شارا استانا ديپلوماتيالىق كلۋبتىڭ قولداۋىمەن ءوتىپ جاتىر. وعان قازاقستاننىڭ اقپارات جانە قوعامدىق كەلىسىم مينيسترلىگىنىڭ، قازاقستاننىڭ جاس دەپۋتاتتارى قاۋىمداستىعىنىڭ وكىلدەرى مەن ەكى ەلدىڭ جەرگىلىكتى دەپۋتاتتارى، كاسىپكەرلەرى قاتىسىپ جاتىر.
قاتىسۋشىلار كوتەرگەن باستى تاقىرىپ - قىرعىزستان مەن قازاقستانداعى ءوزىن ءوزى باسقارۋ مودەلى: كورشى ەلدەردىڭ ءتيىمدى تاجىريبەلەرى.
استانا ديپلوماتيالىق كلۋبتىڭ پرەزيدەنتى قايىربولات ساحمەتوۆ مۇنداي فورۋم ەلدىڭ قارىم-قاتىناسى تاريحىندا ءبىرىنشى رەت ءوتىپ جاتقانىن اتاپ ءوتتى.
“فورۋمنىڭ ماقساتى – باۋىرلاس كورشى ەلدەردىڭ ساياسي قارىم-قاتىناسىن نىعايتۋ. بولاشاقتا مۇنداي كەزدەسۋلەردى ءجيى وتكىزۋدى جوسپارلاپ وتىرمىز. مۇنداي پىكىرلەسۋ الاڭدارى بولاشاقتا ورتالىق ازياداعى وزەكتى ماسەلەلەردى قوزعايتىنىنا سەنەمىن”- دەدى ول.
فورۋم قورىتىندىسى بويىنشا "جول كارتاسىن" قۇرماق. قايىربولات ساحمەتوۆ قازاقستاندىق دەپۋتاتتار قىرعىزستاننىڭ ءوزىن ءوزى باسقارۋ تاجىريبەسىنە قىزىعىپ وتىرعانىن جەتكىزدى. سونىمەن بىرگە "قازاقستان - قىرعىزستان" دوستىق قاۋىمداستىعىن قۇرۋ جوسپارلانعان ەكەن.
Abai.kz
