سەيسەنبى, 22 قازان 2019
1906 12 پىكىر 13 ماۋسىم, 2019 ساعات 11:07

ايدوس سارىم ۇلتتىق قوعامدىق سەنىم كەڭەسىنىڭ قۇرىلۋىنا قاتىستى پىكىر ءبىلدىردى

بەلگىلى ساياساتتانۋشى ايدوس سارىم پرەزيدەنت قاسىم-جومارت توقاەۆتىڭ باستاماسىمەن قۇرىلاتىن ۇلتتىق قوعامدىق سەنىم كەڭەسىنە قاتىستى پىكىر ءبىلدىردى.

ەسكە سالايىق، بۇگىن 12 ماۋسىمدا نۇر-سۇلتان قالاسىندا وتكەن يناۋگۋراتسيادان كەيىن ءسوز سويلەگەن مەملەكەت باسشىسى ۇلتتىق قوعامدىق سەنىم كەڭەسىن قۇرۋ تۋرالى جوسپارىن ايتقان ەدى. سونداي-اق، پرەزيدەنت اتالعان كەڭەستى قۇرۋ تۋرالى جارلىققا قول قويعان.

«جالپى، بۇل كەڭەسكە جۇكتەلەتىن مىندەتتەردىڭ ىسكە اسۋى بىرقاتار قادامدارعا بايلانىستى. ەڭ الدىمەن، كەڭەس ەرەجەسىن دۇرىس بەكىتىپ، سودان كەيىن، ونىڭ قۇرامىنىڭ اۋقىمدى بولۋى، ياعني قوعامنىڭ ءاربىر سالاسىندا جۇرگەن ءار كۇشتەردىڭ اتىنان شىققان ازاماتتاردىڭ باسىن قوسا ءبىلۋ ماڭىزدى. سول كەڭەسكە قوعامعا ءسوزى وتەتىن ازاماتتاردىڭ كوپتەپ ەنىپ، ولار ءبىر-بىرىنە قۇرمەتپەن قاراي وتىرىپ، ءتيىستى شەشىمدەردى شىعارۋعا قاۋقارلى بولۋى كەرەك. جۇمىستىڭ تابىستى بولۋى كوبىنە وسىعان بايلانىستى»، - دەدى ساياساتتانۋشى.

ونىڭ ايتۋىنشا، كەڭەس قۇرامىنا ەنگەن مۇشەلەر قوعامداعى ەڭ وزەكتى ماسەلەلەرگە نازار اۋدارىپ، دەر كەزىندە تالقىلاي ءبىلۋى شارت.

«ەكىنشىدەن، كەڭەس وزەكتى ءارى نەگىزگى ماسەلەلەردى ورتاعا سالىپ، سول بويىنشا ءتيستى قۇجاتتاردىڭ نۇسقاسىن، جوباسىن شىعارا الاتىن ۇيىم بولۋى قاجەت دەپ ەسەپتەي الامىن. سايلاۋ، باق، ميتينگتەر تۋرالى، سونداي-اق ساياسي پارتيالار مەن قوعامدىق بىرلەستىكتەر جونىندەگى زاڭنامانىڭ قايتا قارالۋىن كوپتەن بەرى ايتىپ جۇرگەندەر بار. ەگەر وسىلاردىڭ نەگىزگى تۇجىرىمداماسىن، نەگىزگى يدەياسىن بەكىتىپ، سونى زاڭگەرلەرگە تابىستاپ، دۇرىس نۇسقالارىن جاساپ، ونى پارلامەنتكە ەنگىزسە، وندا ۇلتتىق قوعامدىق سەنىم كەڭەسى وزىنە جۇكتەلگەن مىندەتتى ورىنداي الادى دەگەن پىكىردەمىن»، - دەدى ايدوس سارىم.

ساياساتتانۋشىنىڭ پايىمىنشا، سايلاۋ ناۋقانىنىڭ اياقتالۋىنا بايلانىستى نەگىزگى ەموتسيالار تاراعاننان كەيىن، قوعاممەن سويلەسۋ، قوعامدىق-ساياسي كۇشتەرمەن اقىلداسۋ، كەڭەسۋ جۇمىستارى جۇرگىزىلۋى كەرەك. سوسىن پرەزيدەنت باستاما جاساپ وتىرعان كەڭەسكە كوپتەگەن بىلىكتى ازاماتتاردىڭ كەلۋىن قامتاماسىز ەتكەن ءجون.

«قوعامدا تانىلعان، بەدەلدى ازاماتتاردىڭ بىرلەسە جۇمىس ىستەۋىنە العىشارتتار جاساۋ، سەنىمدى ورتا قالىپتاستىرۋ ماڭىزدى»، - دەدى ا. سارىم.

بۇدان بۇرىن حابارلانعانداي، بۇگىن ۇلىقتاۋ ءراسىمىندا پرەزيدەنت قاسىم-جومارت توقاەۆ ۇلتتىق قوعامدىق سەنىم كەڭەسىن قۇرۋدى كوزدەپ وتىرعانىن ءمالىم ەتتى.

«مەن ۇلتتىق قوعامدىق سەنىم كەڭەسىن قۇرۋ ءجون دەپ شەشتىم. ونىڭ قۇرامىنا بارلىق بىرلەستىك وكىلدەرى مەن جاستار ەنەدى. ۇلتتىق قوعامدىق سەنىم كەڭەسىنىڭ العاشقى وتىرىسى وسى جىلدىڭ تامىز ايىندا وتەدى. بيلىك حالىققا بەرگەن بارلىق ۋادەسىن ورىنداۋى ءتيىس»، - دەدى قاسىم-جومارت توقاەۆ ەلورداداعى ۇلىقتاۋ راسىمىندە.

تۇپنۇسقا: قازاقپارات

Abai.kz

12 پىكىر