قازاقستان قالىپتاستىرۋ جولىندا ۇلكەن جاۋاپكەرشىلىكتى موينىنا جۇكتەدى. قيىن-قىستاۋ ۋاقىتتان ەلدى امان الىپ شىقتى. قاراپ وتىرساق، تاۋەلسىزدىك جىلدارىندا جاڭا ۇرپاق ءوسىپ-جەتىلدى. مەملەكەتتىڭ دامۋ ءۇردىسىن جالعاستىراتىن تۇلعالار قالىپتاستى. وسىنىڭ ءبارى مەملەكەتتىك ساياساتتا ساباقتاستىق جۇرەتىنىن كورسەتەدى. ۇلكەن وزگەرىس بولادى دەپ ويلامايمىن. نۇرسۇلتان نازارباەۆتىڭ تۇڭعىش پرەزيدەنت دەگەن مارتەبەسى ساقتالادى. "نۇر وتان" پارتياسىنىڭ توراعاسى قىزمەتىندە قالا بەرەدى. سوڭعى وزگەرىستەرگە بايلانىستى قاۋىپسىزدىك كەڭەسى توراعاسىنىڭ قۇزىرەتى كەڭەيدى.

تاۋەلسىزدىك جىلدارى تۇڭعىش پرەزيدەنتتىڭ ەل قۋاتىن ەسەلەۋگە قوسقان ەڭبەگى مەن ۇلەسى شەكسىز. قازاق مەملەكەتى جاڭعىردى. شەكارامىز بەلگىلەنىپ، مەملەكەتتىك رامىزدەرىمىز انىقتالدى. تاۋەلسىزدىك قۇندىلىقتارى قالىپتاستى. قازاقستان الەمگە تانىلىپ، عالامدىق ساياسي پروتسەستەرگە بەلسەندى ارالاسا باستادى. وسى 30 جىل قازاق تاريxىندا "نۇرسۇلتاننىڭ نۇرلى جولى" دەگەن اتاۋمەن قالادى.

ءازىمباي عاني، ساياساتتانۋشى:

– نۇرسۇلتان نازارباەۆتىڭ پرەزيدەنتتىك قىزمەتىن وتە بيىك باعالاۋ كەرەك. بىرىنشىدەن، ەلىمىزدىڭ ەگەمەندىگى، تەرريتوريالىق تۇتاستىعى ساقتالدى. ەكىنشى جاعىنان، تاۋەلسىزدىكتىڭ العاشقى جىلدارى جاقسى ەكونوميكالىق رەفورمالار جاسادى. سالىستىرمالى تۇردە ايتقاندا، قازاقستاننىڭ جالپى ىشكى ءونىمى وزبەكستاننان بەس ەسە جوعارى بولدى. مىسالى، بەس ميلليون وزبەك وزگە ەلدەردە جۇمىس ىستەپ ءجۇر. ال بۇنداي جاعداي بىزدە جوق. ال ۇشىنشىدەن، شەتەلدەگى قازاقتاردى جيناپ، ەگەمەندىكتى قامتاماسىز ەتتى. ونىڭ ۇستىنە، بەيبىت جولمەن، ساياسي كۇرسەسسىز ءوز ەركىمەن قىزمەتىنەن شەگىندى. بۇل دا وتە كورەگەن شەشىم.

نازارباەۆ بيلىگى كەزىندە قازاقستان سىرتقى ساياساتتا بەلسەندى بولدى. حالىقارلىق قاتىناستاردى جاقسى جولعا قويا ءبىلدى. مەن نۇرسۇلتان ءابىشۇلىن ماقتاپ جۇرگەن قازاقتاردىڭ ءبىرىمىن. بىراق، ەلدە قوردالانىپ قالعان ماسەلەلەر دە از ەمەس. سونىڭ ىشىندە ەڭ ماڭىزدىسى، ەلدە قۇقىقتىق-ساياسي رەفورما جاسالۋى كەرەك. بۇل - ەل ەكونومكيكاسىنىڭ ءوسۋىنىڭ باستى تىرەگى. بۇل قۇقىقتىق كەپىلدىك بەرەدى. شەتەل ينۆەستورلارىن دا قازاقستانعا سەنىمدى تۇردە كەلۋىنە جول اشادى. ودان كەيىن، مەملەكەتتىك ءتىلدىڭ مارتەبەسىن كوتەرۋ كەرەك. بۇل دا ءسال اقساپ تۇرعان سالا. ەندى كەلەسى پرەزيدەنتتىڭ الدىندا نارىقتىق قاتىناستاردى تەرەڭدەتۋ، قۇقىقتىق-ساياسي رەفورما جاساۋ جانە ءتىل ماسەلەسىن شەشۋ مىندەتى تۇر.

باحتيار قاباسوۆ، «رۋحاني جاڭعىرۋ» جۋرنالىنىڭ رەداكتورى:

– ەلباسى نۇرسۇلتان نازارباەۆتىڭ الەم الدىنداعى ابىرويى جوعارى، بەدەلى اسقاق، ءجۇزى جارقىن، ءسوزىنىڭ ءوتىمدى، ويى ۇتىمدى، پىكىرى پايىمدى قاسيەتىن الەم تۇگەل تانىپ وتىر. قازىرگى تاڭدا جانە بولاشاقتا ەلىمىز باعىندىراتىن تالاي اسۋ بار. مىنە، وسىنداي بيىك ماقساتتار ءبىزدى تەك العا جەتەلەۋدە. مۇنى حالىقتىڭ سان عاسىر اڭساعان ارمانىنىڭ ورىندالعانى دەپ بىلەمىن. قازاق حالقىنىڭ ارمانى شىندىققا اينالۋىنا ەلباسى نۇرسۇلتان نازارباەۆ كەپىل بولدى. ول مىزعىماس مەملەكەت قانا ەمەس، تۇبىرىمەن جاڭارعان دەموكراتيالىق قوعام قۇردى. بۇگىندە الەمنىڭ وزىق ەلدەردىڭ ۇلگىلەرىنە، تاجىريبەلەرىنە سۇيەنە وتىرىپ، وزىندىك جولىن تابا بىلگەن قازاقستاننىڭ قارىشتاپ دامۋىنىڭ باستى ەرەكشەلىگى دە – وسىندا. ايتا بەرسەك، ەلباسىنىڭ ەرلىگى جەتەرلىك. باستىسى، بەيبىتشىلىك ساقتالىپ، ەلىمىز امان، جۇرتىمىز تىنىش بولسىن!

Abai.kz