دۇيسەنبى, 19 تامىز 2019
اباي.tv 6471 41 پىكىر 22 ءساۋىر, 2019 ساعات 09:08

زەلەنسكي: "پوست كەڭەستىك ەلدەر بىزگە قاراسىن!"

پيوتر پوروشەنكو ۋكراينا پرەزيدەنتى سايلاۋىنىڭ ەكىنشى تۋرىنداعى قارسىلاسى ۆلاديمير زەلەنسكيدى جەڭىسىمەن قۇتتىقتادى. بۇل تۋرالى ۇلتتىق ەكزيتپول ناتيجەلەرى جاريالانعان ءباسپاسوز كونفەرەنتسياسىندا بەلگىلى بولدى. سايلاۋ ناتيجەسى بويىنشا، زەلەنسكي 73 پايىز، ال پوروشەنكو – 25 پايىز داۋىسقا يە بولعان.

زەلەنسكيدىڭ جەڭىسكە جەتكەنىن ەكزيتپول عانا ەمەس، ۋكراينانىڭ رەسمي ورتالىق سايلاۋ كوميسسياسى دا راستاپ وتىر. ورتالىق سايلاۋ كوميسسياسى پرەزيدەنتتىك سايلاۋدىڭ ەكىنشى تۋرىنداعى ەلەكتروندى حاتتامالاردىڭ 52,03 پايىزىن وڭدەپ بولعانىن، قازىرشە كوش باسىندا زەلەنسكيدىڭ تۇرعانىن مالىمدەدى.

ءبىز رەسمي مالىمەتتەرگە كەزەك بەرەيىك. قازىر ۆلاديمير زەلەنسكي كوش باستاپ تۇر، وعان تۇرعىنداردىڭ 73,04% داۋىس بەرگەن. ال پەتر پوروشەنكونى سايلاۋشىلاردىڭ  24,61% جاقتاعان.  جارامسىز بولىپ قالعان بيۋللەتتەندەر سانى 2,33 پايىزدى قۇراعان.

ەكزيتپول قورىتىندىلارى جاريالانعان ۋاقىتتا ءوز شتابىندا مالىمدەمە جاساعان زەلەنسكي وتباسى مەن جاقتاستارىنا العىس ايتتى. ول پوستكەڭەستىك ەلدەردى ۋكراينادان ۇلگى الۋعا شاقىردى.

زەلەنسكي: "مەن ءالى رەسمي پرەزيدەنت ەمەسپىن. ايتسە دە ۋكراينانىڭ ازاماتى رەتىندە مىنانى ايتقىم كەلەدى. بۇرىنعى كەڭەستىك ەلدەر، بىزگە قاراڭدار! ءبارى دە مۇمكىن (قازىر ءار ەل ءوز تاڭداۋىن جاساي الادى)!" دەدى.

بۇنىڭ الدىندا جاقتاستارىنىڭ كوزىنشە سويلەگەن پوروشەنكو ەكزيتپول ناتيجەلەرىنە سەنەتىنىن ايتىپ، قارسىلاسىن قۇتتىقتاۋعا دايىن ەكەنىن مالىمدەگەن. ۋكراينا پرەزيدەنتى سايلاۋلاردىڭ ءادىل ءارى تازا وتكەنىن مويىندادى.

ۇلتتىق ەكزيتپول قورىتىندىسى بويىنشا، شوۋمەن ۆلاديمير زەلەنسكيدى ۋكراينانىڭ باستى ءىرى ايماقتارىندا، سونىڭ ىشىندە باتىس ايماقتارى دا قولدادى. ول تۋعان دنەپروپەتروۆسك وبلىسىندا سايلاۋشىلاردىڭ 90 پايىزى سوعان داۋىس بەردى. پوروشەنكو ۋكراينانىڭ باتىسىنداعى ەكى وبلىستا عانا الدا كەلەدى، قالعان بارلىق وبلىستاردا زەلەنسكي جەڭىسكە جەتكەن. سايلاۋ اننەكسيالانعان قىرىم مەن رەسەيدىڭ قولداۋىنا يە جىكشىلدەر باقىلاۋىنداعى دونباسس اۋداندارىندا وتكىزىلمەدى.

پوروشەنكو ساياساتتان كەتپەيتىنىن، ەلدىڭ ەۋروپالىق تاراپتا قالا بەرۋىن جاقتايتىندىعىن مالىمدەدى. پوروشەنكونىڭ ايتۋىنشا، ول زەلەنسكيگە جاڭا قىزمەتتەگى العاشقى قادامدارىن جاساۋعا كومەكتەسۋگە دايىن.

ۆلاديمير زەلەنسكي رەسەيدەن ۋكراينالىق ساياسي تۇتقىنداردىڭ بارلىعىن قايتارۋعا ءازىر ەكەنىن مالىمدەگەن. رەسەيمەن قانداي بايلانىس ورناتاتىنى تۋرالى سۇراققا زەلەنسكي "نورماند فورماتىنداعى" كەلىسسوزدەردى جالعاستىراتىنىن ايتتى. زەلەنسكيدىڭ ايتۋىنشا، باستى ماقسات – دونباستاعى سوعىستى دوعارۋ.

اقش-تىڭ كيەۆتەگى ەلشىلىگى زەلەنسكيدى جەڭىسىمەن قۇتتىقتادى. زەلەنسكيدى ەۋروكەڭەس باسشىسى دونالد تۋسك جانە ناتو باس حاتشىسى يەنس ستولتەنبەرگ تە قۇتتىقتادى.​ ۋكراينا پرەزيدەنتىنىڭ يناۋگۋراتسياسى 3 ماۋسىمدا وتەدى.

  • ۆلاديمير زەلەنسكي 1978 جىلى تۋعان، 41 جاستا. كوپشىلىككە "95-ي كۆارتال" كومانداسىنىڭ اكتيور-كوميگى ءارى شوۋمەن رەتىندە تانىمال. بىرقاتار كومەديالىق فيلمدەرگە تۇسكەن.

Abai.kz

41 پىكىر