بۇگىن باقىت اعا ەسكە تۇسكەنى. بۇل كىسى جايلى ينتەرنەتتە نە مالىمەت بار ەكەن، - دەپ اقتارسام ءبىر اۋىز ءسوز جوق.

باقىت ءالىموۆ - كسرو جۋرناليستەر وداعىنىڭ مۇشەسى، ۇزاق ۋاقىت "كەربۇلاق جۇلدىزى" دەگەن اۋداندىق گازەتتى باسقاردى. "اۋداندىق" دەگەندى وقىعاندا ءبىراز ادام مۇرىن شۇيىرەر، بىراق، جۋرناليست دەگەن وتىرعان ورنىڭا ەمەس، ىستەگەن ىسىڭە قاراي باعالاناتىن ماماندىق.

"نەۆادا - سەمەي" بۇرقىراپ تۇرعان شاقتا سارىوزەكتىڭ تۇبىنەن اشىلىپ، ەلدىڭ زارەسىن العان اشىق پوليگوندى جابۋعا كۇش سالدى. ماقالا جازىپ، ۇندەۋ جاساپ، قوعامدىق قوزعالىستىڭ ۇيىتقىسى بولدى. تۇتاس رەسپۋبليكا وسىنى تىلەدى، اقىرى ەل تىلەگى قابىل بولىپ، پوليگون جابىلدى.

باقىت اعا الماتىداعى يادرولىق قارۋعا قارسى كونگرەسكە ارنايى شاقىرتۋ الدى.

90-جىلداردىڭ باسىنداعى اۋىر كەزەڭدە گازەتتى جاپتىرماي امان الىپ شىقتى. اكىمدىك اقشا بەرمەي اۋرەلەسە قالاممەن ىرەپ جىبەرەدى.

1998 جىلى 18-قىركۇيەكتە باس ماقالاعا بولىنگەن بەتتىڭ ءتورت باعاناسىن بوس شىعارىپ، ورتاسىنا "بۇل ءتورت باعانانى ءتورت ايدان بەرى گازەتتىڭ باسپاحانالىق شىعىنىنا ءتورت تيىن، رەداكتسيا ۇجىمىنىڭ جالاقىسىنا ءۇش ايدان بەرى ءۇش تيىن بولمەي اۋرە-سارساڭعا سالىپ قويعان اۋداندىق قارجى بولىمىنە نارازىلىق رەتىندە تازا باسىپ وتىرمىز" دەپ جازىپ قويىپتى. وسى كۇنى مۇنداي مۇمكىن بە، جۋرناليستەردىڭ دە، قۇرىلتايشىلاردىڭ دا مىنەز-قۇلقى قاتتى وزگەردى ەمەس پە؟

وسىنداي ازاماتتى ەل بىلمەۋى اۋەلى وعان، ودان كەيىن ۇشىنا كىر جۇقپاعان قالامىنا وبال بولار. ول كىسىنىڭ ماماندىعىنا دەگەن ماحابباتى جۇقپالى ەدى، ايتا بەرەتىن، ءسويتىپ مەنىڭ اڭسارىمدى اۋداردى، ەكى قىزى اينۇر مەن ەلنۇر دا وسى سوقپاققا ءتۇستى.

سۋدىراپ سويلەي العاننىڭ ءبارى ءوزىن جۋرناليست ساناي باستاعان بۇل كەزەڭدە باقىت الىموۆتەي حاس شەبەردىڭ تاعدىرى جاستارعا ۇلگى بولسا يگى.

بيىل 28 ساۋىردە كوز جۇمعانىنا 11 جىل بولادى ەكەن، توپىراعىڭىز تورقا بولسىن.

سەرىك ابىكەنۇلىنىڭ facebook پاراقشاسىنان

Abai.kz