دۇيسەنبى, 16 قىركۇيەك 2019
994 2 پىكىر 7 ماۋسىم, 2019 ساعات 13:59

قازاقستاننىڭ تۇڭعىش پرەزيدەنتىنە «قۇرمەتتى سەناتور» مارتەبەسى بەرىلدى

پارلامەنت سەناتىنىڭ پلەنارلىق وتىرىسى باستالماس بۇرىن نۇرسۇلتان نازارباەۆقا «قۇرمەتتى سەناتور» مارتەبەسىن بەرۋ ءراسىمى وتكىزىلدى.

ەلباسى بارلىق دەپۋتاتتارعا قولداۋ كورسەتكەنى جانە ەڭبەگىن جوعارى باعالاعانى ءۇشىن العىس ايتتى.

– كوپشىلىگىڭىزبەن سوڭعى 30 جىل بويى بىرگە جۇمىس ىستەپ كەلەمىز. ءبىز كوپتەگەن قيىندىقتى بىرگە وتكەردىك. ماعان «قۇرمەتتى سەناتور» مارتەبەسىن بەرۋ تۋرالى شەشىم قابىلداعاندارىڭىز ءۇشىن شىنايى ريزاشىلىعىمدى بىلدىرەمىن، – دەدى نۇرسۇلتان نازارباەۆ.

قازاقستاننىڭ تۇڭعىش پرەزيدەنتى قولعا العان رەفورمالاردى ءتيىمدى جۇزەگە اسىرۋ ىسىندە پارلامەنتتىڭ ساپالى زاڭ شىعارۋ قىزمەتىنىڭ ماڭىزدى ەكەنىن ەرەكشە اتاپ ءوتتى.

– ەلىمىز بۇكىل الەمگە تانىمال بولدى. ەكونوميكامىز دامىپ، ازاماتتارىمىزدىڭ تۇرمىس دەڭگەيى ارتتى. ءبىز مەملەكەتتى جاڭعىرتۋعا باعىتتالعان بىرنەشە باعدارلاما قابىلدادىق. سىزدەر سول قۇجاتتاردى جۇزەگە اسىرۋعا بەلسەنە اتسالىسىپ كەلەسىزدەر. رەفورمالاردىڭ تابىستى بولۋى سىزدەردىڭ جۇمىستارىڭىزعا بايلانىستى، – دەدى ەلباسى.

نۇرسۇلتان نازارباەۆ قوعامنىڭ تۇراقتىلىعىن نىعايتۋ جانە دامۋدىڭ ستراتەگيالىق باعدارىنىڭ ساباقتاستىعىن قامتاماسىز ەتۋ ءۇشىن پرەزيدەنتتىك وكىلەتتىگىن توقتاتۋ تۋرالى شەشىم قابىلداعانىن ايتتى.

– ءبىزدىڭ باستى جەتىستىگىمىز – ەلدەگى تۇراقتىلىق پەن تىنىشتىق. الەمدىك قوعامداستىقتىڭ قابىلداعان شەشىمىمە بىلدىرگەن پىكىرىنە تاڭ قالدىم. ءبىز بۇكىل الەمگە بيلىك ترانزيتىنە قاتىستى ماسەلەنى قالاي شەشۋگە بولاتىنىن كورسەتتىك، – دەدى ەلباسى.

سوڭىندا نۇرسۇلتان نازارباەۆ تاۋەلسىز قازاقستاندى ودان ءارى دامىتۋ جانە وركەندەتۋ ىسىندە جاستاردىڭ ماڭىزدى ءرول اتقاراتىنىن اتاپ ءوتتى.

قازاقستان رەسپۋبليكاسىنىڭ تۇڭعىش پرەزيدەنتى – ەلباسىنى
ءباسپاسوز قىزمەتى

Abai.kz

2 پىكىر