سەيسەنبى, 17 قىركۇيەك 2019
1185 2 پىكىر 21 تامىز, 2019 ساعات 11:31

كومەككە مۇقتاج جانداردىڭ ماسەلەسى تىكەلەي ەفيردە شەشىمىن تابادى

كۇزگى تەلەماۋسىمنان باستاپ «Qazaqstan» ۇلتتىق ارناسىنان الەۋمەتتىك باعىتتاعى «Niet» جوباسى ەفيرگە شىعادى. ەكى ساعات بويى تىكەلەي ەفيردە وتەتىن جاڭا باعدارلامادا شىنايى كومەككە مۇقتاج جانداردىڭ ماسەلەسى شەشىمىن تاباتىن بولادى،- دەپ حابارلايدى «قازاقستان» رترك» اق ءباسپاسوز قىزمەتى.

الەۋمەتتىك تەلەجوبا بويىنشا اۋقىمدى ساراپشىلار پۋلى قۇرىلدى. وعان قۇقىق قورعاۋ ورگاندارىنىڭ، حالىققا قىزمەت كورسەتۋ ورتالىعىنىڭ، قارجى، ءبىلىم بەرۋ، دەنساۋلىق ساقتاۋ جانە الەۋمەتتىك ماسەلەلەر بويىنشا وزگە دە ۇيىمداردىڭ كاسىبي ماماندارى تارتىلدى.

باعدارلامادا پسيحولوگيالىق كومەك تۇرلەرىنەن باستاپ، قوعام قاجەتتىلىگى مەن تالقىسىنداعى باسپانا، كۆوتا، بالا اسىراپ الۋ ماسەلەلەرى بويىنشا ناقتى كومەك شارالارى قابىلدانادى.

«Qazaqstan» ارناسىندا الەۋمەتتىك باعىتتاعى جوبالار بۇعان دەيىن دە بولدى. «Niet» الەۋمەتتىك جوباسىنىڭ ەرەكشەلىگى - كوپشىلىكتى كومەككە مۇقتاج جانداردىڭ جاعدايىنان حاباردار ەتىپ قانا قويماي، تىكەلەي ەفيردە كومەك قولىن سوزۋ. ءار حابار بەلگىلى ءبىر ادامنىڭ، وتباسىنىڭ ماسەلەسىنە ارنالىپ، ارنايى ساراپشىلار توبىنىڭ اقىل-كەڭەسىمەن باعدارلاماعا بەرىلگەن ەكى ساعات ىشىندە شەشىمىن تابادى»، -دەلىنگەن ءباسپاسوز حابارلاماسىندا.

جوبانىڭ نەگىزگى ماقساتى -  ءتۇرلى سەبەپتەرمەن قيىندىققا تاپ بولىپ، تىعىرىقتان شىعار جول ىزدەگەن جاندارعا قولۇشىن سوزۋ.  باعدارلاما تانىمال تەلەجۇرگىزۋشى گۇلناز الىمگەرەيدىڭ جۇرگىزۋىمەن 9 قىركۇيەكتەن باستاپ دۇيسەنبى-جۇما ارالىعىندا ەفيرگە شىعادى.

كومەككە ءزارۋ جانداردىڭ ءوتىنىش-تىلەكتەرى بۇگىنگى كۇننەن باستاپ +7 (701) 555 07 51 ءنومىرى بويىنشا قابىلدانادى.

ايتا كەتەيىك، بيىلعى كۇزگى ماۋسىمعا «Qazaqstan» ۇلتتىق ارناسى 14 جاڭا جوبا ازىرلەدى. تاعى 10 باعدارلاما جاڭا فورماتتا كورەرمەنگە قايتا ۇسىنىلادى.

Abai.kz

2 پىكىر