سەنبى, 14 جەلتوقسان 2019
ايماق 1677 0 پىكىر 13 ماۋسىم, 2019 ساعات 11:08

قازالىلىق كاسىپكەر تىڭ شارۋانى قولعا الدى

قىزىلوردا وبلىسى، قازالى اۋدانىندا تۇڭعىش رەت جوعارى ساپالى كافەلگە ارنالعان كلەي شىعاراتىن تسەح ىسكە قوسىلدى،- دەپ حابارلايدى اباي-اقپارات.

اتالعان اۋدانعا جاقىن ورنالاسقان جانقوجا باتىر اۋىلىنىڭ تۇرعىنى الماگۇل تولەپوۆا تىڭ شارۋانى باستاۋ ءۇشىن «اۋىلشارۋاشىلىعىن قارجىلاي قولداۋ قورى» اق ارقىلى 3,5 ملن تەڭگە نەسيە الىپتى. جەكە كاسىپكەر جوبانى جۇزەگە اسىرۋ ماقساتىندا قۇرال-جابدىقتار مەن ارناۋلى اپپاراتتاردى شىمكەنت قالاسىنان الدىرعان ەكەن. جۇمىسشىلار ارنايى اپپاراتتىڭ كومەگىمەن ابدەن تازالانىپ ەلەنگەن شەگە قۇم، تسەمەنت، مرامور ۇنتاعى جانە ۆەكسۋلا دەگەن ارنايى قوسپانى قوسۋ ارقىلى قۇرىلىستا كەڭىنەن پايدالانىلاتىن كلەيدى جاساپ شىعارادى. دايىن ءونىم 25 كەلىلىك «مەرەي ستروي» دەگەن اتاۋمەن ساتىلۋدا.

– ءبىزدىڭ تۇراقتى تۇتىنۋشىلارىمىز كوپ بولۋى ءۇشىن ءونىمنىڭ ساپاسى جوعارى، باعاسى ءتيىمدى بولۋى قاجەت. بۇگىنگى كۇنى وسى باعىتتا ەڭبەكتەنىپ جاتىرمىز. جەرگىلىكتى جەردە دايىندالعان ءونىمنىڭ باعاسى بازارداعىدان الدەقايدا ارزان. بۇل ءىستى تابىستى جۇرگىزەتىنىمىزگە سەنىمدىمىز. تەك قازالى ءوڭىرىن قامتاماسىز ەتىپ قويماي، ءوڭىردىڭ وزگە اۋداندارىن دا قامتىساق دەگەن ويدامىز، - دەيدى جەكە كاسىپكەر الماگۇل تولەپوۆا.

بۇل جوبا اۋدان قۇرىلىسشىلارى ءۇشىن تيىمدىلىگى زور بولماق. سونىمەن قاتار كاسىپكەر جەرگىلىكتى 3 ادامدى جۇمىسپەن قامتاماسىز ەتىپ وتىر. سونداي-اق، تسەح باسشىسى ءۇيدىڭ سىرتىن سىلاۋعا قاجەتتى ساندىك سىلاق تا (دوجديك) شىعارىپ جاتىر. ايتۋىنشا، جەرگىلىكتى ونىمگە اۋدان كولەمىندە سۇرانىس وتە جوعارى ەكەن.

Abai.kz

0 پىكىر