سەيسەنبى, 22 قازان 2019
1348 0 پىكىر 13 ماۋسىم, 2019 ساعات 12:37

اتامباەۆقا تيىسپەۋشىلىك قۇقىعىن الىپ تاستاۋدى 40 دەپۋتات قولداعان

قىرعىزستاننىڭ جوگوركۋ كەڭەشىندە ەكس-پرەزيدەنت المازبەك اتامباەۆقا قول سۇعىلماۋشىلىق قۇقىعىن الىپ تاستاۋ جونىندەگى ۇسىنىستى 40 دەپۋتات قولدادى. بۇل جونىندە "قىرعىزستان" فراكتسياسىنىڭ مۇشەسى قانات يساەۆ حابارلادى.

بىرقاتار دەپۋتاتتارعا المازبەك اتامباەۆتىڭ 8 ماۋسىمدا وتكەن ميتينگ كەزىندە جوگوركۋ كەڭەشتى سىنعا العانى ۇناماعان. پارلامەنتتەگى قىرعىزستاننىڭ سوتسيال دەموكراتيالىق پارتياسى (قسدپ) فراكتسياسىنىڭ ليدەرى يسا ومۋركۋلوۆ اتامباەۆ "تىپ-تىنىش ۇيىندە وتىرۋ كەرەك ەدى" دەسە، سپيكەر داستان جۋمابەكوۆ ەكس-پرەزيدەنت الاڭعا 10 مىڭ ادام الىپ شىعىپ، "اق ۇيدەگىلەردىڭ" ءبارىن قۋعا دايىن ەكەنىن مالىمدەدى دەيدى.

قسدپ رەسمي وكىلى كۋندۋز جولدۋباەۆا Facebook پاراقشاسىندا دەپۋتاتتاردىڭ ارەكەتىن سىنعا الدى. "حالىق بۇگىنگى بيلىككە اشىق قارسى تۇرا الاتىن جالعىز ساياساتكەر - ەكس-پرەزيدەنتتى تۇتقىنداۋعا مۇمكىندىك بەرمەيدى. ەگەر بيلىك وق-ءدارى سالىنعان بوشكەنى جارعىسى كەلسە، كورسىن", - دەپ جازدى ول.

16 مامىردا ەل پرەزيدەنتى سوورونباي جەەنبەكوۆ ەكس-پرەزيدەنتتەردى جاۋاپقا تارتۋدى كوزدەيتىن زاڭعا قول قويعان. بۇدان بىلاي قىرعىزستاننىڭ ەكس-پرەزيدەنتتەرىندە قول سۇعىلماۋشىلىق قۇقىعى جوق. تەك ول ءۇشىن جوگوركۋ كەڭەش ايىپتاپ، باس پروكۋراتۋرا راستاۋ كەرەك.

اتامباەۆ قىرعىزستاندى 2011-2017 جىلدارى باسقاردى.

قىرعىزستاننىڭ ەكس-پرەزيدەنتتەرى مارتەبەسى تەك روزا وتىنباەۆا مەن المازبەك اتامباەۆتا عانا بار. اسقار اقاەۆ پەن قۇرمانبەك باكيەۆ رەۆوليۋتسيادان كەيىن بۇل مارتەبەدەن ايىرىلدى.

Abai.kz

0 پىكىر