نارازىلارعا شىققان نۇر-سۇلتان اكىمىنىڭ ورىنباسارى باقتيار ماكەننىڭ سوزىنشە، اكىمدىك تۇرمىسى تومەن جانە كوپ بالالى وتباسىلارعا مەكتەپ فورماسى ءۇشىن 30 مىڭ تەڭگە (شامامەن 78 دوللار) بولگەن. باقتيار ماكەن نۇر-سۇلتاندا ارزان مەكتەپ فورماسىن ساتاتىن جەتى دۇكەن بارىن، 30 مىڭ تەڭگەگە ءبىر بالانى كيىندىرۋگە بولاتىنىن جەتكىزدى. اقوردا ماڭىنا جينالعان ايەلدەر اكىم وكىلىنىڭ ءسوزىن جوققا شىعارىپ، 30 مىڭ تەڭگە بالانى مەكتەپكە دايىنداۋعا جەتپەيتىنىن ايتادى.
اكىم ورىنباسارىنىڭ سوزىنشە، بالالاردى مەكتەپكە دايىنداۋ ءۇشىن اكىمدىكتەن كومەك الاتىن وتباسىلاردىڭ كوبى اتاۋلى الەۋمەتتىك كومەكپەن دە قامتاماسىز ەتىلگەن.
نارازىلار اكىمدىك وكىلىمەن سويلەسىپ جاتقاندا ولاردى ارنايى جاساق قورشاپ تۇردى. اقوردا ماڭىندا ون شاقتى اۆتوبۋستار جانە ءبىر جەدەل جاردەم كولىگى دە بولدى.
كەيىن باقتيار ماكەن اكىمدىككە كەتىپ قالدى. نارازى انالار اقوردا ماڭىنان سەگىزدەن وتە تارادى. الداعى كۇندەرى تالاپپەن بيلىككە قايتا كەلەتىندەرىن ايتتى.
بيىل 4 اقپاندا نۇر-سۇلتاننىڭ كوكتال-1 شاعىن اۋدانىنداعى شىڭعىستاۋ كوشەسىندە ورنالاسقان جەكە ءۇيدىڭ اۋلاسىنداعى ۋاقىتشا باسپانا ورتەنىپ، ءبىر وتباسىنداعى بەس بالا وپات بولعان.
وسى وقيعادان كەيىن كوپ بالالى انالار نارازىلىعى كۇشەيدى. 6 اقپاندا ەل استاناسىندا جۇزدەگەن انا جينالىپ، بيلىكتەن جاردەماقى مەن جورگەكپۇلدى ءوسىرۋدى، كوپ بالالى وتباسىلاردىڭ بالالارىنا تەگىن ءبىلىم بەرۋدى، انا مەن بالانى تەگىن ەمدەۋدى، باسپانا الۋدى جەڭىلدەتۋدى تالاپ ەتتى.
21 اقپاندا سول كەزدەگى قازاقستان پرەزيدەنتى نۇرسۇلتان نازارباەۆ پرەمەر-مينيستر باقىتجان ساعىنتاەۆ باسقارعان ۇكىمەتتى "حالىقتىڭ جاعدايىن جاقسارتا المادى" دەپ سىناپ، تاراتىپ جىبەردى. كەيىن پرەمەر-مينيستر بولىپ اسقار مامين تاعايىندالدى.
27 اقپان "نۇر وتان" پارتياسىنىڭ سەزىندە نازارباەۆ كوپ بالالى وتباسىلارداعى ءار بالاعا 21 مىڭ تەڭگە تولەنەتىنىن مالىمدەگەن ەدى. تۇرمىسى تومەن وتباسىلارعا دا كومەك كورسەتىلەتىنىن ايتقان. وسىدان كەيىن ەڭبەك جانە حالىقتى الەۋمەتتىك قورعاۋ مينيسترلىگى ساۋىردەن باستاپ تۇرمىسى تومەن وتباسىلارعا اتاۋلى الەۋمەتتىك كومەك (ااك) تولەي باستاعاندارىن حابارلاعان. بىراق ايەلدەر ااك الۋ شارتىنىڭ قيىندىعىنا شاعىنادى.
انالار بيلىكتەن جاردەماقىدان بولەك باسپانا ماسەلەسىن شەشۋدى دە تالاپ ەتەدى. 3 ماۋسىمدا نۇر-سۇلتاندا ونداعان انا اقوردا مەن ۇكىمەت ءۇيى ماڭىنا بارىپ، قازاقستان پرەزيدەنتى قاسىم-جومارت توقاەۆ پەن پرەمەر-مينيستر اسقار ءماميننىڭ شىعۋىن تالاپ ەتكەن. بىراق ولارا ۇكىمەت قىزمەتكەرلەرى مەن قالا اكىمدىگىنىڭ وكىلدەرى شىققان.
كەيىن بيلىك ءار ايەلدىڭ تالابىنىڭ زاڭدى-زاڭسىزدىعىن تەكسەرەتىنىن ايتقان.
19 تامىزدا ەڭبەك جانە حالىقتى الەۋمەتتىك قورعاۋ مينيسترلىگى 21 مىڭ وتباسىنى ااك الۋ ءۇشىن تابىسىن تومەندەتىپ كورسەتتى دەپ ايىپتادى.
Abai.kz
