جۇما, 29 ناۋرىز 2024
تالقى 4621 0 پىكىر 9 شىلدە, 2019 ساعات 13:48

نازارباەۆتىڭ ەڭبەگىنە ءالى وبەكتيۆتى باعا بەرىلگەن جوق

وتكەن اپتادا Nut Otan پارتياسى توراعاسىنىڭ ءبىرىنشى ورىنباسارى باۋىرجان بايبەك ارىس قالاسىنىڭ تۇرعىندارىمەن كەزدەسىپ، ارتىنشا شىمكەنت قالاسىندا وتكەن بەيبىت ميتينگكە قاتىستى. ميتينگ بارىسىندا ول پارتيانىڭ ەل ءۇشىن اتقارىپ جاتقان جۇمىستارىن جوققا شىعاراتىن ارانداتۋشىلار بار ەكەنىن ايتىپ، حالىقتى ولارعا ەرمەۋگە شاقىردى.

باۋىرجان بايبەكتىڭ ارانداتۋشىلار دەپ وتىرعانى - قازاقستان دەموكراتيالىق  تاڭداۋى قوزعالىسىنىڭ جەتەكشىسى - مۇحتار ءابىليازوۆ پەن ونىڭ جاقتاستارى ەكەنى راس-اق. ول باسقاراتىن قدت قوزعالىسىن قازاقستان بيلىگى ەكسترەميستىك ۇيىم دەپ تانىدى. جانە، ەلىمىزدە اتالعان ۇيىمنىڭ قىزمەتىنە تىيىم سالىندى.

سول جيىندا بايبەك مىرزانىڭ تاعى ءبىر ءسوزى ەرىكسىز نازارىمىزدى اۋداردى. حالىق الدىندا سويلەپ تۇرعان پارتيا وكىلى قازاقستانعا تاۋەلسىزدىكتى قانسىز-سوعىسسىز ەلباسى الىپ بەردى دەگەن اۋانداعى ويىن ايتادى. ءسوزىمىز دالەلدى بولۋ ءۇشىن باۋىرجان مىرزانىڭ ايتقانىن قاز-قالپىندا كەلتىرەيىك:

"ەلباسىنىڭ ساياساتىنىڭ ارقاسىندا ءبىز حالىقتى ساقتاپ قالدىق. ول وتە قيىن بولدى.تاۋەلسىزدىكتى الىپ بەردى. قانسىز، سوعىسسىز. 28 جىل ءبىز بەيبىتشىل ومىردە جاقسى كەلە جاتىرمىز...", دەدى.

ءيا، ەكس-پرەزيدەنت ن.نازارباەۆتىڭ تاۋەلسىز قازاقستاننىڭ قالىپتاسۋى جولىندا اتقارعان ەڭبەكتەرى از ەمەس. ونى ۋاقىت تارازىلاي جاتار.

قازاقستان تاۋەلسىزدىگى دەگەندە ەڭ العاش ويعا ورالاتىنى 1986 جىلعى جەلتوقسان كوتەرىلىسى. راس، ول جاستار الاڭعا “تاۋەلسىزدىك” دەپ شىقپادى. ولار سول كەزدەگى قازاق كسر كومپارتياسى ورتالىق كوميتەتىنىڭ ءبىرىنشى حاتشىسى د.قوناەۆتىڭ ورنىنا گ.كولبيننىڭ تاعايىندالۋىنا قارسىلىق ءبىلدىردى. الايدا، الماتىدا بولعان سول جاستار كوتەرىلىسى وداقتاعى باسقا دا رەسپۋبليكالاردىڭ ويانۋىنا تۇرتكى بولدى دەگەندى ايتاتىندار بار. ناتيجەسىندە، كسرو قۇرامىنداعى بالتىق جاعالاۋى رەسپۋبليكالارى وداق قۇرامىنان ءوز ەركىمەن شىعىپ، ەگەمەندىكتەرىن جاريالادى. ءسويتىپ،1991 جىلدىڭ 17-ناۋرىزىنا دەيىن كسرو قۇرامىنداعى 15 رەسپۋبليكانىڭ 9-ى جەتپىس جىل ۇستەمدىك قۇرعان كەڭەستەر وداعىنان ءوز ەركىمەن باس تارتتى.

ال قازاقستان 1991 جىلدىڭ 16-جەلتوقسانىندا وداق قۇرامىنان شىقتى. ال الەمنىڭ دەموكراتيالىق ەلدەرى ۇلكەن قىزىعۋشىلىق تانىتاتىن جەلتوقسان كوتەرىلىسى تۋرالى نەگە ءالى ماردىمدى اقپارات جوق ەكەنى بەلگىسىز. جانە، سول كوتەرىلىستەگى نۇرسۇلتان نازارباەۆتىڭ ءرولى قانداي بولعانى كەيىنگى ۇرپاققا ءالى ايتىلعان جوق.

قالاي دەسەكتە، تاۋەلسىز قازاقستاندى وتىز جىلعا جۋىق باسقارعان ەكس-پرەزيدەنت ن.نازارباەۆتىڭ تاريحي تۇلعاسىنا ءالى وبەكتيۆتى باعا بەرىلگەن جوق. تەك قانا ماقتاۋ نەمەسە جەكە باسىن بىرىڭعاي قارالاۋ عانا. الايدا، تاريحتى بۇرمالاۋ جانە وعان بىرجاقتى باعا بەرۋ بولاشاق ۇرپاق الدىندا كەشىرىلمەيتىن قىلمىس دەپ بىلەمىز.

ايتپاقشى، باۋىرجان  بايبەك مىرزا الگى بەيبىت ميتينگتە: “پارتياعا سەنىڭدەر! ءبىزدىڭ ەلىمىزدە حالىقتى بىرىكتىرەتىن باسقا كۇش جوق” دەيدى.

بايبەك مىرزانىڭ پارتيا دەگەنى  – Nur Otan. راس، Nur Otan پارتياسىنىڭ باسقا پارتيالارعا قاراعاندا وكىلدەرى كوپ. ونى پارتيا دەگەننەن گورى مەملەكەتتىك اپپارات دەگەن ءجون بولار...بىراق، بۇل اپپارات جالپى حالىقتى بىرىكتىرە الا ما؟

ءتۇيىن. جۋىردا قازاقستاندا Nur Otan پارتياسى ۇيىمداستىرعان ەكىنشى بەيبىت ميتينگ ءوتتى. ونداعى ايتىلعان نەگىزگى ءسوز - قدت ۇيىمىنىڭ ءىس-ارەكەتتەرىن ايىپتاۋ بولدى. ال، قدت قوزعالىسىنىڭ شەرۋلەرى بيلىكتى بىرىڭعاي قارالاۋ عانا. الايدا، وسى جيىنداردىڭ ماقساتى شىنىمەن حالىقتىڭ جايىن ويلاۋ ما، الدە، ءار توپ وزىنە ۇپاي جيناۋ ءۇشىن حالىقتى ءوز ماقساتتارىنا پايدالانىپ وتىر ما؟ بىزدەگى جالقى سۇراق وسى!

نۇربيكە بەكسۇلتانقىزى

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3553